محمود عادل يكتب عن رحلته للأهرامات: آخر مرة زرتها امتى؟

رحلة- محمود عادل:

قبل ما نبدأ في أي حاجة، لازم نأكد على أن مصر فعلًا بلد جميلة وعظيمة، وحضارتها فعلًا من أعظم الأشياء اللي حصلت في تاريخ البشرية. إحنا لو بنستغل معالمنا السياحية أفضل استغلال، كنا هنكون من أقوى الدول السياحية في العالم فعلا. ورغم كل الظروف اللي مصر بتمر بيها، ولكن مصر برضه جميلة، وبعضنا بينسى ده وبيفتكر أنه مبيحبهاش والعكس هو الصحيح.

نخش في الموضوع بقى هتكلم النهاردة عن زيارتي للأهرامات لأول مرة من أكثر من 15 سنة (طبعًا أول مرة دي نعتبرها بلح لأني كنت مكملتش 5 سنين ساعتها أصلًا) 😀 في 10 نقط بسيطة.

1 – سعر التذكرة للمصريين للدخول للمنطقة الأثرية 10 جنيه للفرد و5 جنيه للطالب، زود مثلًا 40 لو ناوي تدخل الهرم أو تشوف مركب الشمس، أنا دخلت مع صديق ليا فمش متذكر الثمن، ولكن الأسعار دي من على موقع محافظة الجيزة.

 

2 -في تواجد كويس للسائحين في الأهرامات، أغلبهم من آسيا (اليابان – الصين) وغيرهم، وقابلت واحد هولندي 😀

3 – ممكن تلاقي واحد “براشوت” جاي يغفلك ويقولك يالا تعالى خد صورة على الجمل وبعدين يقولك هات 50 جنيه، ده أنت عارف هتتعامل معه إزاي. 😀

4 -هتلاقي واحد عاملك فيها مرشد سياحي وجاي يبرشط برضه ويقولك كلام من اللي هو أنت ممكن تكون عارفه وفاكره من ابتدائي لما كنت بتذاكر دراسات اجتماعية، فكك برضه وقوله شكرًا لو انت مش محتاجه.

5 -ركز في النصحتين اللي فاتوا كويس قوي. 😀

6 – الشرطة منتشرة بشكل كويس والتأمين كذلك، معرفش هل ده من بدري ولا بعد الأحداث الأخيرة.

7 – الشرطة بتحاول قدر الإمكان منع الباعة الجائلين أو العالم بتاعت الأحصنة والجمال من البرشطة على المصريين والسياح.

8 – لو السياحة مضروبة، فبنسبة كبيرة بسبب الناس دي واللي واخدين كارنيهات! ياريت يتسيطر عليهم أكتر من كده.

9 – ميتضحكش عليك وانت بتشتري أي حاجة من هناك، يا تفاصل يا تمشي يا تجبها من أي مكان تاني هتبقى أرخص بمراحل.

10 – ركز في 3 و 4 و 9 كويس قوي.

أحد الأشخاص بتوع الجمال والأحصنة، طلب من أجنبي يصوره وبعدها قال له تعالى على الجمل وهصورك، السائح فاهم إنها مجاملة، ولكن اكتشف إنه بيغفله وزي ما بنقول “بيجيبوا بالطريقة” وطلب 50 جنيه وبدأ صوته يعلى والسائح شكله كان صايع حبتين تلاتة فرفض، السائح قال لي: “أنا خفت منه”! ?