الرئيسية / أوروبا / أحمد طارق يواصل رحلته في النمسا: ليالي الأنس في فيينا

أحمد طارق يواصل رحلته في النمسا: ليالي الأنس في فيينا

رحلة- أحمد طارق:

يعني ايه الأُنس يعني مش لوحدك ?✋? فيينا يا جماعه فعلا محتاجة أُنس بس أنا بقى طلعتها بطولي كده ? ، البلد حلوة جدًا ونضيفة جدا، بس اللي هيشدك في البلد هو أخلاق أهلها بجد، ناس ملهمش حل، بيساعدوا بكل الطرق، يعني مثلا أنا وصلت فيينا بالليل والهوستل كان بعيد حبتين، ف رحت اسأل واحد قالي ياااااه ده مكان بعيد، بس ولا يهمك تعالى معايا، بصراحة مخفتش، الواد كان شكله ابن ناس، فقلت ده شكله أغنى مني ف مش هيسرقني ?

– قالي بقى انت من مصر؟

– قلت له أم الدنيا يا أبو الكباتن ?

– قالي يااااااه يا أبو حميد، أنا فاكر لما رحت مصر ضربت كشري وأكلت طبق فول إنما إيه شفا ? (ترجمه استوديو حماده النجم)

المهم وصلني الراجل مشكورا .

نمت وصحيت على الساعه ٨ كده، عشان يادوب ألحق ألفها عشان أنا مقعدتش فيها غير يوم واحد للأسف ?

طيب أنا تايه كده ومش محضر هزور إيه وكده، قمت داخل عليريسبشن الهوستيل وقلت للمزمازيل اللي واقفه: أخوكي أحمد من مصر وأول مره آجي ومعنديش غير يوم واحد وعايز ألفها كلها، قالت لي ركز معايا يا هندسة كده في الخريطة عشان هعملك برنامج عنااااب ?

المهم اتوكلت على الله وقلت يا مسهل، طلعت أول حاجة علي القصر الملكي فضلت أتصور وأصور المكان وكده ومرة واحدة ألاقي في واحدة بتقول:

– يا بنتي تعالي يمين شويه ومتتهزيش عشان الصوره تطلع كويسه!!

– أنا: مين اللي قدامي ده صوت معرفوش ??

قلت لها إنتي مصرية؟.. قالت لي: آه و انت.. قلت لها: وشارب من نيلها كمان ? .. المهم عرفت إنها جايه تبع دورة عاملاها وزارة المالية في مصر للموظفين، ودي حاجة كويسة جدا بصراحة، وهي مشكوره بصراحة خلتني أصور خريطه المترو دي كانت مساعدة جدًا لي في باقي الرحلة (تحية جامدة للمصريين في الغربة) ????

– اتجهت علي السوق القديم حاجه كده زي سوق الجمعة بصراحة رحت عشان أفاصل بس ?? وما اشترتش في الآخر ? وأنا في الطريق قابلت كنيسة (سانت شارلز) كانت جميله قوي بصراحة ?

المهم جوه الكنيسه اتكلمت مع ست عجوزة كده في آخر الكلام

– قالت لي: بالك يا أبو حميد انت لو عايز ربنا يسترها معاك تروح تولع لك شمعة في كاتدرائية القديس اسطفان هتتبسط قوي

– قلت لها يا حاجة ده أنا لسه مصلتش العصر بس حاضر هروح ?

رحت ولعت شمعة واتوكلت علي الله عائدًا لأرض الوطن.

شاهد أيضاً

الاماكن السياحية في سالزبورغ

الاماكن السياحية في سالزبورغ : أجمل 6 أماكن سياحية في سالزبورغ جميلة النمسا

الاماكن السياحية في سالزبورغ | الرحالة | مدينة سالزبورغ الفريدة، جميلة النمسا، مدينة تمتلك كل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *