fbpx
الرئيسية / تقارير مميزة / بهاء فاروق يكتب الدليل الكامل لفهم موقع couchsurfing: سافر ببلاش

بهاء فاروق يكتب الدليل الكامل لفهم موقع couchsurfing: سافر ببلاش

تجربة- بهاء فاروق:

يمكن أغلبنا سمع عن موقع couchsurfing, لكن الموضوع ده لكل الشباب اللي غاوية سفر وعاوز يزور مدن وبلاد كتير، وبدون ما يدفع تمن إقامة في فنادق. الموضوع ببساطة أن ناس بتحب السفر قرروا إنهم يساعدوا ناس تانيين بتحب السفر (بدون مقابل) طيب إزاي يقدروا يساعدوهم؟ عن طريق 3 حاجات:

إنه يستضيفك عنده في البيت ويقدملك سرير أو كنبة أو حتى مرتبة على الأرض تنام عليها ببلاش.
لو ده مش متوفر عنده فهو ممكن يتسنكح معاك في البلد اللي هتزورها وده هيوفر لك ان واحد من أهل البلد يكون معاك فيوريك خبايا البلد بأرخص الأسعار كإنك واحد من أهل البلد.
أو إنه يرد على أسئلتك أون لاين في الحاجات اللي تخص السياحة في بلده ويساعدك تنظم جدول لزيارتك فيها.
فالموقع ده مش بس ممكن بيوفر لك سكن ببلاش ده كمان بيخليك تعيش تجربة مختلفه بإنك تختلط بحد من أهل البلد وتعيش معاه وتتعرف على أصدقاءه كأنك واحد منهم, وفرصه إنك تشوف البلد من منظور أهلها مش من منظور واحد سائح وده أكيد هيكون تجربة مختلفة تمامًا, تخيل نفسك أول مره تيجي القاهره مثلا وعاوز تروح الهرم والحسين والنيل, طبعًا لو لوحدك هتتظبط في الأسعار, لكن لو بتلف فيها مع واحد قاهري راح الحتت دي 100 مره فأكيد هيظبطك في كل حاجة ويخليك تروح الحاجات دي كلها كأنك واحد مصري ويمكن تدفع ربع اللي كنت هتدفعه لو لوحدك  😀

طيب قبل ما تروح كده وتتسرع وتعمل أكاونت و تقول أبرشط على أي حد وأقعد عنده ببلاش لازم تعرف شوية حاجات مهمة:

أول حاجه لازم تعرف إن زي ما انت مقلق شوية من موضوع إنك تبات عند حد متعرفوش, هو كمان مقلق أكتر إنه يستضيف واحد عنده عمره ما شافه وخاصة من دولة سمعتنا بره مش ولا بد قوي للأسف, فمبدئيا لازم يكون البروفايل بتاعك محترم قوي لأنه زي الـ CV بتاعك كده وهو اللي هيعرف الناس عليك, الموقع ده قائم على تقييم الناس ليك وكل ما الناس قيمتك كويس والبروفايل بتاعك بقى ممتاز, ناس كتير هترضى إنها تستضيفك عندها يعني زي ما انت بتستفيد منه لازم انت كمان تفيد, يعني قدم السبت علشان تلاقي الأحد.
طيب إزاي؟، بعد ما تعمل أكاونت لازم تقدم خدماتك بإنك مثلا تعرض إنك تستضيف حد أو تفسح حد أو حتى تفيد حد بمعلومات عن القاهره أو شرم الشيخ مثلا, وكل ما تفيد الناس هما كمان هيكتبوا عنك تعليقات كويسة وده هيفيدك إنك يوم ما تحب تنزل عند حد ويقرا التعليقات عنك هيعرف إنك إنسان كويس فيستضيفك عنده أو يقدم لك مساعدات.

طبعا كل ما تكون زرت دول أكتر أو بتتكلم لغات أكتر, الحاجات دي كلها هتخليك في موقف قوي قدام أي حد يستضيفك, هيعرف إنك فعلا غاوي سياحة مش رايح تبرشط من أول مرة وخلاص, فالأحسن إنك تكون سافرت كام بلد قبل ما تستخدم الموقع ده, ولو حتى ما سافرتش حاول تحط صور ليك في أماكن سياحية في القاهرة أو إسكندرية أو شرم مثلا.
ذوقيا لو هتروح عند حد ووافق إنه يستضيفك, حاول تدخل بتذكار من بلدك ده هيدي انطباع عنك كويس, والحاجات دي عندنا في الحسين رخيصة قوي بس عندهم ليها قيمة كبيرة.
كلمة Couch يعني كنبة, بس مش شرط إنك هتنام على كنبة اعمل حسابك إنك ممكن تنام على مرتبة على الأرض أو sleeping bag أو سرير أو حتى غرفة خاصة ليك, و ده هتلاقيه مكتوب عند اللي بيستضيفك ولو مش مكتوب الأفضل تسأله هينيمك فين.
في الـ description على الموقع حاول تكتب كل مميزاتك وهواياتك والدول اللي نفسك تزورها ودراستك إيه ولو بتتكلم أكتر من لغة وتكتب انت سافرت فين قبل كده (بس كل ده من غير تحوير), وياريت بقى لو حطيت كمان صور ليك في دول أو مدن زرتها كل الحاجات دي هتفيدك جدا لما حد يشوف البروفايل بتاعك.
لو لسه جديد في الموضوع مفيش مانع إنك تدفع مبلغ بسيط في الأول وبيكون حوالي 25 دولار مقابل إن الأكاونت بتاعك يكون موثق وحقيقي والحاجات دي كلها في صالحك في النهاية.

شاهد أيضاً

خريطة الامارات

خريطة الامارات السياحية : دليلك الشامل للسياحة والإقامة والتنقل في الامارات

خريطة الامارات | الرحالة |   دولة الامارات العربية، دولة الانجازات والمعجزات، التي استطاعت فعل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *