بالفيديو.. استمتع بشهر العسل في المالديف: لن تدفع أكثر من 5000 جنيه للفردين

رحلة- يارا يحيى وسامح صالح:

ناس كتيرة قوي فاكرين إن السفر لجزر المالديف حاجة شبه مستحيلة، علشان على الأقل هتكون محتاج 40،000 جنيه علشان تقضي أسبوع واحد هناك، طبعًا الكلام ده صح. بس كان لحد 5 سنين فاتوا.

دلوقتي جزر المالديف من البلاد الرائعة للسفر المستقل، يعني تقدروا دلوقتي تسافروا وتشوفوا الجنة دي، وتستمتعوا بأحلى ميه في العالم، وكل اللي تصرفوه 4,000-5,000 جنيه مصري بس، ده كل حاجة، من ضمنها البيات + أكل + Diving + مصاريف لفردين. مفيش أي حاجة هتدفعوها تاني غير تذاكر الطيران.

طب ليه الفرق الفظيع ده؟ المالديف فيها أكتر من 1200 جزيرة منهم 200 جزيرة “inhabited” يعني في ناس ساكنة عليهم، بمعنى أصح جزر محلية، ودي مكنش ينفع يزورها أي سياح، وباقي الجزر بتكون للفنادق الخمس نجوم، وأرخص ليلة في RESORT من دول بـ 300: 1000 دولار أمريكي، غير إن في RESORTS علشان توصلها لازم تاخد SEA PLANE ودي حوالي 500-600 دولار تانيين.

كمان الأسعار هناك غاليه جداً، يعني ازازة الميه الصغيرة بـ 6 دولار مثلاً، و كانت هي دي الوسيلة الوحيدة الي تقدر تسافر وتشوف فيها جنة المالديف، وتدفع دم قلبك وتبيع اللي وراك واللي أدامك وكدة 🙂

المهم، من خمس سنين ،غيرت الحكومة لوائحها وسمحت بفتح guest houses في الجزر المحلية لأول مرة, أسعار الـ Guest houses معقولة جداً بتبدأ من 20: 75 دولار, من 1-STAR لحد 4-STARS مع الفطار، العشاء بيكلف من 5-10 دولار للفرد.. أحلى كلام.

أهم 3 جزر محليين هما: Mafooushi، Guraidhoo و fulidhoo.. الأشهر والأحلى هي Mafooushi، وهي أكتر واحدة عجبتني، و مكنتش عايزة أمشي!

من المطار بتاخدو Public ferry لأي جزيرة ب 1 دولار طبعاً حسب المواعيد. الـ FERRY بتاخد حوالي ساعتين، أو ممكن تاخد الـSPEED BOAT بياخد حوالي نص ساعة وبـ 250 دولار، طبعًا فاكس، خد الـ ferry وش. 😀

لو فاكرين انكو مش هتبقو مبسوطين لما تسافروا budget travel تبقوا غلطانين، أحلى حاجة انك تسافر بميزانية صغيرة و تلف أكتر و تقابل أهل البلد و تتعلم أكتر.

أنا سافرت المالديف 10 أيام و رحت 3 جزر، و قعدت في أماكن لطيفة جداً، وعملت diving و كلفتني ٥٠٠٠ جنيه لفردين، ولو أنا قدرت يبقى إنتو كمان تقدروا، الموضوع مش صعب أصلا، إحنا بنعيش مرة واحدة بس!

شاهد الفيديو عشان تعرفوا ازاي تستمتعوا في شهر العسل بالمالديف بـ 5000 جنيه بس