الرئيسية / تقارير مميزة / 30 نصيحة لسفر آمن للبنات: البنت زي الولد بس خلي الدهب في البيت

30 نصيحة لسفر آمن للبنات: البنت زي الولد بس خلي الدهب في البيت

تجربة- بهاء فاروق:
الموضوع ده للبنات اللي نفسها تسافر, متفتكريش علشان أنت بنت أن فكرة السفر لوحدك مستحيلة, انت تقدري تسافري وتتبسطي وتشوفي الدنيا, سيبك من هري إن البنات مينفعش تسافر لوحدها علشان هتتعاكس وتتخطف والكلام ده.
البنات في كل العالم بتسافر لوحدها بدون أي مشكلة لأن ده اكثر حاجه هتعلمك الاستقلالية والاعتماد على النفس, سافري لأن السفر هيخرجك من المنطقة اللي انت فاكراها منطقة الأمان بتاعتك وده هيخليكي تكتشفي حاجات جديدة في نفسك أول مره هتحسيها.
بدون هري كتير وعلشان مهمتنا بجد إفادتكم مش نقول لكم كلمتين حلوين وخلاص, ولأني بعتبركم زي إخواتي ففي حاجات مهمة لازم تعرفيها وانتي مسافرة علشان تكوني مستعدة, ركزي بقى في الكلمتين دول علشان هينفعوكي قوي في بلاد الفرنجة:

1. اختيار المكان الاَمن: قبل ما تسافري لازم تختاري مكان السكن في أماكن حيوية وآمنة وسط المدينة، وده هتقدري تعرفيه من آراء المسافرين اللي قبلك من مواقع زي tripadvisor.
2. لو هتحجزي من موقع couchsurfing أو Airbnb لازم تختاري أماكن عليها reviews كتيرة قوي والناس كلها بتشكر فيها.
3. صاحبي بنات من البلد اللي مسافراها: فيه بنات كتير بتسافر لوحدها زيك وعندها معلومات كويسة قوي عن الأماكن اللي نفسك تزوريها، وفي مواقع كتير بتجمع البنات دي, تقدري تدخلي وتسأليهم على كل حاجه عن المكان اللي هتزوريه وممكن كمان تتصاحبوا وتتقابلوا هناك, مواقع زي: travelgogirl.com , pinkpangea.com, travelletes.net
4. قبل ما تسافري لازم تكوني سايبه لأهلك مسار رحلتك بالكامل وأسماء الفنادق اللي هتنزلي فيها وأرقام تليفوناتها, علشان يقدروا يتواصلوا معاكي أو مع آخر مكان موجودة فيه، لو لا قدر الله حصلك حاجة.
5. إعملي دايما نسخة رقمية من كل حجوزاتك وباسبورك وتذاكر الطيران على موقع على الإنترنت زي dropbox.com أو على الإيميل, علشان لو الورق ضاع أو موبايلك حصله حاجة، يبقى معاكي نسخة تقدري تفتحيها من أي كمبيوتر في العالم وتطبعيها تاني.
6. ممكن تعملي رقم موبيلك تجوال على رقمك المصري وتخليه معاكي علشان لو هتستخدميه للطوارئ وعلشان أهلك يطمنوا عليكي أي وقت, ده هيريح أهلك كتير على فكرة.
7. خلي معاكي دايما الأرقام المهمة للبلد اللي هتزوريها: زي رقم السفارة المصرية ورقم الشرطة والإسعاف ورقم الفندق اللي انتي نازلة فيه طبعا وخليهم مكتوبين في ورقة سهل توصليلها دايما معاكي.
8. دايما حددي وقت ثابت على الأقل مرة واحدة في اليوم تكلمي فيه أهلك وتطمنيهم عليكي.
9. لو هتمسكي شنطة ظهر خليها خفيفة علشان الحركة تكون أسهل وأسرع وفيها الحاجات المهمة فقط.
10. احتفظي دايما بصورة من جواز سفرك معاكي في أي مكان هتروحيه واكتبي عليه رقم أهلك في مصر.
11. متحطيش كل فلوسك في مكان واحد, وحاولي توزعيهم ما بين جيبك والشنطة وحتى في الجزمة مفيش مشكلة.
12. متعتمديش على الفيزا والماستر بس في سفريتك ولازم يكون معاكي فلوس كاش, ومفيش مانع تخبي فلوس (للطوارئ) جوه جزمة مثلا, علشان لو احتجتيهم أي وقت.
13. خلي معاكي باور بنك علشان لو موبايلك فصل شحن وخليه دايما مشحون.
14. خليكي محافظة برضه على تقاليدنا وشرقيتنا لأن ده اللي بيميزك كبنت مصرية.
15. النصيحه دي غريبة شوية بس هتفيدك: لو مش متجوزة إلبسي دبلة إكسسوار كأنك متجوزة, ده يمكن يحميكي من بعض المتطفلين.
16. متلبسيش دهب أصلي خالص وانتي مسافرة ولا تاخدي معاكي أي دهب في السفر.
17. لو الفندق اللي حاجزه فيه مافيهوش لوكر, خدي معاكي قفل صغير وحطي كل حاجتك المهمة جوا الشنطة وإقفليها بالقفل.
18. لو هتسكني في هوستل أو تستخدمي حمام مشترك, خدي معاكي قبل ما تسافري جهاز إنذار صغير للباب أو الشباك, عبارة عن قطعتين بتركبي واحده على الباب والتانية على حلق الباب, و لو حاول حد يفتح الباب بيعمل صوت انذار رهيب. ده رخيص قوي على فكرة وحجمه صغير بس ممكن يفيدك.
19. خلي معاكي بعض وسائل حماية في الشنطة, زي صفارة مثلا وميدالية على شكل آلة حادة.
20. صديقك الصدوق لو مسافرة لوحدك السيلفي ستيك, خليه دايما معاكي واختاري واحد من النوع القوي, وممكن يكون ليه كذا استخدام, فاهماني طبعا.
21. خلي مفتاح الغرفة بتاع الفندق دايما في الأمانات في الفندق مش لازم تخرجي بيها.
22. اتصاحبي على واحدة بتشتغل في الفندق واسأليها على الأماكن الكويسة اللي حوالين الفندق اللي ممكن تاكلي فيها أو تزوريها, ويا سلام لو اديتلها تذكار مثلا من مصر بـ 2 جنيه هتحبك قوي وهتفيدك قوي على فكره.
23. خلي معاكي كارت الفندق و مكتوب عليه العنوان دايما في شنطتك علشان توريه لسواق التاكسي علشان لو مش فاهم لغتك.
24. اذا تهتي في المكان اللي انتي فيه, متطلعيش الخريطة أو التليفون وتسألي الناس في الشارع, أدخلي أقرب مطعم أو كافيه وشيكي على الخريطة براحتك وتقدري تسألي أي بنت أو ست داخل الكافيه.
25. لو هتركبي تاكسي, خليكي مشغلة الـ GPS على الموبايل, علشان تعرفي هو ماشي صح و لا لأ.
26. خلي شنطتك معاكي طول الوقت متغبش عن نظرك, حتى لو دخلتي الحمام في أتوبيس أو مطعم .
27. حاولي دايما تكوني في الأماكن اللي فيها زحمة و ناس زي عربيات المترو مثلا, محدش هيقدر يتعرض لك وانتي وسط ناس كتير.
28. خدي صورة لرقم التاكسي اللي هتركبيه و ياريت لو رقم موبايله كمان, علشان لو نسيتي أي حاجه في التاكسي تعرفي توصلي له على الأقل.
29. لو قلقتي شوية وانتي راكبة تاكسي أو ماشية في الشارع, اعملي نفسك بتتكلمي في التليفون و كأنك هتقابلي حد وقولي له آه أنا هوصل الساعة كذا وأنا ماشية في المكان الفلاني.
30. بعض المدن بتقفل بدري قوي مش زي مصر, حاولي إنك تكوني في الفندق في الوقت المناسب.
أرجع و أقول السفر فعلا متعة وأسلوب حياة ومتخليش حاجه تمنعك من إنك تحققي حلمك بالسفر والمعلومات دي ما هي إلا احتياطات يمكن تنفعك وانتي بتحققي الحلم ده.. شاركي حلمك مع صاحباتك وانشري المعلومات دي ما بينهم, يمكن معلومة تكون سبب إنهم يسافروا ويرجعوا بسلامة.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *