fbpx
الرئيسية / تقارير مميزة / ازاي نحجز ارخص تذاكر طيران لرحلة تشمل أكثر من دولة: كن مرنًا (3: 3)
عرض جديد من مصر للطيران
زاي نحجز ارخص تذاكر طيران

ازاي نحجز ارخص تذاكر طيران لرحلة تشمل أكثر من دولة: كن مرنًا (3: 3)

ازاي نحجز ارخص تذاكر طيران | الرحالة | تجربة- بهاء فاروق:

اتكلمنا في الحلقة الأولى والثانية، عن ازاي نحجز ارخص تذاكر طيران بشكل عام، أو باستخدام موقع سكاي سكانر.

والمعروف دايما لكل اللي بيسافر إن تذكرة الطيران تعتبر التكلفة الرئيسية للسفر، بس أحيان كتير الرحالة بيسافروا أكثر من دولة، وده معناه إن الذهاب بيكون لدولة، والعودة بتكون من دولة تانية خالص، ودي في حد ذاتها مشكلة.

لأن المفروض الرحلة اللي زي دي بتترتب أساسًا على سعر التذكرة مش بالمزاج، يعني ممكن نروح 5 دول في آسيا بتذكرة ذهاب وعودة مثلا 12 ألف جنيه، وممكن بتذكرة ذهاب وعودة بـ 5 آلاف جنيه.

ازاي نحجز ارخص تذاكر طيران

في الرحلات اللي من النوع ده مهم نحدد مسارها بناء على أرخص وجهات السفر في تذاكر الذهاب والعودة.

يعني على سبيل المثال، لو انت مسافر رحلة لآسيا تشمل إندونيسيا، ماليزيا، تايلاند، لاوس وكمبوديا، مش شرط نقول إن نبدأ من الجنوب للشمال ونبدأ الرحلة ذهاب إندونيسيا، والعودة من كمبوديا لأن ده ممكن يخلينا نجيب تذكرة غالية جدًا.

في حين إن ممكن نجيب تذكرة أرخص لو كان فكرة بداية الرحلة ونهايتها مرنة ونقدر نعدل فيها، أو إننا بنكون عايزين نعرف منين نبدأ ومن فين ننهي الرحلة.

تحديد مسار الرحلة

عشان نعمل اللي بنقوله ده في 3 أدوات بنستخدمهم لتحديد مسار الرحلة وللحصول على أرخص تذكرة طيران، وهمNearby airports  (المطارات القريبة)، Multiple destinations (وجهات متعددة)، و Flexible dates (التواريخ المرنة).

طيب إزاي نستخدم التلات أدوات دول؟.

في رأيي أفضل موقع نقدر نستخدمه عشان نحدد مسار رحلتنا المتعددة الوجهات، واختيار الوجهة الأرخص في الذهاب والعودة، وهو موقع ITA Software Matrix by Google (https://matrix.itasoftware.com).

نبدأ منين

نرجع بقى تاني للرحلة اللي احنا بنحضر لها، رحلة جنوب آسيا، اللي بتشمل 5 دول، لما ندخل على الموقع، أول حاجة هنختارها Multi city، وفي الـ Departing from هنحط مثلًا Cairo وهنا نبدأ نستخدم أول أداة من الأدوات التلاتة اللي اتكلمنا عنهم، وهي Nearby airports.

هنختارها ونبدأ نزود المساحة عشان تغطي مثلًا 500 ميل، وبكده نكون ضمننا نجيب كل المطارات في مصر تقريبًا، وكمان نصفي أكتر ونختار المطارات اللي في مصر بس، وبكده يبقى ضمننا نجيب المطار الأرخص اللي نقدر نطلع منه من مصر.

ننهي الرحلة منين

في خانة الـ Destination بقى اللي هي وجهة السفر، هنختار مدينة، ولتكن مثلًا كوالالمبور، وهنا بقى نستخدم الأداة التانية اللي هي  Multiple destinations، وده اللي احنا عايزينه، إن نشوف الوجهة الأفضل من بين وجهات متعددة.

وعشان نعمل ده، برضه نختار Nearby ونزود مساحة التغطية إلى مثلًا 1000 ميل، عشان يجيب لنا أرخص مدن ومطارات ممكن نرجع منها، وممكن هنا نحدد الدول اللي هنزورها عشان منتوهش بين المطارات والمدن، وفي العودة هنستخدم نفس الطريقة معكوسة.

بكده نكون قدرنا نحدد أفضل مدينة ومطار للذهاب والعودة، بس مهم نقول إن ممكن يوم واحد زيادة أو أقل في تاريخ السفر، يوفر معانا أو يزود علينا 1000 جنيه أو أكثر أو أقل.

تحديد الأيام

عشان كده بنستخدم الأداة الثالثة، اللي هي Flexible dates، يعني نشوف تواريخ مرنة، وبالتالي نقدر نختار +/- 3 days أو أكثر أو أقل، يعني يشوف لنا تاريخ سفر قبل أو بعد التاريخ المحدد، وبالتالي نقدر نشوف ازاي نحجز ارخص تذاكر طيران في أي تاريخ.

بكده تكون قدرت تحدد مسار رحلتك، وعرفت تجيب ارخص تذاكر طيران لأرخص مدينة ومطار في الذهاب والعودة، أما بالنسبة للحجز فموقع ITA MATRIX مش بيعمل الخدمة دي، وبالتالي تقدر من عليه تدخل للمواقع اللي ظاهر لك عروض الأسعار بتاعها، وتحجز من عليه.. ورحلة سعيدة.

اقرأ أيضًا:

ارخص تذاكر طيران : تعلم كيف تحصل عليها في 10 نقاط (1: 3)

ازاي تجيب ارخص تذاكر طيران : دليلك للحجز على سكاي سكانر (2: 3)

ازاي نحجز ارخص تذاكر طيران لرحلة تشمل أكثر من دولة: كن مرنًا (3: 3)

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …