الرئيسية / تقارير مميزة / أهم 7 نصائح لاختيار فندق مناسب أثناء السفر

أهم 7 نصائح لاختيار فندق مناسب أثناء السفر

تجربة- بهاء الدين فاروق:

الفندق من أهم خطوة في السفر، والسفرية ممكن تبوظ لو طلع الفندق أي كلام، عكننه ما بعدها عكننه وميزانية الفندق بتيجي تاني ميزانية بعد تذاكر السفر، يعني بندفع فيه كتير وبالتالي بنزعل قوي لو طلع وحش، أو بنفرح قوي لو طلع جامد، تعالوا مع بعض نشوف إزاي نحجز الأوتيل وإحنا مغمضين ويكون اختيار صح.

– أولًا: الفندق لازم يتم حجزه بدري بدري يمكن أول حاجة في الرحلة لأن كل ما كان الحجز بدري كل ما كان سعره أقل لو مش واثقيين بقى أننا حناهد التأشيرة أو من المعاد نحجزه من موقع زي بوكيينج والدفع يكون عند الوصول للأوتيل حتى نعرف نلغيه من غير ما نغرم فلوس.

– ثانياً: أول خطوة إننا نشوف الفندق ده موقعه فين، لازم ننقي فندق دايمًا جنب محطة مترو أو أتوبيس وجنب يعني ميبعدش أكثر من 500 متر عن المحطة لأن ده حيفرق معانا جدا، لأن كل تحركاتنا في السفر بتكون عن طريق مواصلات عامة مش تاكسي.

– ثالثاً: حاول دايما تختار أوتيل بعيد عن السيتي سنتر إن شاء الله في أطراف البلد بس يكون جنبه مواصلات زي ما اتفقنا لأن كل ما بعدت عن السيتي سنتر كل ما سعر الفندق بيقل جدا وأنت أصلًا مسافر بتسب الفندق الصبح وبترجعه بليل فإيه المشكلة أنه بعيد طالما نوفر شوية فلوس حلويين ونختار فندق بعيد والمواصلات العامة نص ساعة ونكون في السيتي سنتر وأنتم عارفين مواصلاتهم مريحة جدًا.

– رابعاً: أي فندق لازم ندخل على موقع زي تريب أدفايزر ونتفرج على أراء النزلاء فيه إيه ونقرأ كل نقطة ونشوف إيه الحاجات المشتركة اللي الأغلبية شايفين إنها سيئة أو كله بيشكر فيها ودايما نبعد عن أي رأي لحد أول مرة يكتب تعليق على فندق في موقع تريب أدفايزر لأن ده معناه تعليقه مشكوك فيه.

– خامسا: دايما منعتمدش على صور الفندق اللي موجودة على موقعه أو على موقع بوكينج، الأفضل ندخل على موقع تريب أدفايزر ونشوف الصور اللي واخدها النزلاء بنفسهم وحاطينها.

– سادسا: نحاول دايما نوازن، إحنا عايزين إيه؟ يعني ممكن فندق مكانه تحفة ونظيف وكدة وفطاره سيء جدًا، فلو أنت أصلا من الناس اللي بتفطر بيض مسلوق وحتتين جبنه خلاص اختاره، ما أنت بتأكل أساسيات مش محتاجه حلو من سيء، وممكن فندق فطاره هايل وموقعه بعيد لو أنت أكيل وشايف أن وجبة الفطار أهم وجبة وحعيش عليها طول اليوم يبقى اختاره.

– سابعا: دايما في أي فندق لما توصل تقول للريسبشن وريني أكثر من أوضة واختار منها وما تعتمدش على اللي هو يختار لك، أنا دايما بعمل كدة وفعلا أي فندق في أوض أحسن من أوض بمعنى، في أوض أكبر من التانية أو لها بلكونة والتانية لا أو بتكون في دور علوي بعيد عن دوشة أو بتطل على شارع والمنظر حلو وحاجات كدة إن شاء الله تشوف 5 أوض وأنت حر، ولكن خليك عارف أن الغرف بردو مستويات وكل غرفة لها سعر، يعني أكيد الغرفة اللي فيها بلكونة تكون أغلى من اللي بدون، واللي بتطل على البحر أغلى من اللي بتطل على حديقة مثلًا.

و دايما افتكر المثل بتاع
“ You Get what you paid for “

شاهد أيضاً

خريطة مصر

خريطة مصر السياحية والجغرافية بالتفصيل: أهم المدن والمحافظات والمسافات بينها

خريطة مصر | الرحالة |   تعتبر مصر من الدول التي تمتلك موقعًا جغرافيًا يمثل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *