10 معلومات عن ماكاو: أكثر من 50% من اقتصادها قائم على القمار

ماكاو، منطقة إدارية خاصة تابعة لـالصين بنظام دولة واحدة ونظامين، الذي ينطبق أيضًا على هونج كونج، وهي إحدى الدول التي يدخلها حامل جواز السفر المصري بدون تأشيرة. صفحة Around The World، على موقع التواصل الاجتماعي “فيس بوك”، نشرت 10 نقاط قد لا تعرفها عن ماكاو.

١- ماكاو من غير تأشيرة للمصريين ومن غير تصريح أمني، وبالمناسبة هونج كونج برضه نفس الكلام، أنا سافرت من واحدة للتانية بمركب لمدة ساعة وشوية بـ 250 جنيه.

٢- في سنة 2011 بس عدد السياح لـماكاو كان أكتر من 28 مليون (من غير 7000 سنة حضارة).

٣- “ميدان ماكاو التاريخي” بقى مكان تابع للـ UNESCO في 2005، ويعتبر من أهم الأماكن في العالم اللي فيها مزيج بين الثقافة البرتغالية والصينية.

٤- كاثدرائية St. Paul دي لما اتبنت كانت أكبر كنيسة في شرق آسيا، ولحد دلوقتي هى تقريبًا أهم مزار سياحي في ماكاو.

٥- 95% من السكان في ماكاو صينيين، فطبعًا اللغة الأولى هي الصيني. الغريب إن اللغة التانية في ماكاو هي البرتغالي (بسبب الاحتلال لفترة 442 سنة)، بس الأغرب إن مفيش أي حد هناك بيفهم ولا كلمة برتغالي.

٦- ماكاو زيها زى هونج كونج، ماشية بمقولة “بلد واحدة ولكن نظام مختلف”. يعني هى تابعة للصين بس في نفس الوقت ليها علمها وعملتها وجواز سفرها وحدودها، حتى إن السفر من ماكاو للصين يعتبر سفر دولي.

٧- ماكاو هي المكان الوحيد اللي تابع للصين وفيه القمار قانوني. وبالمناسبة كازينو “Venetian Maco” في ماكاو يعتبر أكبر كازينو في العالم وأكبر مبنى لأوتيل في آسيا وسادس أكبر مبنى -من حيث مساحة الأرض- في العالم (تقريبًا قد مطار بكين الدولي).

٨- في 2012 ماكاو كانت صاحبة أسرع نمو اقتصادي في العالم، أكتر من 50% من اقتصاد ماكاو من القمار، واللي هوا بالمناسبة يخليها أكبر بلد للقمار في العالم مكتسحة لاس فيجاس بـ5 أضعاف (على فكرة أنا مش بسوق للقمار، أنا بقول معلومات عن البلد مش أكتر).

٩- هتلاقي كل أنواع الأكل موجودة في ماكاو، بس أحسن وأشهر أكلتين هناك هما كيكة اللوز وتارت البيض البرتغالي (طعمهم تحفة).

10- الإقامة في ماكاو تعتبر رخيصة نسبيا، يعني ممكن تقعد في أوتيل نظيف بتمن هوستيل في بلد تانية، المواصلات العامة سعرها حلو وفي منها ببلاش كمان.