fbpx
الرئيسية / تقارير مميزة / 15 سبب للانبهار أثناء السفر: تنتهي عند موظف الجوازات بمطار القاهرة

15 سبب للانبهار أثناء السفر: تنتهي عند موظف الجوازات بمطار القاهرة

نشرت صفحة “كابل ترافيل” 15 سببًا تدفعك للانبهار أثناء السفر، من وجهة نظر مؤسسي الصفحة، الذين كتبوا: “وانت خارج من بيتك عشان تسافر، وبمجرد ما بيقرب ميعاد الطيارة، ماكينة الانبهار بتشتغل. الواحد بيلاقي عنده استعداد جبار للانبهار”.

وأضافت الصفحة: “طب و بيبقى عامل ازاي ده؟!، عينين مبحلقة، فم لا يكل ولا يمل من الابتسام، قشعريرة في البدن.. إلخ.. يعني هي الدنيا مبهرة قوي كده بره؟.. آه مبهرة قوي كده، ده غير إن أي حاجة عادية بتشوفها برضه مبهرة، حاجة كده زي حزلقوم ستايل.. طب انبهارات كده زي إيه؟.

* تعامل موظفين المطار معاك وابتسامتهم وترحيبهم بيك، مع إن ده العادي، بس مش عندنا.

* الهوا النضيف المنعش اللي بيملا جسمك، ده بقى لا يمكن تلاقيه عندنا.

* الالتزام القوي بإشارات المرور، خاصة في باريس.

* مفيش حاجه اسمها عمالة زايدة، أو واحد بيشتغل ومالوش لازمة، كل حاجه بتستخدم فيها التكنولوجيا وساعد نفسك بنفسك. احنا كنا أصلا بندور على الناس اللي بتشتغل ومش لاقينهم. محطات المترو مفيهاش موظفين، حاجه كده قد هايبر وفيها موظف أمن واحد و٣ كاشير بس.

* إزازة الكوكاكولا في إيطاليا فيها كمية صودا تكفي كل مصانع الكوكاكولا في مصر.

* النضافة طبعًا في كل حاجة وكل حتة.

* المواصلات العامة كلها رائعة زي المترو والأتوبيس وغيره.

* الناس في باريس بيلمعوا، كلهم معديين على مراكز تجميل قبل ما ينزلوا الصبح، شياكة ونضافة واهتمام.

* عدد الكلاب اللي ماشيه في الشارع في برشلونة نفس عدد الناس، والكلاب كلها بتروح للكوافير.

* المترو في برشلونة بيوصل بالثانية وبيبقى في شاشة بتقولك هيوصل امتى.

* كل الناس اللي في برشلونة بيمارسوا الرياضة في الشارع طول اليوم.

* كل منطقه أو حي في جواها منطقه كبيره مفتوحه لممارسة الرياضة بأنواعها.

* في التزام جبار بالطوابير، الناس تقريبا في أوروبا بيعبدوا الطابور.

* الشوارع ضيقة جدًا، بس مفيش حاجة اسمها زحمة.

* في باعة جائلين وناس فارشة في الشارع زي عندنا، بس كلهم منزوع منهم التناحة والغتاتة.

طبعا كل يوم بيعدي عليك معدل انبهارك بيقل، بتبقى اتعودت وكده يعني، بس الحمد لله أول ما بترجع مصر بتتصدم، والحلم بيخلص وبتصفر عداد الانبهار، وبتستنى السفرية اللي بعدها عشان تشغل ماكينة الانبهار من جديد.

شاهد أيضاً

الرحالة ابن بطوطة

الرحالة ابن بطوطة : معلومات عن حياة ورحلات أهم رحالة عربي مغربي

الرحالة ابن بطوطة | الرحالة | يعتبر الرحالة ابن بطوطة من أبرز الشخصيات التاريخية التي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *