الرئيسية / آسيا / أهم 10 نصائح قبل السفر الى الهند : لا تنسى الأنتينال ولا تسافر مع Aiesec
أهم 10 نصائح قبل السفر الى الهند
أهم 10 نصائح قبل السفر الى الهند

أهم 10 نصائح قبل السفر الى الهند : لا تنسى الأنتينال ولا تسافر مع Aiesec

أهم 10 نصائح قبل السفر الى الهند | الرحالة | رحلة- عبد الرحمن عوض الله:
لما نيجي نتكلم عن السفر، لازم كمان نتكلم عن المخاطر اللي فيه. لأن معظم الناس بتتكلم عن السفر بطريقة يالا خد الشنطة وروح واعمل وبلا وبلا، والناس بتسخن من الكلام، بس الحقيقة في خبرات لازم تتنقل والناس لازم تعرفها قبل ما تسافر.

أهم 10 نصائح قبل السفر الى الهند

هتكلم عن الهند عشان دي آخر بلد كنت فيها، وقعدت هناك 3 شهور، وناس كتير بتروح هناك وبتلبس في حيطة، سواء بسبب صدمة ثقافية، أو طبيعه الشعب أو سوء تنظيم الرحلة، أو حاجات كتير ممكن تقابل الناس في سفرهم بس محدش بيتكلم عنها، عشان كده في شوية نصائح من واقع خبرتي في السفر وفي الهند.. أهم 10 نصائح قبل السفر الى الهند

خطوط الطيران

1- لو حاجز علي خطوط جوية مختلفه وانت رايح من دولة لدولة، وواحدة منهم تأخرت، هل هتدفع ولا من حقك إنها تدفع لك تعويض وازاي؟، لازم تكون عارف ده قبل ما تسافر، لأن في ناس كتير بيكونوا أصدقاء لأصدقائي بيكلموني على إن فلان متسوح في الهند مثلًا، فأنا وبنتين اتعرفت عليهم هناك، بنساعد أي حد في آسيا سواء بنوصله بحد من أهل البلد، أو بنقوله على أقرب أماكن كويسة ورخيصة.

السفر الى الهند

2- السفر في الهند من مكان لمكان صعب، واختياراته كتيرة، لأن مثلًا من دلهي لمومباي حوالي 30 ساعة بالقطار، ومن دلهي لكشمير زيهم، فالمسافات رهيبة ولازم تكون محدد خياراتك، ووقتك، والانتقالات في الهند ممكن نعمل لها بوست لوحدها.

السياحة في الهند

3- حاول تكتشف الهند، لأن في مدن واخدة صيت كبير على الفاضي، ومع ذلك في أماكن ممكن تكون قريبة منها وأجمل منها بكتير، فانت لازم تكون محدد الأماكن اللي هتروحها بناء على ايه، وده كمان هيكون له بوست خاص.
4- مهم جدًا إنك تعرف حد بخط سيرك طول الرحلة، وبآخر نقطة وصلت لها، وده مهم جدًا فوق ما تتخيل وخاصة في آسيا، هي صحيح أمان وملونة، وسياحة الصبح، لكن بالليل مش لطيفة، وبالذات لو في هوستل مش قد كده.

في مرة أصدقائي وقفوا في زحام وهم في طريقهم لكشمير، أكثر من 10 ساعات، قلقت عليهم ومش عارف حصلهم ايه، فلازم يكون في حد عارف من هنا عشان يعرف يتابع.

طيران منخفض التكلفة

5- كل حاجه تقريباً موجودة في آسيا، استمتعوا، واللي يروح بلاش بلد واحدة ويرجع. من الهند لفيتنام التذكرة ف متوسط 70 دولار اتجاة واحد، فممكن تروح من دولة وترجع من التانية، واتكلموا واتعرفوا علي ناس، أنا رحت معايا مصري وراجع معايا 18 جنسية تانية.
6- في الهند آخرهم الساعة 9 أو 10 بالليل، وبعدين البلد بتقفل إلا night clubs بتستمر لحد 1 صباحًا، ودي واحدة من أهم 10 نصائح قبل السفر الى الهند 

السفر مع Aiesec

7- الناس اللي بتروح شغل هناك سواء مع منظمات زى Aiesec، لازم تتأكد من الأماكن والإقامة اللي رايحينها، عشان أحيان كتيرة بيكدبوا، يعني ميروحش على إقامة غير لما يصورهالو.

أنا قعدتت بسبب الموضوع ده في الشارع 4 أيام، وكان في مشاكل مع الشرطة، اتبعتلي إقامه 5 نجوم رحت لقيت كنبتين وحنفيه مياه و حمام مشترك مع هنود، وفي بنت أعرفها راحت يوم الأربعاء رجعت في طيارة الجمعة.
8- موضوع الأكل مهم جدًا، يفضل وانت رايح حتي لو سياحه أسبوعين تاخد معاك شوية أكل خفيف من هنا، معلبات ولا حاجة، لأن هناك الأكل مختلف تماماً، وبرده كان معايا ناس كتير تعبت بسبب الموضوع ده، وأدوية زي استروبتكين وأنتينال للمعدة دول أساسي.
9- بلاش تاخد الشنطة المربعة اللي بعجل دي. أول ما وصلت الهند، وقعدت أسبوعين وسبت الشغل رميتها وجبت هاكينج باج، بمعني أصح انت رايح تتفسح مش رايح شقتكو، وواخد نص دولابك.

التسوق في الهند

10- الفصال في الهند أكتر من مصر، في مرة كنا في السوق، وكان معايا صديقة أوكرانية وروسية، و2 من هولندا، اشتروا شوية حاجات، اللي بـ 800 روبية واللي بـ 1500 وأرقام كده

المهم لمحت بسم الله متعلقة على الحيطة، قلت لهم اطلعوا بره، وأنا هحاسبه، وأحاسبكم بعدين. دخلت قلت له أخوك من مصر أم الدنيا وانت هندي وأنا مصري واسمي عبرحمان ومسلمين زي بعض و لسه مخلصين رمضان، وكل سنة وانت طيب و زن زن زن زن، جبت البنطلون أبو 800 للبنت بـ 150، والراجل عزمنا بالليل على شاي. 😀

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …