الرئيسية / أوروبا / محمد سري يكتب مغامرة الوجود في 3 بلدان في نفس الوقت: شغل ساحر

محمد سري يكتب مغامرة الوجود في 3 بلدان في نفس الوقت: شغل ساحر

رحلة- محمد سري:

إزاي نفس الشخص يبقي موجود في 3 بلاد في نفس الوقت غير في الأفلام؟!، الحمد لله كنت  في 3 بلاد في نفس الوقت (النمسا، سلوفاكيا والمجر). القصة بدأت بإني شوفت مكان على google، اسمه Tripoint، ولقيت إن نادرا ما حد بيروح هناك، لأن المكان ده نقطة التقاء الحدود بين 3 بلاد وبعيد جدًا عن أقرب مدينة، ومفيش أي وسيلة اتصال هناك، ومفيش حتى مواصلات علشان توصل له، غير طبعًا إن ساعتها كانت مشكلة اللاجئين فكان في نسبة إن الواحد يتقبض عليه.

دورت كتير لحد ما وصلت لآخر نقطة ممكن الباص يوصلها وهي علي الطريق السريع، ولسه قدامي مش أقل من 7 كيلو لحد ما أوصل هناك. لقيت باص معدي ركبته على أساس إنه رايح ولأن محدش بيتكلم غير لغتهم، فالحمد لله طلع رايح قرية نائية في الشرق، والباص مش هيقف غير هناك. رجعت ده كله مشي و كان حوالي 3- 4 كيلو لحد ما وصلت علي الطريق السريع تاني.

بعد ما مشيت نص المسافة لقيت اتنين خدوني معاهم في العربية علشان يوصلوني وطبعا لما الحدود جات، طلبت إني أنزل، وأكيد قادرين تتخيلوا تعبيرات وشهم، والكلام اللي قالوه بلغتهم اللي أكيد خمنت إنهم فاكريني مجنون.

وصلت علي الحدود بس كان المفروض أمشي وسط حشائش غريبة كدة لمدة نص ساعة مثلاً علشان أوصل، طبعا كل ده مفيش حاجة حواليك غير شوية أصوات حيوانات بتجري وانت حتي مش عارف دول إيه.

بدأت أققد الأمل وقلت أكيد تهت بس قلت هحاول تاني، بس كان لازم الواحد يلحق قبل ما الشمس تروح لأن مفيش رجوع طبعا لو الشمس غابت.

بعد عناء أكتر من 5 ساعات من غير مياه أو أكل وتعب، وصلت للمكان اللي خططت له.

فضلت واقف نص ساعة بحاول أستوعب إزاي أنا واقف في 3 بلاد في نفس الوقت، عمري ما تخيلت إني هعملها في حياتي.

الصورة تبان عادية بس القصة للوصول ليها كان أصعب من إن أي حد ممكن يتخيلها.

غير طبعا و انا راجع مشي عربيتين شرطة وقفوني، لأنهم افتكروني لاجئ و جاي من بلد تانية بس الحمد لله عدت علي خير.

المكان ده له رهبة و عظمة كبيرة وأتمنى إن حد يقدر يروحه بعدي من غير ما يخاف. سافروا يا جماعة و انتوا في السن ده علشان بكرة هتندموا واتجننوا وامشوا دايما بمبدأ: No risk no fun

 

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *