الرئيسية / أوروبا / جنان عبده بـ جولة سياحية في روما : هنا دارت أحداث فيلم Gladiator
جولة سياحية في روما

جنان عبده بـ جولة سياحية في روما : هنا دارت أحداث فيلم Gladiator

جولة سياحية في روما | الرحالة | رحلة- جنان عبده:

الكولوسيوم بعظمته وضخامته وقصته التاريخية قدر إنه يحرك فيّ مشاعر كثير.

هذا المُدرّج الضخم العملاق الواقع في وسط روما في منطقة أثرية مليانة بمباني بعدها قائمة بتذكر في تاريخ روما العظيم.

جولة سياحية في روما

وصلت له من موقعي في فندقي بخط القطار الكحلي رقم B  محطتين بس كل اتجاه 1.5 يورو وكنت هناك.

أنا خططت زيارتي انها تكون يوم الأحد لأني عرفت إن أول يوم أحد من كل شهر دخوله بكون مجاني فكانت فرصة بما إني هناك وتكلفة الدخول العادية في يوم عادي هي 12 يورو لداخله.

طبعا ممكن تكتفي تشوفه من برا لكن الحقيقة بتخسر كثير ولازم تشوفه  من جوه. هذا كان اليوم الثالث في رحلة السفر الى ايطاليا

جولة سياحية في روما
جولة سياحية في روما

 

الكولوسيوم

اوصلت هناك والدور كان مش بالعشرات بل بالمئات من دون مبالغة يبدو أن كثير ناس عارفين إن دخوله بهذا اليوم مجاني.

الحقيقة انصدمت من طول الدور يعني لو بدي أقف وأنتظر ومع أني وصلت بدري كثير، راح يآخد لي ساعات تحت الشمس والحر.

منظر المدرج من الخارج رائع جدا، ضخامته فوق الوصف. الأحجار الضخمة اللي مبنى منها ذكرتني بمنظر حجارة الأهرامات العظيمة. أقواسه الجميلة والمزخرفة.

 

الكولوسيوم

جولة سياحية في الكولوسيوم

توجه لي واحد من مندوبي شركات السياحة واقترح علي أدفع 20 يورو واتخطى الدور وأكون معاه في مجموعة فيها 8 أشخاص يعملنا جولة جوا المدرج ويشرحلنا عنه والأهم إنه راح نمر الدور الطويل اللي ما بخلص.

ترددت في البداية قلت له أعطيني وقت أفكر.. مشيت شوية لقدام أشوف الدور وين بينتهي، ما لقيت آخر الدور فرجعت وقررت أدفع 20 يورو وأستفيد من الوقت داخل المدرج عشان أقدر أكمل مشواري وأشوف المنطقة كلها قبل ما أتعب لان الحر كان مش معقول.

أنا كنت نزلت برنامج الطقس ع موبايلي وكنت أشوف الحرارة يومها كانت حوالي 30 درجة.وطبعا ممنوع تدخل معاك ميه لداخل المدرج  لأسباب أمنية زي ما الحارس قال.. لكن بعدين لقيت دكان جوا بتبيع مية وتُحف سياحية وكتب وبطاقات.. سياسة اقتصادية يعني.

حضارة روما

مجموعتنا كانت صغيرة  وكانت معانا مرشدة كبيرة في العمر لطيفة وكانت بتحمل كتاب تاريخي عن تاريخ الكولسيوم – طبعا كان في دور للمجموعات المنظمة زينا- لكن الانتظار فيها بختلف تماما عن الدور للأفراد كنا ننتظر شوية ونمر.

مرينا 3 محطات تفتيش ودخلنا جوا- المرشدة كان معاها الكتاب فيها طبقات صفحات بتقلب ع بعض بتخليك تشوف الكولوسيوم في الأوقات السابقة يعني أول صفحة بتشوفه بشكله الحالي وكمان صفحة أو اكثر بتغطي على الصفحة الأولى فبتشوف كيف كان شكله يومها.

حقيقي شيء جميل وطريقة لطيفة للاستفادة من الوقت والدور، باقي المرشدين في المجموعات التانية كان معهم أعلام مرشدتنا كانت بتقول حاجة وبتسأل فهمتوا شو بتعرفوا عن هذا وهذا.. كان عندي شعور انها كانت مُدرِّسة وخاصة للتاريخ وفعلا سألتها فضحكتك وسالتني كيف عرفتي؟ قلتلها من أسلوبك.

فيلم جلادياتور

فيلم جلادياتور

دخلنا جوا.. فجأة حسيت كل التاريخ بيمر قدامي.. منظر مش طبيعي.. وفوق العادي، فوق الوصف.. الضخامة والعظمة اللي فيه.

مدرج مبني بشكل بيضوي من عدة طبقات، استغرق بناءه أكثر من عشر سنين. ساحة المدرج كانت بتستخدم حلقات قتال المصارعين – الجلادياتور- (اتعمل عليها فيلم بنفس الاسم: جلاديتور) اللي كانوا يجبروهم يتقاتلوا حتى الموت.

والمقاتلين كانوا من المسيحيين بينما الامبراطورية لسه ما دخلت المسيحية وفي مرحلة معينة كان في معارك بين الجلادياتور والحيوانات المفترسة زي الأسود ما في استسلام المعركة بتستمر حتى الموت.

وكان المدرج المبني من أربعة طبقات لكن الطبقة الأخيرة مهدومة بغالبيتها اليوم- كل طبقة لواحدة من مستويات الشعب وبيدل على النظام الطبقي اللي كان سائد. بوسع حوالي 50 الف مشارك/مشاهد.

 

السفر الى روما

الامبراطورية الرومانية

طبعا الطبقة الأولى قرب الساحة كان يقعد  فيها الامبراطور وأعضاء مجلس الشيوخ،  والتانية للحاشية الملكية والاغنياء وفوقه الثالثة عامة الشعب مواطني روما  والأخيرة كانت للعبيد والنساء لان النساء ما كانت تعتبر مواطنات.

في مرحلة معينة تم وقف هذه المعارك والكنيسة أعلنته موقع أثري ديني لذكرى السجناء اللي قتلوا هناك أثناء المصارعة، والبابا رمم المبنى وكان في إضافات لتدعيمه أيضا لانك حتى من برا بتشوف أثار الحفر الضخمة اللي المنجنيق  عملها واللي كان البرابرة بيرموها عليه وبقصفوه في مراحل سابقة من التاريخ.

جنان عبده في جولة سياحية في روما
جنان عبده في جولة سياحية في روما

نيرون مات ولم تمت روما

ضخامة هذا الصرح العظيم حقيقي بتدل على عظمة الامبراطورية الرومانية وقوة التاريخ  وأهمية الحفاظ عليها. وهو يعتبر وبحق من عجائب الدنيا. وفهمت إنه كان في تمثال برونزي ضخم في جانب من الكولوسيوم لنيرون وقت ما كان حاكم ومنه أخد تسميته وكان محتاج  عشان يوصل لهذا المكان انه يجروه 12 فيل لكن البابا أمر بهدم تمثال نيرون في مرحلة لاحقة ردا على فرض المصارعة حتى الموت على المسيحيين في عصره.

حقيقي انبهرت في المبنى في تصميمه المعماري الرائع وقصته التاريخية الحزينة اللي بتدل على رهبة التاريخ والظلم الطبقي والظلم الديني والجندري ضد النساء اللي تعرضت له الناس في عصور سابقة ومازالت بأشكال مختلفة.

من الكولسيوم طلعت للمنطقة برا عشان أكمل جولتي في الفوروم والنصب التذكاري للنصر وكل المنطقة الجميلة هناك بس عملت إستراحة غداء عشان صارت الظهر وكنت تعبت وجعت الحقيقة.

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …