الرئيسية / أمريكا الجنوبية / سارة منصور تروي مغامرة السفر الى امريكا الجنوبية : العمر واحد والرب واحد

سارة منصور تروي مغامرة السفر الى امريكا الجنوبية : العمر واحد والرب واحد

مغامرة السفر الى امريكا الجنوبية | الرحالة |رحلة- سارة منصور:

امريكا الجنوبية ، قارة على أرض الله، معلوماتي عنها كانت محدودة جدًا، وكان آخر صلتي بها مادة الجغرافيا في تالتة إعدادى!. قارة بعيدة عن مصر، فيها بلاد وبنى آدمين وثقافات وحضارات وطبيعة ومزيكا وحوار كبير، أنا ما كنتش أعرف عنه حاجة.

أنا عايزة أروح أكتشف العالم اللى هناك ده واكتشف نفسى، حروح فين بقى؟!، بعد دعبسة كتيرة على النت (Trip advisor, Virtual Tourist, Lonely Planet, Wiki Travel, Travel blogs ) ودراسة الخريطة والمسافات واستشارات من أصحاب عندهم خبرة سابقة، توصلت لقرار هروح فين!

مغامرة السفر الى امريكا الجنوبية

المكان: قررت إنى هروح الأرجنتين وبوليفيا وبيرو والإكوادور وكولومبيا!

الارجنتين
الارجنتين

التحويش: لازم أحوش فلوس وأجازات، بقيت أحوش مبلغ شهرى وبطلت أصرف فى هبالة أو على الـ shopping اللي ملوش لازمة!، حوشت كل أجازاتي السنوية واستغليت كمان أجازة عيد الأضحى علشان بتكون طويلة.

الفيزا : الاكوادور مش محتاجة فيزا ، و كولومبيا كمان دلوقتى مش محتاجة فيزا خلاص.(كانت بـ $130)، بوليفيا بـ $60 عند الوصول. أما الارجنتين و بيرو فمحتاجين فيزا . سهلة! ابعت ميل للسفارة علشان تعرف طلباتهم و نفذها.

الاكوادور
الاكوادور

حجز تذكرة الطيران

تذاكر الطيران : هي دى أغلى حاجة، كنت مراقبة سعر تذاكر الطيران من قبل السفر بأكثر من شهرين من على expedia. سافرت على طيران لوفتهانزا إلى بوانوس أيرس ( الارجنتين ) والعودة من بوجوتا ( عاصمة كولومبيا ). و أنا بحجز كنت فاكرة إنى حكون لوحدى على طيارة بوجوتا وإنى الوحيدة اللى اكتشفتها. سذاجة طبعا!  😀

ارخص تذاكر طيران

الإقامة: HOSTELWORLD أسهل و أرخص اختراع فى العالم! والله العظيم الـ Hostels مش “بنسيون السعادة ستايل”.  😀

بوليفيا
بوليفيا

الرحالة backpackers

التنقلات: امريكا الجنوبية فيها نظام أتوبيسات منظم جدا ومريح ومش غالى، ممكن الاعتماد عليه في السفر داخل البلد أو من بلد إلى بلد. كولومبيا عندهم طيران منخفض التكلفة Domestic budget flights تبع شركة Viva Colombia كانت منجزة و رخيصة.

مع مين: لوحدي . هو أنا لوحدى بس معظم الوقت مش لوحدى!. بلاد امريكا الجنوبية اللى زرتها Backpacker friendly وكلها سياح.

حظي كان حلو اتعرفت على ناس لطيفة من جنسيات مختلفة من الـ Hostels أو بالصدفة من المزارات. معرفش الـ backpackers بيتكعبلوا فى بعض.

و لما بكون مش طالبة بنى آدمين مش بضطر أجامل حد. أحلى حاجة إنى حرة فى تظبيط شكل يومى و مش شايلة هم مين عايز يعمل إيه وأنا مش عايزة.

بيرو
بيرو

أهلى و أصحابى اتهمونى بالجنان علشان رايحة كولومبيا و الاكوادور . البلاد دى اتغيرت مش زى زمان، وجو فيلم Romancing the stone التمانيناتى بتاع مايكل دوجلاس ده بخ مش موجود خلاص! أنا كنت حاسة بالآمان فى معظم الأوقات والحمد لله ماحصليش حاجة وحشة وماتعرضش لأى موقف خطر.

solo travel

فى بنات كتير قابلتهم مسافرين لوحدهم. أكتر جملة بسمعها “You are the first Egyptian girl I’ve ever met traveling solo“. هو أكيد طبعا في غيرى بس هو واضح إن احنا قليليين. والبنات المصرية لما بتسافر فى مجموعة غالبا مش بتتعرف على حد غير اللى هى مسافرة معاهم من الأول.

رجاء موجه إلى الآباء و الأمهات اللى كابسين على نفس بناتهم: لو سمحتموا سيبوهن! العمر واحد والرب واحد.

مغامرة السفر الى امريكا الجنوبية
مغامرة السفر الى امريكا الجنوبية

الصورة دى فى جواتابيه Guatape فى كولومبيا سبتمبر 2015.

شاهد أيضاً

مرافق الإيواء السياحي

مرافق الإيواء السياحي : آليات تسعير وتصنيف الفنادق والشقق في السعودية

مرافق الإيواء السياحي | الرحالة | يعيش قطاع الإيواء السياحي في السعودية تقدمًا كبيرًا، خاصة …