الرئيسية / رحالة / أحمد بلال / ارخص تذاكر طيران : تعلم كيف تحصل عليها في 10 نقاط (1: 3)
ارخص تذاكر طيران

ارخص تذاكر طيران : تعلم كيف تحصل عليها في 10 نقاط (1: 3)

ارخص تذاكر طيران | الرحالة |تجربة- بهاء فاروق:

أكبر مشكلة بتواجه الشخص اللي عايز يسافر هي تذكرة الطيران، لأنها تقريبًا بتكون أغلى حاجة في الرحلة، خاصة لو رحلتك قصيرة، يعني كونك تعرف تحجز رحلة طيران رخيصة، فده يخليك توفر في الفلوس وتقدر تقضي وقت أطول وتشوف الدنيا أكتر في سفرك.

الموضوع واحد من 3 موضوعات هنعرفك من خلالهم ازاي تحجز ارخص تذاكر طيران ، وكمان واحد من سلسلة موضوعات هتعلمك ازاي تسافر بأقل تكلفة ممكنة.

 

ارخص تذاكر طيران

1- لازم تكون محضر لسفرك من بدري، لأن أسعار التذاكر بتتغير بشكل كبير، والشركات عادة بتطرح التذاكر الأرخص في البداية، وبعدين لما تخلص بتنتقل تلقائي للسعر الأعلى، وده راجع لإن حتى مقاعد الدرجة السياحية بتكون فئات.

يمكن مش بنحسها، واحنا مسافرين في الخدمات، بس ممكن تحسها لو جيت مثلًا ترجع التذكرة، أو تغير تاريخها، فالأفضل انك تحجز تذكرتك قبل سفرك بـ 3 شهور مثلًا، عشان تضمن تجيب سعر أرخص.
2- في نوعين من شركات الطيران، النوع الأول هو الشركات الوطنية، زي مصر للطيران والإماراتية والإيطالية وغيرهم، وده نوع بيديك خدمات كتير تقدر تستغنى عنها، زي وجبة الطيارة، زي الوزن إلخ، والنوع ده دايمًا سعره بيكون أعلى.

وفي نوع تاني اسمه طيران منخفض التكلفة، وده بيكون ملك لشركات خاصة، زي النيل، ناس، وإير آسيا، والنوع ده بيكون أرخص، لأن خدماته مش بتكون بالشكل اللي ع الطيران الوطني، بس خدمات تقدر تستغنى عنها لأنها كماليات مش أمور ضرورية، زي ما قلنا برضه الوجبة والوزن، وبالتالي حاول قدر الإمكان تدور على الطيران المنخفض التكلفة وتحجز عليه.

 

طيران منخفض التكلفة

3- لو هتسافر ع الطيران المنخفض التكلفة، فاعرف إن أي كماليات محتاجها بفلوس، زي الوجبة، والوزن مسموح ليك فقط بشنطة وزنها 7 كيلو جرام، لو في وزن زيادة فانت بتحاسب عليه، والرحالة عامة مش محتاجين أكثر من كده، شنطتك والكرسي.
4- عشان تحجز ارخص تذاكر طيران حاول دايمًا تدور على الرحلات اللي فيها ترانزيت، يعني محطة توقف واحدة أو اتنين قبل ما توصل لوجهتك النهائية، لأنها بتكون أرخص من الطيران المباشر، يعني ممكن تلاقي فرق التذكرة 1000 أو 2000 جنيه.

 

الترانزيت

5- لو مسافر في رحلة طويلة، ومفيش طيران منخفض التكلفة، شوف الطيران اللي بيعمل ترانزيت في بلده، اللي بتكون عادة في طريقه لوجهتك، لأن الطيران الأجنبي لما بينزل ترانزيت في أي دولة أخرى بيدفع تمن الترانزيت للمطار اللي نازل فيه، وده بيزود في سعر التذكرة.
6- عشان تلاقي ارخص تذاكر طيران حاول تختار وقت سفرك بعيد شويه عن المناسبات في الدولة اللي انت رايحها، زي العطلات الرسمية، والأعياد، والمعارض، لأن التذاكر في الفترة دي بتكون أغلى.

يعني مثلًا لو رايح الصين، حاول تشوف وقت تاني غير وقت معرض كانتون، ولو اضطريت تروح في الوقت ده، حاول تكون وجهتك مدينة أخرى غير مدينة جوانزو اللي بيتعمل فيها المعرض.

 

التوقيت

7- كمان حاول تحجز طيارتك في نص الأسبوع، بلاش تحجز في أيام عطلة نهاية الأسبوع، لأنها عادة بتكون أغلى.
8- برضه فيما يتعلق بالتوقيت، حاول تحجز في الرحلات اللي بتطلع بالليل متأخر أو الصبح بدري، لأن دي بتكون ارخص تذاكر طيران ، ولأن رحلات منتصف اليوم بتكون أغلى.
9- دايمًا حاول تحجز ذهاب وعودة، لأن التذكرة الذهاب فقط بتكون أغلى من الذهاب والعودة، حتى لو انت مسافر بلد وراجع من بلد تانية، ودي هنوضحها في موضوع مستقل، ازاي نشوف أرخص محطة للذهاب والعودة في حال سفرك لأكثر من دولة.

 

عروض سياحية

10- لازم تتابع شركات الطيران بشكل مستمر، لأن أغلبها بينزل عروض، تقدر تستفيد بيها وانت بتحجز تذكرتك.
دي أهم 10 نصائح وانت بتحجز تذكرتك بشكل عام، عشان تعرف تجيب ارخص تذاكر طيران في الموضوعين المقبلين، ازاي تحجز تذكرتك بنفسك من على الإنترنت، وازاي تقارن بين خطوط الطيران المختلفة وأسعارها، وكمان ازاي تحدد محطات سفرك وعودتك عشان تضمن أرخص سعر للتذكرة، لو مسافر أكتر من دولة.

اقرأ أيضًا:

ارخص تذاكر طيران : تعلم كيف تحصل عليها في 10 نقاط (1: 3)

ازاي تجيب ارخص تذاكر طيران : دليلك للحجز على سكاي سكانر (2: 3)

ازاي نحجز ارخص تذاكر طيران لرحلة تشمل أكثر من دولة: كن مرنًا (3: 3)

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …