محمود عبد المجيد يكتب: دليل ماليزيا لـ”الشباب الكويس” بسعر لن تصدقه

رحلة- محمود عبد المجيد:

بص يا سيدى ماليزيا من أحلى البلاد، اللى تتمتع فية كتير، طبيعة وخضرة وميه وسحاب ولو كمان انت بتاع بزنس هتلاقى أفكار عظيمة هناك.

أولًا ماليزيا ملهاش فيزا، إنت بتروح بتاخد فيزا دخول لـ 90 يوم من غير أي سؤال ولا هيقولك انت جاى ليه ولا رايح فين.

– التذكرة بتتراوح ما بين 2800 جنية لـ 4000 جنية (ملحوظة: الأسعار الواردة في هذا التقرير قبل تعويم الجنيه).

الطيران العمانى بيعمل عروض رهيبة على ماليزيا وصلت فى بعض الأحيان لـ 2800 جنيه، وده بيبقى لوقت قصير قوي من السنة، غالبًا في أكتوبر ونوفمبر، لكن فى الطبيعى إنها بتبقى من 3500 لحد 4000 بالكتير قوي في القطرية والتركية.

– بالنسبة للإقامة، فى هوستل كويس جدًا وجمب أهم محطة مترو فى كوالالمبور إسمها KL Central، واللى منها بتقدر تركب المترو من أي خط وتروح أي حته فى كوالالمبور. الهوستل اسمه PODs The Backpackers Home. في أوضة كبيرة بيبقى فيها 20 سرير مع ناس متعرفهمش، وبيبقى ليك دولاب صغير كدة بمفتاح عشان تحط فية حاجاتك المهمة.

السرير بـ 35 رنجت “عملة ماليزيا” أي ما يعادل 65 جنيه مصري فى اليوم، وكمان بيبقى ليك وجبة فطار (عيش توست ومربى فراولة وزبدة سوداني).

بالنسبة للأكل فالأكل هناك رخيص والمطاعم كتيرة ومتنوعة، ما بين أكل هندي وماليزي وصيني، وفي أماكن فيها مطاعم عربية كتيرة، بحكم إن في عرب كتير فى ماليزيا. ونصيحة كل أكل ماليزي وهندي، عشان تعيش التجربة وسيبك من الشاورما والأكل العربي ده.

وطالما قولنا الأكل فلو رحت ماليزيا لازم تاكل فى مطعم اسمه Nando’s Restaurant KLCC، مطعم جميل جدًا وبيقدم فراخ بصوص حلو جدًا والناس فية لطيفة قوي.

بالنسبة للتنقلات فعندك 3 خطوط مترو فى كوالالمبور، تقدر تتحرك بيهم ولو في أماكن مش قريبة من المترو ممكن تركب لأقرب محطة وبعدين استعمل UBER هناك هتلاقيه رخيص وسريع وكويس. وفى كمان هناك أبليكاشن تاني أرخص من UBER اسمه MyTeksi رخيص جدًا جدًا وبتدفع فيها كاش.

فى كوالالمبور الفسح حلوة وكتير، فى المعبد الهندي Patu Caves، والبرجين التوأمين، وgenting Highlands ودة تليفريك بياخدك يطلعك فوق جبل كبير ومنظر وخضرة وسحاب تحتك ملهمش حل، وكان رخيص جدًا بحوالي 15 جنية مصرى 🙂 رايح جاى. كمان في المتحف الإسلامى وحديقة الفراشات، وفى مول للإلكترونيات بقى موبايلات وكاميرات ولابات اسمه low yat plaza.

لو عايز بقى تروحلك جزيرة حلوة، روح لانكاوى. جزيرة جميلة جدا جدا هتركب طيارة من كوالالمبور لهناك فى ساعة واحدة بس. التذكرة غالبًا رايح جاى بـ 150 رنجت يعني 275 جنيه مصري (قبل التعويم) على طيران اسمه Malindo Air. وفي هوستل هناك لطيف اسمه Rainbow Lodge Guest House Langkawi, Malaysia، الليلة فيه بـ 30 رنجت.

الجزيرة بقى جميلة جدًا، روح اقعد على البحر. فيها تليفريك أجمل ما فى الكون بتطلع تشوف جبال وخضرة ومياه وسحاب حاجة كدة سبحان إبداع الخالق فعلا. كمان فيها رحلات بحرية برضه جميلة جدًا ورخيصة.

هفرض إن رحلتك 12 يوم، هتقعد 7 أيام فى كوالا لامبور، إقامة 35 + الأكل 40 + تنقلات 20 فى 7 أيام = 665 رنجت = 1217 جنيه (قبل التعويم).

رحلة لانكاوى 5 أيام، التذكرة رايح جاى 275 + الأكل 40 + إقامة 30 + تنقلات 20 فى 5 أيام = 450 رنجت = 825 جنيه (قبل التعويم).

كدة الرحلة عاملة 5642 جنية مصرى، قول 6000 جنية يا عم.