الرئيسية / تقارير مميزة / دليلك الكامل للسفر إلى أوروبا ببلاش: الإقامة والمواصلات والأكل

دليلك الكامل للسفر إلى أوروبا ببلاش: الإقامة والمواصلات والأكل

تجربة- كرم شيركوفيتش:

كاوتش سيرفينج COUCHSURFING هو أكتر موقع استخدمته وأنا مسافر، وأكتر موقع أنا ممتن ليه. بتقعد عند حد من البلد ببلاش, بيخرج معاك و بيوريك المدينة ولو مش فاضى بيديك نصايح إزاى تستمتع بالمدينة وتزور الأماكن السياحية، الأماكن اللي مش مشهورة لكن تستحق الزيارة.

بتستفيدوا من خبرات بعض وبتكسب صديق جديد وإقامة ببلاش. لكن مش سهل إنك تلاقى حد يستضيفك على طول فى أوروبا لأن لازم تكون عامل أكاونت كويس جدًا على couchsurfing و تبقى عارف تبعت طلب بطريقة صح إنك عايزه يستضيفك.. فى الأغلب ببعت في كل مدينة رايحها لـ10 أشخاص عشان حد يقبل.

– لو الوقت كان ضيق وملحقتش أبعت على الموقع وألاقي حد, فى بدائل زي الهوستيلز وبتبقي رخيصه بحوالي 20 يورو في اليوم، وساعات أقل، أهم شيء اختار غرفه سينجل عشان متعلقاتك.

– الأكل: متجبش معاك أكل من مصر, فى محلات السوبر ماركت الكبيرة في أوروبا أسعارها بتكون رخيصة جدا, وفي الأغلب بتكون معمولة لطلبة الجامعات، وبتكون ليها فروع جنب الجامعات و بتلاقيها زحمة.

طلبة الجامعات بيعرفوا إزاي تاكل بأقل سعر هناك عشان كده بقول couchsurfing مش مجرد إقامة ببلاش, لكنه بيظبط الرحلة كلها, وفي الأغلب أنا كنت كل يوم حد بيعزمنى فطار, غدا, عشاء, سواء اللى مستضيفنى أو الناس اللي بتعرف عليها وأنا مسافر. ولما بستقبل حد في مصر أنا اللي بعزم طبعا عشان متفتكروش إني عايش سفلقة بس. 😀

– محلات السوبر ماركت زى Lidl,Netto, Rewe,Carrefour, كل بلد فيها شوية.

– كل من الشارع, مش لازم تاكل من المطاعم. وبرضه متاكلش من السوبر ماركت دايما, دوق أكل المدينة اللى انت فيها حتى لو غالي شوية. حاول تعمل توازن.

-المواصلات: فى المواصلات معنديش غير اختيارين. لأول واحد هو hitchhiking وهو إنك تروح أول الطريق اللى بيربط بين مدينتين وتمسك يافطة فيها اسم المدينة اللى عايز تروحها وتستنى حد يقف لك. الطريقة دي أنا استعملتها فى 90% من السفر بين المدن.

خليك منطقى, متبقاش فى مكان و تمسك يافطة بمكان يبعد 1000 كيلو مثلا, حاول يكون اختيارك لمدينة تبعد 250 كيلو مثلا ومنها للي بعده وهكذا. استعمل الخريطة وموقع hitchwiki.com وده بيقولك أنسب الأماكن اللي تقف فيها.

حتى الآن أنا مفشلتش في أي محاولة, بالعكس بقابل ناس حلوة جدًا وفى الأغلب بيعزمونى أبات عندهم لو كنت لطيف وبتكلم معاهم. فى سلبيات زي إنك ممكن تستنى كتير عربية تقفلك وممكن تبقى انت واقف في مكان غلط أصلا.

تانى اختيار هو الباص وأنا بسافر مع شركة FlixBus بتكون أسعارها كويسة. فى غير المواسم. الطيران فى أوروبا بيكون برضه رخيص جدًا وفي الأغلب أرخص من الباص, وبتفرق حسب خط سيرك.

-سافر بالباص بالليل, تكون كسبت مواصلة من مكان لمكان ويبقى ليك مكان تنام فيه.

-خليك لطيف واجتماعى جدًا جدًا, جزء كبير من السفرية بيبقى اعتماد على الناس, لو انت منغلق هتدفع فلوس أكتر, هتستمتع أقل, مش هتستفيد ومش هتكسب أصدقاء.

-اللغة مهمة جدًا, لو مش بتتكلم إنجليزى صعب تكون في أوروبا, إنجليزى على الأقل ويفضل تبقى بتتكلم لغة تانية.

– في كمان bla bla car, وده ويب سايت بيبقي في حد مسافر من بلد لبلد بعربيته، وممكن تقدم أون لاين إنك تروح معاه و تدي له واحد يورو أو ببلاش ساعات.

-اتجنن, في الآخر انت مسافر عشان تغير من يومك, إعمل حاجات مستحيل تعملها فى بلدك, جرب حاجات جديدة, إعمل حاجات عمرك ما فكرت إنك تقدر تعملها, جيب آخرك, أو بمعنى أصح شوف انت إيه آخرك، أصلا ده لو عرفت.

-إسرح بخيالك, في الآخر الأفكار دي كانت مجرد تفكير تم تجربته ونجح, إسرح انت برضه وطلع أفكار جربها وانت مسافر وابقى احكي لنا عنها عشان نستفيد.

-الموضوع بيكلم الناس اللي فعلا عايزة تسافر من غير ما تصرف وبيتكلم على الأساسيات, ممكن أقول لك على الإقامة في هوستيل بـ10 أو 15 يورو في الليلة, العروض بتاع نظام المواصلات وزيارة المتاحف, الجولات السياحية, الـhappy hour, الـshopping وأوقاته والأماكن بتاعته, airbnb, وحاجات تانية كتير، لكن في غيرى اتكلموا كتير عنها وانت كده كده هتكتشفها أول ما تسافر.

أنا بحط ليك 2000 جنيه أساس وأقل سعر، وانت كل ما تزود كل ما هتعمل حاجات أكتر, وكمان لما يكون أساس 2000 جنيه وبعدين انت تصرف مثلا 5000 جنيه هتلاقى نفسك عملت حاجات كتير جدًا ودلعت نفسك جدًا وبرضه مصرفتش كتير اللى هما 5000 جنيه في أسبوعين.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *