بهاء فاروق يكتب 15 سرًا من أسرار الحصول على الشنجن: عملية خزعبلية

تجربة- بهاء الدين فاروق:

أعتقد ناس كتير مرت بالموقف ده، وأنا واحد منكم الصراحة 🙂 (أيوه أنا اترفضت في شنجن قبل كده 😀 ) لكن بعد الحصول على كذا شنجن عرفت أسرار الموضوع و الحمد لله بقت شنجن لعبتي 😉 و دي أسرار الحصول على فيزا شنجن:

أهم حاجة في كشف الحساب أن يكون عليه عمليات سحب وإيداع كتير خلال آخر 6 شهور, وده أهم من المبلغ الموجود نفسه, بس كمان لازم تثبت إنك قادر تعيش هناك وتصرف بدون مشاكل.
الصورة اللي حتقدمها لازم تكون غير صورة الباسبور (حتى لو حديثة) المهم تكون غير صورة الباسبور.
تأمين السفر لازم يغطي طوال فترة إقامتك هناك.
بسبب ظروف البلد الاقتصادية شباب كتير فعلا بتفكر تسافر ومترجعش تاني وده من أكتر الأسباب اللي بتخلي نسب رفض الفيزا للمصريين عالية جدًا, فلو بتفكر إنك تسافر علشان تكُت وتكسر فيزا, فخلي بالك موظفي السفارة بيعرفوا ده كويس، وفيزتك هتترفض (عندهم قرون استشعار للناس دي).
لو هتسافر بدعوة من صديق أو دعوة من واحدة صاحبتك علشان تروح تتجوز هناك, فنسب رفض الفيزا حتكون كبيرة, علشان ده هيثبت لهم إنك مش راجع تاني.
للأسف السائح المصري مش مهم قوي للسياحة الأوربية لأنهم عارفين إنهم مش هيستفيدوا منك قوي وعارفين إن أغلب الشباب بيروحوا عاوزين يلفوا أوروبا كلها بأقل التكاليف (سنكحة يعني), واحنا عاملين الصفحات دي بالفعل علشان كده (مش حنضحك على بعض 😀 )
لازم تقنعهم إنك مسافر فعلًا علشان سياحة، وده بيتم إنك تقدم برنامج سياحي محترم لكل حاجه هتعملها هناك بالتفصيل, علشان يعرف إنك فعلا رايح للسياحه فقط مش حاجه تانية. ولو رايح لمؤتمر مثلا يبقى تقدم دعوة رسمية من مؤتمر أو مكان ليه اسمه ومحترم, مش مجرد إنك تسجل اسمك في أي مؤتمر يعتبر دعوة من مؤتمر.
لو هتزور أكتر من بلد و ده أكيد هيحصل , حاول إنك تعمل البرنامج السياحي اللي هتقدمه للسفارة , في البلد اللي انت مقدم عليها فقط, يعني لو هتقدم على فرنسا وهتزور 5 دول معاها يبقى تعمل برنامجك على فرنسا فقط , لكن خليك لعيب متقدمش مثلا برنامجك إنك مسافر باريس وهتقعد أسبوعين علشان محدش هيصدقك, لازم تنوع المدن اللي هتزورها, يعني تكتب إنك هتزور مثلا كان وليون وبوردو ونيس وهكذا.
الأفضل إن تذكرتك تبقى للدولة اللي هتطلع منها الفيزا, حتى لو كنت عاوز تلف أوروبا كلها بعد كده خلال زيارتك المهم تكون هي وجهتك الأولى.
الصراحه كده, مفيش قواعد ثابتة لرفض أو قبول الفيزا, العمليه خزعبلية شوية وملهاش أي قواعد للرفض أو القبول نقدر نقيم بيها الموضوع بشكل واضح 100%, ناس عمرها ما سافرت باسبورها أبيض وحسابها فيه 5 آلاف جنيه وخدتها, و ناس كان معاها شنجن 7 مرات وفيزا أمريكا وبتاع 12 فيزا تانيين وحسابها فيه 100 ألف جنيه واترفضت, فالعمليه مش مضمونة لأي حد, المهم تعمل اللي عليك وتظبط ورقك صح.
إوعى تصدق أي شركة سياحه تقولك احنا هنطلعلك الفيزا ومضمونة والكلام ده, إلا لو بتحب يتنصب عليك, شركات السياحة بتساعدك فقط في أخذ موعد وترتيب الأوراق وتعبئة الأبليكاشن وحجز الطيران والفندق, غير كده الشركه ملهاش أي علاقة بقبول أو رفض الفيزا.
في حالة رفض السفاره للفيزا تقدر تقدم تاني يوم عادي جدا في أي سفاره ومفيش حاجة تمنعك من تقديم أبليكاشن جديد مباشرة بعد الرفض, ولكن أكيد مش حتقدم نفس الحجوزات ونفس المستندات لأنك أكيد هتترفض تاني, ولكن عن تجربة شخصية (اترفضت من سفارة إسبانيا بعدها بأسبوع قدمت في سفارة هولندا والفيزا اتقبلت عادي جدا).
في حالة رفض الفيزا من حقك تعمل استئناف خلال شهر من الرفض وبيتم تقديمه للسفارة اللي رفضتك وفي الحالة دي أوراقك بتطلع لمسؤول أعلى من اللي رفضك، وبيحدد إذا كان فعلا تستحق الفيزا أو لأ. واللينك ده حتلاقي عليه تفاصيل الرفض والاستئناف: http://bit.ly/2b8Np9n
سواء الباسبور اتختم بالرفض أو مااتختمتش فدي مش نهاية العالم, ومفيش حاجه تمنعك من التقديم مره تانية في أي سفارة و ختم الرفض مش هيأثر على فرصتك في الحصول على الفيزا لما تقدم مجددا, لأن كل أبليكاشن بيعتبر حالة خاصة و بيتم دراستها بشكل منفصل بعيدا عن أي رفض سابق.
نصيحة أخوية : لو هتسافر أوروبا يعني باريس وروما وبرشلونة والعواصم المشهورة دي خلال شهر عسل منصحكش, لأن أوروبا أغلبها مشي وزيارة متاحف ومعالم أثرية وفرهدة, وتجربة إنك تقدم على شنجن وتترفض قبل الفرح مع ترتيبات الجواز هتبقى تجربة مش لطيفة ومش هيكون في وقت تغير كل خططك مرة تانية, فالأفضل إنك تسافر دوله فيزتها سهلة أو بدون فيزا أصلا وخلي أوروبا بعدين.
أتمنى لكم التوفيق جميعا, ومتخافوش العالم مش كله أوروبا, فيه دول تانية كتير تستاهل فعلا الزيارة. ابدأ بالسهل الأول وجرب إحساس السفر والمغامرة واطمن الصعب هييجي بعدين.