دهب ونويبع بعدسة الفنان فارس حرز: مصر التي لا نعرفها

تصوير- فارس حرز:

دهب ونويبع، المكانين دول من أحلى الأماكن فى مصر وفى سيناء خصوصًا، وليهم مكانة فى قلبي. الأول هتكلم عن دهب، من أحسن الأماكن اللي هتقدر تستمتع بحاجات كتير فيها، ورخصية جدًا، مش غالية زى ما في ناس بتفتكر إن السفر مكلف فيها.

دهب صغيرة جدًا هتكلم عن الفنادق فيها وأسعارها، وده بيختلف من موسم للتاني، وفي أسعار فنادق بيوصل فى اليوم لـ 100 جنيه أو أقل. بالنسبة للأكل عندك مطاعم تحفة قوي، أنا هرشح المكانين دول تحديدا لأني جربتهم King Chicken, وعلي بابا، لو بتحب أكل السمك، والجمبري تحفة جدا، وهتلاقى ليهم rate جميل على tripadvisor.

نخش على الأماكن اللي تقدر تروحها في دهب وتستمتع، المشاية جميلة جدًا هتلاقي فيها أماكن تحفة زي everyday ,Friends ,Yum Yum Restaurant هتلاقى كل الأماكن دي على المشاية.

لو انت مصور ييبقى انت مكانك الصح دهب، عندك البلوهول والاجون ووادى جناية ومحمية أبو جلوم وcoloured canyon، أنا شرحت باختصار مدينة دهب، أتمنى أكون قلت المفيد.

الجزء التانى من شرح الأماكن، مدينة نويبع، مشهورة أكتر بوجود الكامبات البدوية، البعد عن أي حياة مدنية، ومع كده في فنادق كويسة جدًا ليها شاطىء خاص، وطبعًا من أجمل الأماكن بالنسبة لي، راس شيطان، على بعد 6 كيلو من نويبع.

هتلاقى كامبات كتير على البحر، من أحسنها من وجهة نظري كامب عياش وكامب كاسل بيتش، تقدر تستمتع بإقامة لذيذة وأكل كويس وسعر كويس، ممكن فى الليلة الواحدة تدفع 120 جنيه أكل وشرب، وعلى حسب إمكانيات كل شخص. وطبعا من أشهر الأماكن اللي تقدر تروحها في نويبع وادى الوشواوشي.