الرئيسية / تقارير مميزة / بهاء فاروق يكتب أول مقارنة حقيقية بين موقع Booking وAirbnb

بهاء فاروق يكتب أول مقارنة حقيقية بين موقع Booking وAirbnb

تجربة- بهاء فاروق:

الموضوع ده يعتبر دليلك السريع للمقارنة بين الموقعين الأشهر حاليا لحجز مكان إقامة وانت مسافر. بس إيه الفرق بينهم وأيهما أفضل. الموقعين دول يعتبروا الأكثر استخداما على مستوى العالم، لكن في فرق كبير بينهم, هحاول أختصر لك الموقعين في كلمتين:

موقع booking: هيجيب لك غالبا أحسن سعر لغرفة فندقية.

موقع Airbnb: هيدي لك تجربة أحسن بكتير وانت مسافر.

طيب إزاي ده بيتم, أيهما يناسبني أكتر؟

خليني أحكي لكم شوية عن الفرق بين الموقعين، لأن بجد الموضوع يهم كل واحد بيفكر يحجز إقامة في مكان معين قبل ما يسافر.

من حيث تأكيد الحجز: موقع بوكينج بيدي لك حجز مؤكد بمجرد ما تحط بياناتك ومش بينتظر موافقة صاحب المكان، بعكس Airbnb اللي لازم يكون عندك بروفايل شخصي ولازم تنتظر موافقة صاحب المكان علشان يأكد لك الحجز.

من حيث عدد أماكن الإقامة: بوكينج فيه حوالي 805 ألف مكان إقامة مختلف, أغلبهم منتجعات وفنادق وبعض شقق سكنية بس طبعا داخل كل مكان من دول مئات الغرف المتاحة يعني فيه ملايين الغرف اللي ممكن تحجز منها, بالمقارنة مع Airbnb فده لوحده فيه حوالي 1.2 مليون مكان مختلف للإقامة أغلبها شقق أو فيلل أو حتى غرف خاصة.

من حيث مكان تواجد الوحدات: بوكينج بيغطي تقريبا كل مكان ممكن تتخيله على كوكب الأرض, في المقابل موقع Airbnb بيركز أكثر على المدن الأساسية زي باريس وروما مثلا, لكن بيقدم خيارات أكثر بكثير من موقع بوكينج في نفس المدينة.

بالنسبة للأسعار: تقريبا الأسعار متقاربه جدًا بين بوكينج وAirbnb لنفس الوحدات.

بالنسبه لطول مدة الإقامة: لو هتقعد فتره طويلة في مكان واحد يبقى موقع Airbnb هو الاختيار الأمثل مقارنة بموقع بوكينج اللي بيكون أفضل لو هتقعد فترة قصيرة يومين أو 3 أيام فقط.

بالنسبة للخصوصية: موقع Airbnb بيقدم خصوصية أكبر كتير وخصوصا للعائلات الكبيرة, لأنك بتكون في شقة أو فيلا خاصه بيك, غير الفندق اللي بيكون ساعات زحمة ومساحات الغرف فيه صغيرة جدا.

من حيث التجربة المختلفة: فموقع بوكينج هيوفر لك غرفة في فندق زي أي موقع حجز فنادق, لكن موقع Airbnb ممكن يخليك تحجز فيلا أو شقة كاملة أو حتى غرفة مع عائلة وتعيش معاهم تجربة جديدة وتتعرف على عاداتهم وتقاليدهم وأكيد هيعرفوك أسرار كتير في المكان اللى انت فيه وده مش هيقدر يوفره موقع بوكينج.

نصيحتي الأخيرة ليك: اعمل بحث كويس قوي قبل ما تختار مكان إقامتك و اقرا كل التعليقات عليه سواء من موقع الحجز نفسه أو من Tripadvisor.com, واعرف موقع المكان كويس وإيه الخدمات اللي قريبه منه, وسياسة الإلغاء كمان.

من الآخر لو بتدور على غرفة رخيصة لفتره قصيره يبقى احجز على Booking, لو بتدور على تجربة مختلفة بكل المقاييس وهتحجز في مكان فتره طويلة وعاوز خصوصية وخبره جديدة وانت مسافر يبقى تحجز مع Airbnb.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *