الرئيسية / آسيا / هونج كونج بعيون فتاة مصرية : ناطحات سحاب وباندا وفيلم كارتون

هونج كونج بعيون فتاة مصرية : ناطحات سحاب وباندا وفيلم كارتون

هونج كونج بعيون فتاة مصرية | الرحالة | رحلة- ولاء إسماعيل:

هونج كونج مش من الدول السياحية المعروفة لكنها من أجمل البلاد الصغيرة اللى ممكن تزوها، وتقدر تلفها كلها في 5 أيام. من أكتر الحاجات اللى لاحظتها هناك “ناطحات السحاب” والعربيات البورش وعرفت إنها كانت مستعمرة بريطانية وده اللى خلاها مزيج من الثقافة الصينية والبريطانية.

التكنولوجيا تغطى المدينة بأكملها والإنترنت فى كل مكان والشوارع زحمة ونضيفة والأجراس تملى إشارات المرور والنظام يسود البلد،  اول حاجه ممكن تقلق اللى بيسافر، هى الفيزا، لكن فى هونج كونج متحطش الموضوع ده فى دماغك.

هونج كونج بعيون فتاة مصرية

*الفيزا: هونج كونج لو انت مصرى فمش هتحتاج تقدم على فيزا، وكل اللى عليك إنك تحجز الطيران وعلى المطار عدل، وأول ما هتوصل مطار هونج كونج هتاخد approval دخول البلد لمدة 90 يوم وببلاش.

*المناخ: أنا سافرتها فى شهر 10، والجو كان حر جدًا والرطوبة عالية، وفى أوقات بتنزل مطر بس مع كل ده فى مواسير صرف فى الأرصفة لتجنب ملئ الشوارع بالمطرة، والتكييف مغطى معظم الأماكن هناك حتى المواصلات العامة.

المواصلات في هونج كونج

*المواصلات: المترو أسهل وسيلة هناك ومتوصلة فى كل أرجاء البلد، وجوه محطة المترو هتلاقى مكاتب خدمة عملاء هتساعدكم فى أي حاجة.

كمان الأتوبيسات العامة حلوة ومنظمة وموجود محطات ليها كتير، وممكن كمان بقى تستخدم رجلك، ماهو المشي حلو برضه، هيساعدك إنك تشوف أماكن كتير فى البلد، واوعى اوعى تركب تاكسي لأن أسعارهم نـــار.

*الأكل: قابلتنى مشكلة هناك إن الأكل مش حلال، لكن كان معايا معلبات ساعدتنى لغاية اما لقيت منطقة فيها مطاعم تركي وهندي وباكستاني، أكل حلال.

 

الاماكن السياحية في هونج كونج

1-     سيمفونية الأضواء

من أكتر المناظر اللى انبهرت بها فى هونج كونج، وده عرض ليلى بكشافات الليزر وبيغطى أكثر من 40 مبنى على جانبى الميناء وموجود على ساحل Tsim Sha Tsui  والعرض ده اتصنف كأكبر عرض دائم للضوء والصوت فى العالم، علشان بتشتغل بتناغم هائل مع الموسيقى. العرض بيبدأ 8 مساءا يوميا والدخول ببلاش.

2-     ديزنى لاند (Disneyland)

هونج كونج بعيون فتاة مصرية
هونج كونج بعيون فتاة مصرية

مين فينا مبيحلمش يروح ديزنى لاند؟ فى هونج كونج هتحقق الحلم، موجودة فى جزيرة Lantau  وبتروحها بالمترو وتنزل فى محطة مخصصة لها.

ديزنى لاند لجميع الأعمار وهناك هتشوف السحر والخيال والجمال والمغامرة وهتستمتع برؤية الشخصيات العالمية لديزنى.

بعيد عن اليوم الخيالى اللى عشته هناك فأكتر حاجه لفتت نظرى إني شوفت كتير ناس عمرها أكتر من 60 سنة تقريبا بس رايحين يلعبوا هناك والفرحه ماليه وشهم، وده اللى أكد لي إن “السن والعمر مجرد رقم والفرحة والسعادة هتعيشهم لو انت عايز”، هناك هتلاقى نفسك واقف ما بين الحقيقة والخيال.

3-     حديقة المحيط (Ocean Park)

15310572_551213471755482_932311699_n

الحديقة دى موجودة على أرضين فى هونج كونج، وهتتنقل بينهم بالتليفريك، أو بقطر أوشن العجيب، وهناك هتشوف الحيوانات الآسيوية المدهشة، زى الباندا العملاقة، وهتعمل رحلة مائية فى أعماق البحار وهتشوف المئات من أنواع القرش وأحواض السمك، التى تضاهى المستوى العالمى وهتلعب ألعاب مثيرة جدًا.

وكمان هتشوف حيوانات أستراليا الفريدة من نوعها وهتتمتع بمشاهدة دب الكوالا مسترخيًا على أغصان الشجر، و الكنغر الصغير يقفز مرحًا. قمة المتعة فى المكان ده.

هونج كونج بعيون فتاة مصرية
هونج كونج بعيون فتاة مصرية

4-     دير 10000 تمثال بوذا (Ten Thousand Buddhas Monastery)

15301304_551213065088856_1916238271_n

من أشهر المعابد فى هونج كونج، وفعليا هتلاقى فيه أكثر من 10000 تمثال بوذا ومفيش تمثال شبه التانى.

بتطلع حوالى  430 سلمة علشان تشوفهم كلهم، ولما بتوصل للنهاية بتوصل لأعلى قمة فى المنطقة وبتشوف مناظر طبيعية قمة الروعة.

5-     شوارع هونج كونج

15327693_551213118422184_1801253419_n

وما أدراكم بشوارع هونج كونج، ياااه، الناس كتيرة وفى وسط الزحام هتشوف قد إيه فيه نظام فى المرور والمواصلات والمحلات والمولات وكل مكان.

هتسمع صوت رنين عند إشارات المرور وهتعرف إن ده الوقت اللى بتعدى فيه الشارع، وكمان هتشوف العلامات الإرشادية الموجودة على الأسفلت علشان تسهل إلى أي اتجاه المفروض تنظر، وكمان هتشوف الناس فى الشارع وهتحس كأنك شايف أميرات ديزني تتجول فى الشوارع.

وهتلاقى مكاتب خدمة عملاء هتجاوب على كل أسئلتك فى كل مكان بالمترو وهتلاقيها نضيفة جدًا، والإنترنت هتلاقيه فى كل مكان فى البلد وهتعرف تروح أي مكان، كل اللى محتاجه خريطة البلد.

 

6-     التسوق (هونج كونج جنة لعشاق التسوق)

هناك فى أسواق كتيرة ومتعددة ولكل المستويات والأذواق وفيها كل ما قد تحتاج إليه، ومن أشهر مراكز التسوق Sogo Mall (Causeway Bay)، iSquare فى شارع Tsim Sha tsui .

 

** شوية نصايح في هونج كونج

***متغيروش دولارات فى المطار لأنه بياخد عمولة وهتلاقوا صرافات كتيره فى شارع Tsim Sha tsui وكمان حاولوا تنزلوا Guest house هتوفروا كتير أو Hostel.

*** بصورة عامة البلد غالية بس سهل إنك متصرفش كتير وتستمتع أكتر.

***احجزوا الطيران قبلها بفتره علشان الأسعار متبقاش غالية.

***زوروا متحف مدام توسو، وده متحف شمع لأكتر من 100 ممثل مشهور، وكما فيكتوريا بييك، واركبوا الترام اللى بتشوفوا من عاليه مدينة هونج كونج بأكملها.

15310374_551213375088825_685585177_n

***اوعى تنسى تاخد خريطة البلد لما توصل الفندق لأنها هتساعدك كتير.

***استمتعوا بكل دقيقة هناك حتى لو تهت فى شوارعها توه وانت وحاطط فى دماغك إنك بتتعرف عليها.

الســــــــــفر هيرجعك بدماغ تانية، بأفكار تانية، بحالة نفسية أفضل بمعلومات وثقافات مختلفة ومنظورك للأشياء هيتغير، وحجم المواقف هياخد حقه وثقتك فى نفسك هتعلى.. ســــــــــــــافروا ففى السفر حياة.

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …