احترس من طيران الاتحاد: 10 أسباب تجعلك تفضل الحجز في أي شركة أخرى

كتب- أحمد بلال:
شركة طيران الاتحاد الإماراتية، شركة كبيرة صحيح، وممكن تتصنف من أفضل الشركات كمان، بس احنا كمجتمع رحالة بنعتمد في الأساس على خبرات بعضنا، عشان منقعش في نفس الأخطاء، والحقيقة إن تجربتي مع طيران الاتحاد كانت سيئة جدًا، وأسوأ مما كنت أتخيل إنها تكون في أي شركة طيران شارتر مش طيران كبير زي ده.
برتب لرحلة لعدد من الدول الآسيوية، هتتابعوها معانا على الرحالة، قررت أجرب طيران الاتحاد لكن للأسف كانت أسوأ تجربة في حياتي فيما يتعلق بشركات الطيران، اللي حصل أنا لخصته في الـ 10 نقط الجايين، اللي منهم أقدر أقولك بكل صراحة، لما تقرر تسافر إوعى تختار طيران الاتحاد.

1- لما حاولت أعدل التذكرة من على الموقع زي أي شركة محترمة جات لي رسالة إني أتصل بالشركة عشان أعدل بالتليفون.
2- لما حاولت أتصل أكتر من مرة بالشركة، واختار التعديل تيجي لي رسالة إلكترونية تطلب مني أعدل الحجز من على الموقع!.
3- تحاول توصل للموظف اللي ممكن يرد عليك ع التليفون عشان تعدل تحس نفسك داخل مغارة علي بابا، مفيش أي خيار يوديك لموظف خدمة العملاء.
4- حاولت أتصل على التليفونات الأرضية بتاع مكتب القاهرة مفيش ولا تليفون بيرد!. :\
5- المهم قلت أبعت إيميل لمكتب طيران الاتحاد في القاهرة، قلتلهم فيه إني بحاول أعدل ع الموقع يقولي عدل بالتليفون، وأحاول أعدل بالتليفون يقولي عدل من ع الموقع، فلو سمحتوا عايز أعدل التذكرة بالإيميل، المهم جالي الرد العبقري موقع من الأستاذ أحمد غنيم من طيران الاتحاد، بيشكرني إني بعت الإيميل، وبيطلب مني أتصل بالكول سنتر اللي اتصلت بيه مليون مرة، وكده الدايرة كملت وكل واحد بيرميك ع التاني وفي نفس الوقت لسه مفيش حد اهتم يشوف ايه مشكلة العميل!.
6- اتصلت مرة أخرى وأدخلت الرقم الداخلي المذكور في الإيميل ولكن دون أي جدوى ولا اهتمام ولا رد.
7- محاولات عديدة للتغيير على الموقع دون جدوى، ومحاولات أخرى للتعديل عبر التليفون، وتجربة كافة الخيارات لمحاولة الوصول إلى موظف للحديث معه بدلًا من الرسائل المسجلة على الكمبيوتر، وأخيرا وصلت لموظف، طلب مني الانتظار وانتظرت نصف ساعة ثم أغلق الخط.
8- حاولت الاتصال عدة مرات إما دون رد أو انتظار يصل إلى 40 دقيقة، حتى استطعت تعديل التذكرة ودفعت الغرامة المطلوبة، بس هنا مهم أقولك إنك لازم تشحن كارت بـ 100 جنيه ولا حاجة لما تحجز على طيران الاتحاد عشان لما حضرات موظفي خدمة العملاء يردوا عليك هتضطر تخلص عليهم الرصيد لأنهم بيرموك ع الانتظار.
9- المهم بعد أسبوع كان عندي مشكلة ف ورق تأشيرة، وفي يوم فرق، ومحتاج أغير التذكرة مرة تانية ولو يوم واحد، وطبعًا قعدت حوالي 3 أيام عشان أي موظف يحترم العميل اللي بيكلمه ويكمل معاه المكالمة لحد ما ينهي العملية، دون جدوى.
10- النهارده، حاولت مرة تانية عشان أغير، وضيعت من وقتي ع الأقل 3 ساعات دون مبالغة في أكتر من مكالمة ومرمي ع الانتظار، الأهم بقى إن في المكالمات دي 3 مكالمات كاشفة، الأولى طلبوا 50 دولار للتعديل، وبعدين اترميت ع الانتظار وفصلوا الخط، المرة التانية طلبوا 1526 جنيه وبرضه رموني ع الخط وفصلوا، المرة التالتة طلبوا مني 2830 جنيه لتعديل تذكرة الذهاب فقط، بدعوى إنه التذكرة سعرها بيزيد، أقولهم طب ذنبي ايه انكم متكملوش معايا العملية وتقفلوا الخط مفيش رد، عيب انتم مش شركة صغيرة، برضه مفيش رد.. المهم وعدتهم إن الموضوع مش هيقف لحد عندي، وإن الكل لازم يعرف ازاي طيران الاتحاد بيتعامل مع عملائه.
شير لأن الشركات لازم تعرف إنها من غير عملاء مش هيكون لا ليها اسم ولا كيان ولا حتى هتستمر، احنا بندفع مقابل الخدمة وبزيادة يبقى ناخد الخدمة صح ده حق ومش هنفرط فيه.

14670908_1020743961384812_4124070495402813431_n