كيف توفر في مصاريف رحلاتك الخارجية: الإقامة والمواصلات

تجربة- عبد الله توفيق
في طريقm بسيطة بتوفر لي في أغلب الدول اللي بسافرها، وهي إني أتعرف على سياح مسافرين نفس الدولة، ونتفق نتقابل هناك، وبعد ما بنتقابل بنتحرك مع بعض وده بيوفر لي فلوس كتير، لأني بدل ما هركب مترو أو كذا مواصلة علشان أوفر، لأ هركب تاكسي. لو احنا مثلا ٤ الأجرة هتتقسم علينا كلنا و بكده تبقى راكب مواصلة مريحة، و في نفس الوقت بتدفع قليل.
كمان الطريقة دي بتوفر لي في الإقامة، لأننا بناخد أوضة كاملة في هوستيل أو أوضة كبيرة في فندق محترم، وبرضه التكلفه بتتقسم علينا.
أوقات كتيير بنقرر نلف البلد كلها بموتوسيكلات، وبنفضل نسوق بالـ١٢٠ كيلو في اليوم، وساعات أكتر، والموضوع بيبقى ممتع قوي، كل يوم نبات في مكان شكل، ده غير إنك بتبقى مطمئن شوية وانت في أي حتة لأنك مش لوحدك، و معندكش أي فكرة المكان اللي انت رايحه ده أمان ولا إيه نظامه.
طب أنا بتعرف على ناس مسافرة البلد ازاي؟
بص. في موقع اسمه CouchSurfing أكيد سمعت عنه، الموقع ده بيتيح لك إنك تشوف ناس ساكنه في البلد اللي انت رايحها، تبات عندها ببلاش، بس أنا الصراحة مش بستخدمه كده، أنا بختار البلد اللي هسافرها، وبعمل إيفينت للبلد دي يشوفه كل الناس اللي مسافراها أو المقيمين هناك.
إيفينت إني مثلاً مسافر البلد دي وليكن كمان ٣ أيام و عاوز ألفها كلها بموتوسيكل أو عاوز أقابل حد يغامر معايا وبلاقي ناس كتير من دول مختلفة بتكلمني، بس أنا بكون مثلا محدد عدد معين (بفضل ٤ بالكتير علشان الموضوع ميكونش أوفر)، بعد كده بحدد الميعاد و المكان اللي هنتقابل فيه و بنبدأ.