الرئيسية / آسيا / محمود عادل يكتب عن رحلته لفلسطين المحتلة: 14 معلومة عن قطاع غزة

محمود عادل يكتب عن رحلته لفلسطين المحتلة: 14 معلومة عن قطاع غزة

قطاع غزة | الرحالة | رحلة- محمود عادل:

أحدثكم اليوم عن أسخن بقعة على كوكب الأرض، قطاع غزة ، بفلسطين المحتلة، النهاردة هتكلم عن تجربتي في قطاع غزة .

كنت حابب أسرد بعض التفاصيل الخاصة بالتكاليف، كنت بروح كتير قبل سنة الـ 2000، وانقطعت لفترة وبعدين رحت مرتين. آخر زيارة لي كانت في 2012، فأكيد كل حاجة اتغيرت في الـ 4 سنين اللي فاتوا.

أول ما رجلي خطت أرض فلسطين، كنت في فرحة غير عادية، ابتديت استرجع كل حاجة كان بتتحكيلي عن قطاع غزة و فلسطين .

قطاع غزة

استرجع صور الشوارع اللي كانت بتدور فيها الاشتباكات بين الشبان الفلسطينيين وقوات العدو الصهيوني، كنت بمعنى أصح طاير، هسرد تجربتي هناك وأحاول اخدكم في جولة معايا، في بعض النقط البسيطة:

قطاع غزة
قطاع غزة

1- قطاع غزة من حيث المساحة صغير جدا، حرفيًا زي ما بنقول “أوضة وصالة” وأغلبية العائلات عارفين بعض هناك.

2- مفيش الشوارع الواسعة أوي دي اللي عندنا، الشوارع ضيقة بعض الشيء.

3 – منطقة الشيخ رضوان والرمال كانوا أحلى منطقتين للفسح واللف، زي شارع روكسي كدة عندنا. 😀

dsc03277

شارع البحر في غزة

4- مفيش أتوبيسات ولا ميكروباصات كوسائل مواصلات، كلها هناك بتعتمد على التاكسيات. أغلى أجرة لأجدعها مشوار ممكن تدفعها “2 شيكل” بس.

والشيكل طبعا هو عملة الكيان الصهيوني، وبيتم التعامل بها في كل أرجاء فلسطين المحتلة، وأحيانا بيكون في تعامل بالدولار في المعاملات الكبيرة، شراء شقق مثلا.

5- شارع البحر أجمل شارع ممكن تنزل تتمشى فيه بغزة وتشم هواء، وطبعا هو اسمه كدة لانه بيطل ع البحر المتوسط، فأنت قاعد على كافية بتشرب قهوتك الصباحية ع البحر، أكنك في اسكندرية بالضبط.

dsc05306

6- والله يا جماعة الكنافة اللي بيقولوا عليها نابلسية هنا في مصر، لا تمت للكنافة النابلسية بتاعت غزة بصلة، لا كنافة نابلسية إلا في فلسطين بس! 😀

7- غزة أكتر المناطق أمان في العالم! تصدقوا!! عادي جدا تنزل تتمشى فيها 4 الصبح من غير ما تتثبت، مقبلتش الجو ده، انتشار قوات الشرطة الفلسطينية في كل مكان.

dsc03334

الأمان في غزة

8- استحالة تلمح واحد بيتحرش واحدة في غزة ، بتحسب الله ما خلقه! 😀

9- لو قاعد بتتفرج ع التلفزيون، والصهاينة حبكت معاهم يرخموا على خلق الله ويطلعوا بطيارات الاستطلاع، انسى انك تكمل اللي كنت بتتفرج عليه، سواء ماتش ولا مسلسل!.

dsc04936

رمضان في غزة

10-لو مكلتش آيس كريم من عند كاظم في الشيخ رضوان، يبقى مكلتش أيس كريم في حياتك.

11- عادي جدا تبقى قاعد في أمان الله على السطح بعد صلاة الفجر، وتلاقي مسلحين ظهروا مرة واحدة في الشارع، متعرفش بقى طلعوا من تحت الأرض ولا إيه اللي حصل!.

12- وانت في رمضان، عادي جدا تفطر على صوت القصف أو صوت صاروخ طالع بدل ما تفطر على الأذان.dsc03497

قصف إسرائيلي

13- ممكن مرة واحدة تسمع البيت بيتهز بيك، تسأل ايه اللي بيحصل يقولولك لا مفيش ده تلاقي قصف ولااختراق حاجز صوت، ودي عملية بيقوم بيها طياري العدو الصهيوني بهدف إخافه الناس.

الصوت مرعب جدا وقليلون اللي بيعرفوا يفرقوا بين القصف الحقيقي واختراق حاجز الصوت أو تفريغ الهواء في عرض البحر.

dsc03348

14- العشرة شيكل الفضة، شبه الجنيه المصري، أول ما وصلت كنت بتزاول وأدي المحلات جنيهات بدل الشيكل، وكان يفتكرني هنصب عليه 😀 وزعتهم قبل ما أمشي للذكرى 😀

 

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …