الرئيسية / أوروبا / أحمد طارق يكتب عن الطعام في هولندا: طاجن كوارع لهب

أحمد طارق يكتب عن الطعام في هولندا: طاجن كوارع لهب

رحلة- أحمد طارق

وصلت أمستردام الساعه ٢ الفجر، أعمل إيه.. أعمل ايه؟!، قلت هبات في المطار لحد الصبح وكنت كنسلت حجز الهوستل، المهم حطيت الشنطة (الجربنديه) ف الـlocker room  وخليت معايا الشنطه الكروس و نمت في المطار.

علي الساعه ٩ كده بدأت أتحرك، اشتريت التيكيت ونزلت على أمستردام، بلد لامؤاخذة العجل ، زرت معظم الأماكن السياحية زي:
-Rijksmuseum
-Anne Frank House
-Jordan
-Dam Square
-Royal Palace

المهم، قررت أتمشى في الشوارع وأتكلم مع الناس. عديت جنب شركة كده، ولقيت ناس بتشتغل شكلهم عجبني قوي  ? ، قولتلهم ممكن أصوركم؟، قالوا لي أكيد وفرحوا قوي.

المهم اتمشيت لحد ما قلت أقعد أريح شويه، ف وأنا قاعد في أمان الله أسمع الحوار الآتي :
–  آلو.. أيوه يا عمدة، الواد شوقي امبارح جالي وضربنا طاجن كوارع، إنما إيه لهب يا ولا لهب  ? ?
أنا فضلت أضحك والله و كنت عايز أقوله أخوك من مصر الله يباركلك إلحقني بطاجن أنا كمان أصل شحرت من الـfast food ?

المهم قررت أكمل مشي لقيت حاجة غريبة قوي قدام كل بيت أكياس زبالة، ف واحد هولندي لقاني بصور المنظر جري عليا، وقال لي: انت بتصور إيه؟. قلت له: هو التصوير ممنوع ولا إيه؟. قال لي: لأ بس انت ممكن تكون فاهم غلط، البيوت هنا بتخرج الزبالة يوم السبت (تقريبا) الصبح، عشان عربيات الزباله تلمها. معرفش إنت عندك كده في بلدك ولا لأ، بس أنا لقيتك بتصور خفت تنقل صورة وحشة عن بلدي ف قولت أنبهك .
رد فعلي كان  ? ? ? ، شايفين قد ايه الراجل خايف علي صورة بلده !.

طبعًا ناس كتير مستنية أتكلم عن الحشيش اللي زي اللبان هناك، بس أنا مش هتكلم  ? ?

فقرة الاستلواح

بعد لف كتير إذ بي أجد معدتي الخاوية تشتكي من صحراء جرداء خاوية من أي طعامً تهضمه، قلت لها تعالي أما ناكل، وهووووب ملقتش المحفظة  ? وكنت هموت من الجوع، المهم لقيت محل جبنه وجت في دماغي فكرة مصرية ١٠٠٪ ?
*داخل بثقة جامدة قوي* ?
–  لو سمحت عندكم جبنة حلوة زي اللي عندنا ف مصر؟  ?
الراجل استغرب جدًا، كان ناقص يقولي ده احنا بلد الجبنة يعني يا أبو الكباتن مش كده !  ?
–  قلت له أصل احنا عندنا جبنه غالية قوي في مصر اسمها ميش
– فقال لي لأ معرفهاش بس ممكن أدوقك أحسن أنواع الجبنة اللي عندنا وانتا تقرر؟
–  أخيرًا جات اللحظة اللي أنا مستنيها من زمان. ????
الراجل دوقني كل أنواع الجبن اللي عنده لحد ما شبعت قلت له
–  خلاص كفاية، واضح كده إن مفيش زي الجبنة اللي عندنا في مصر، لما تبقي تيجي هبقي أدوقهالك  ?
–  قال لي طيب استني دوق دي بس
–  قلت له لا لا خلاص  ?
وأخيرًا تم تعبئة المعده بنجاح   ? ?

 

تابعونا في الحلقات المقبلة

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *