تجربة شاب مصري في برشلونة: ده اللي هيحصل لو عرفوا إنك بتشجع الريال

رحلة- محمد نصر:

أول ما نزلت برشلونة بإسبانيا، حسيت بإحساس غريب جدًا، مكنتش حاسس إني في دولة أوروبية (الناس بتضحك وتهزر ولذيذة كده والشمس طالعة). حسيت إن برشلونة فيها حاجه حلوة زي مصر كده، “بس علي نضيف”.

الناس في برشلونة مثال عظيم لأي دولة في تطبيق القوانين، اللي هدفها تنظيم الحياة، وده على عكس الألمان، اللي بيطبقوا القانون لمجرد إنه قانون وخلاص، يعني مثلًا لو الطريق فاضي والإشارة لسه حمراء، الناس في برشلونة بتعدي عادي طالما مفيش عربيات، على عكس الألمان اللي بيفضلوا واقفين حتي لو الشارع فاضي جدًا.

في برشلونة سهل جدًا تتعرف على أي حد، سواء بنات أو ولاد أو ناس كبيرة، واحتمال كبير جدًا تلاقي الناس هي اللي بتنكشك وتهزر معاك عشان يتعرفوا عليك.

برشلونة تقريبًا فيها كل مقومات الدولة، لأنها فيها ببساطة كل حاجة (ميناء وسياحة بحرية وبحر وأماكن سياحية وكامب نو وحاجات تانية كتير)، وعشان كده هم عايزين ينفصلوا عن إسبانيا، ويبقوا دوله تانية لوحدهم.

في ميدان اسمه كتالونيا، الميدان دا لو فضلت تمشي فيه كل يوم مش هتمل منه. بجد من أجمل ميادين العالم وهو يعتبر أزحم وأجمل ميدان في برشلونة كلها.

في برشلونة عادي جدا تصحى علي احتفالات في الشارع بفرق موسيقية بتعمل كرنفالات في الشوارع.

 

في برشلونة ممكن جدا تفضل لحد الصبح في الشارع وهتحس إنك لسه الضهر من كتر الزحمة، عن ميدان كتالونيا أتحدث.

في برشلونة هتشوف وهتتعرف على أحلى وألذ بنات في حياتك.

الجو هناك جميل جدا، اللي هو مش حار زي مصر ولا برد زي أوروبا، حاجه كده جامدة تخليك ماشي مستمتع بالجو.

لو بتحب الآيس كريم لازم تروح برشلونة، هتاكل أحلى آيس كريم في حياتك.

في برشلونة وانت بتقطع تذكرة مترو من الماكينة ومحتاج أي مساعدة، عندك زرار لو دست عليه هيدخلك علي خدمة العملاء وهتلاقي واحد بيكلمك من الماكينة.

نيجي بقي للكامب نو والكلاسيكو:

– الاستاد جنب المباني السكنية، يعني تبقي ماشي في شارع كله محلات وبيوت وفجأة تلاقي الاستاد في وشك.

وأنا رايح الاستاد كنت فاكر إني ماشي في طريق غلط من كتر ما أنا مش شايف أي زحمة ولا الطريق واقف ولا تحس إن هنا فيه 100 ألف متفرج هيدخلوا الاستاد. عارفين يعني إيه 100 ألف متفرج من غير ما الطريق يقف ولا حتى ألاقي حصان وعليه أمن مركزي.

 

لو رحت برشلونة متعرفش حد إنك بتشجع ريال مدريد عشان دي فيها زعله ليك، من الآخر أي حد معاه فيزا وبيفكر يروح مكان كويس لازم يسافر برشلونة.