بهاء فاروق يكتب رحلته لفرنسا: رحلة العمر إلى باريس بأقل التكاليف

رحلة- بهاء الدين فاروق:

حلم العمر لزيارة باريس وديزني لاند بأقل من 5000 جنيه :O (الأسعار الواردة في هذه الرحلة قبل تعويم الجنيه)، انت هتهزر؟!، لا والله حقيقي مش هزار, تصدق إن ممكن رحلة لباريس متكلفش أكتر من 5000 جنيه, شامله طيرانك وسكنك ورحلاتك وانتقالاتك وتزور كمان كل معالم باريس.

دي تجربتي لزيارة باريس دون الاعتماد على أي شركات سياحية. لابتوبك على حجرك وفيزتك في إيدك, وعيش يا معلم. لو حبيت إنك تختصر أوروبا في مدينة واحدة, أعتقد مش هتلاقي أفضل من باريس مدينة السحر والجمال والتاريخ  ♥. زيارة باريس حلم لكل محب للسفر الترحال, تجربة إنك تشوف برج إيفل لأول مرة وتزور متحف اللوفر وتمشي في شارع الشانزليزيه وتطلع الطفل اللي جواك في ديزني لاند. 3:)

حلو قوي بس برضه إزاي كل ده يتم بـ 5000 جنيه بس؟، تعالى أقولك عملت ايه 😉

أسرار السفر إلى باريس بأقل التكاليف 😀

هنتفق مبدئيًا إن بما إننا طالعين رحلة بميزانية محدودة, فهنستغنى عن شوية رفاهيات زي الفنادق الفخمة أو ركوب التكاسي والأكل في مطاعم الخمس نجوم, وممكن قوي بما إننا طالعين هدفنا الأساسي هو الفسحة فنسكن في هوستل، ونركب متروهات ونمشي كتير طحن، وآخرنا ناكل في ماكدونالدز. 😀

تذكرة السفر: طبعًا وهي الجزء الأغلى في الرحلة, لك أن تعلم أن تذكرة السفر لباريس ممكن تشتريها بسعر لا يتجاوز 2400 جنيه على الخطوط الإيطالية ذهاب وعودة إلى باريس.

السكن: طبعا زي ما تعودنا بما إننا شباب مفيش مانع نسكن في هوستل (لو كنت لوحدك أو فردين) إنما لو كنتوا 4 أفراد فالأحسن تاخدوا غرفة رباعية، وهيكون سعرها ممتاز لما تتقسم على أربعة. سعر السرير في هوستل معقول زي مثلا AIJ Paris لمدة 5 ليالي لا تزيد عن 900 جنيه وشامل الإفطار كمان, ده موقعه كويس قوي لأنه قريب من المترو كمان.

طيب باريس مدينة كبيرة قوي وفيها معالم كتير جدًا، إزاي هقدر أدخل كل المعالم دي بالسعر ده؟

أسعار المتاحف في باريس مش رخيصة, غير إنك ممكن تقف في دور لمدة ساعتين علشان تحجز تذكرة بس  :O , طيب إيه رأيك في كارت يدخلك حوالي 60 متحف ومعلم سياحي في باريس لمدة 4 أيام وكل ده بمبلغ 500 جنيه فقط. (ده طبعا لمحبي المتاحف والمزارات)، ونصيحة بما إنك في باريس متفوتش حاجة، وادخل كل حاجة J , ولكن نظم برنامج رحلتك كويس. الكارت اسمه museum pass وممكن تشتريه أون لاين من الموقع ده: http://en.parismuseumpass.com/

بس أهم معالم اللي أنصحك ماتفوتهاش بالكارت ده : متحف اللوفر, قوس النصر, متحف أورساي, قصر فرساي, كنيسة نوتردام, البانثيون، سان شيبيل، وطبعًا فيه متاحف ومعالم تانية كتير بس دول أهمهم وتقدر تدخلهم أي عدد من المرات وبدون ما تقف في أي طوابير ومجانًا بكارت museum pass.

المتاحف في باريس أقل ما يقال عليها إنها إبهار, من ساعة ما تدخل تبقى مش عارف تبص فين ولا فين, على الأرض ولا السقف ولا الحيطان ولا حتى الناس اللي ماشيين  😀 , بس أحلى متحفين هما اللوفر طبعا و اورساي (خلي بالك أغلب التماثيل عريانين ملط هههههه  >:O )

طب إيه رأيك في جولة في كل باريس لمدة يوم كامل في باص سياحي ويخليك تمر على كل المعالم السياحية وتقدر تنزل وتطلع طول اليوم بنفس التذكرة, وكمان تاخد جولة نهريه في نهر السين علشان تتفرج على معالم باريس من النهر؟!, بعد بحث طويل لقيت أرخص سعر على الشركة دي http://www.foxity.com/ وسعر الباص طول اليوم والرحلة النهرية بـ 270 جنيه بس. وطبعًا برضه تحجزها أون لاين, متنساش تتصور كتير فحت عند برج إيفل  🙂 وعند كل معلم سياحي, لأن بجد صور الرحلة دي بتكون أحلى ذكريات في المستقبل  😉

برج إيفل: لو هتطلع البرج فلازم تعرف إن البرج 3 أدوار, الدور الأول والتاني ممكن تطلعه على السلم وده يكلفك 7 يورو وتحجزه أون لاين (والاختيار ده هو الأنسب والأفضل لأحسن منظر من البرج, واتعب نفسك شوية و أطلع على السلم  😀 ) ولو انت مش غاوي بهدله تقدر تطلعه في الأسانسير ويكلفك 11 يورو, والدور التالت (قمة البرج) وده بيطلع بالأسانسير بسعر 17 يورو (وللأسف دخول البرج غير مشمول في كارت المتاحف) لكن نصيحة لو هتطلع قوس النصر (مشمول في كارت المتاحف مجانا) ملوش لزمة تطلع برج إيفل.

فيه معلومة حلوة: برج إيفل بينور الساعة 10 بالليل بالظبط والأضواء البراقة بتشتغل لمدة 5 دقائق بداية كل أول ساعة وأحلى منظر لبرج إيفل بالليل لهواة التصوير من Trocadero ودي المنطقة بين Palais de Chaillot الى Pont d’Iéna و دي أمام برج إيفل بالظبط.

الانتقالات: أحسن وسيلة انتقالات في باريس هي المترو وشبكة المترو ضخمة جدا ومغطيه تقريبًا كل مكان. نصيحة هامة: اشتري تذكرة +t ودي بتكون 10 تذاكر مترو وسعرها 10 يورو, لأن سعر التذكرة الواحده 1.8 يورو, يعني هتوفر تقريبا 8 يورو .

باريس فيها مطارين : مطارشارل ديجول, ومطار أورلي, لو هتنزل على مطار شارل ديجول أرخص وسيلة مواصلات لوسط باريس هو باص رقم 351 وده سعره 6 يورو, ولو هتنزل على مطار أورلي أنسب وسيلة لوسط باريس هو orlybus وده سعره 7,7 يورو, ومطار أورلي أقرب لباريس من شارل ديجول.

أجمل حاجه تعرف بيها معلومات وقصص عن باريس إنك تاخد جولة مع مرشد في شوارعها لمدة 3 ساعات يحكيلك فيها عن تاريخها وقصصها وأسرارها, وتصدق إنك ممكن تعمل كل ده ببلاش. كل اللي عليك تدخل على الموقع ده وتختار التاريخ اللي يناسبك وتحجز معاهم http://www.newparistours.com. دي رحلات مجانية مع مرشد سياحي متخصص في باريس, ( طبعا هما بيعتمدوا على البقشيش في آخر الرحلة و5 يورو كويس قوي كتقدير لتعب الراجل).

طبعًا رحلة باريس متكملش دون زيارة أحلى مدينه ألعاب في العالم (ديزني لاند), بجد تجربة العمر, هتحس وانت فيها إنك رجعت 20 سنه لورا, هتعيش جوه كل قصص ديزني اللي اتفرجنا عليها واحنا أطفال, ملهاش غير وصف واحد إبهار للكبار والصغار. (فيه بوست خاص عن أسرار ديزني لاند باريس على الصفحه لأن موضوعها كبير قوي وازاي تستفاد أكبر استفادة وتركب أكبر كمية ألعاب خلال زيارتك لديزني لاند). معلومة مهمة: لازم تشتري تذكرة ديزني لاند أون لاين لأن سعرها أون لاين بحوالي 650 جنيه ولكنها تستحق الصراحة, وسعرها من على البوابة 1100 جنيه  :O .

نقطة مهمة بخصوص الأكل: الأكل الصراحة غالي, وأنصحكم بالابتعاد عن المطاعم العربية لأنهم استغلاليين جدًا وغاليين على الفاضي, بالنسبه لنا كان ماكدونالدز هو الأنسب والأرخص وكان سعر الوجبة في حدود 6 يورو. وحاول دايما تشتري سناكس من السوبر ماركت وتخليها معاك في الشنطة زي البسكوتات والعصاير والشيبسي وكده. وطبعا متنساش تجرب المخبوزات الفرنسية والماكريل 😉

تنظيم خط سير الرحلة: قبل السفر لازم تنظم خط سيرك كويس جدا وتتأكد من مواعيد عمل المتاحف وأيام الإجازات لأن ممكن تروح مثلا متحف تلاقيه قافل ويضيع عليك نص اليوم في الانتقالات. الموقع ده هتلاقوا عليه أيام الإجازات لكل متاحف ومعالم باريس: http://bit.ly/17hFPVQ

ملحوظة: الأسعار الواردة بالتقرير قبل تعويم الجنيه

عودة للأشياء المجانية: لو عاوز توفر تمن كارت المتاحف وتدخل المتاحف مجانا  😉 , هقولك تعمل إيه 🙂 كل أول يوم أحد من كل شهر أغلب متاحف باريس بتكون مجانا لكل الجمهور, بس خلي بالك هتلاقي طوابير كتير, فنظم وقتك كويس وشوف عاوز تبدأ بإيه, وابدأ يومك بدري قوي وفيه كمان متاحف كتير في باريس مجانًا والموقع ده فيه كل المتاحف المجانية في باريس ومواعيد الدخول المجانية http://bit.ly/1oZs533

طبعا باريس بلد الموضة والأزياء بلد كريستيان ديور وإيف سان لوران وكوكو شانيل, بس طبعا أسعار الحاجات دي خيالية, وكفاية تتفرج عليها من بعيد وانت في الشانزليزيه, أو تزور المجمع الأشهر في باريس GALERIES LAFAYETTE, وتقدر تطلع للدور السابع فيه وتشوف منظر بانورامي رائع لباريس.

نصيحة مهمة: لو بتفكر تروح الأوت ليت La Vallée Outlet Shopping Village شيل الفكرة من راسك لأنه بعيد عن مركز باريس. هو قبل ديزني بمحطة وأسعاره غالية برضه مش رخيصة.

أحسن وقت لزيارة باريس من شهر أبريل إلى شهر نوفمبر (ماعدا شهور الصيف 7 و8 وده أسوأ وقت لزيارة باريس لأن كل حاجه بتبقى غالية جدًا وزحمة جدًا) فنصيحة متسافرش باريس في الصيف عموما.

طبعًا أفضل صديق لك في رحلة باريس هو موبايلك اللي فيه GPS وخرايطك وخرايط المترو وعيش يا معلم 😀 .

أتمنى الموضوع يكون عجبكم, وقدرت أفيدكم ولو بمعلومة بسيطة, ولو عاوز الكل يستفيد شير بقى لكل أصحابك  🙂

  • بهاء الدين فاروق، رحالة مصري وأدمن صفحة Travel Secrets