fbpx
الرئيسية / الشنجن / 10 نصائح للحصول على تاشيرة شنجن : بلاش وضعية هاني شاكر في الصور
10 نصائح للحصول على تاشيرة شنجن

10 نصائح للحصول على تاشيرة شنجن : بلاش وضعية هاني شاكر في الصور

10 نصائح للحصول على تاشيرة شنجن | الرحالة | تجربة- هايدي سهدي:

هنتكلم في الموضوع ده عن السفر لأوروبا، وتحديدًت تحضير الأوراق المطلوبة لفيزا الشنجن، لأنها أصعب التأشيرات، أو بمعنى أصح أكثر نوع فيزا بيطلب ورق، يمكن باقي التأشيرات أبسط منها، وممكن نتكلم عنهم في بوست منفصل. في 10 نصائح للحصول على تاشيرة شنجن هنعرفك إزاي تقدر تاخد تأشيرة الشنجن اللي بتسمح لك بدخول كافة دول الاتحاد الأوروبي.

10 نصائح للحصول على تاشيرة شنجن

١- الأبليكاشن Application

فى حاله لو حجزت ميعاد السفاره مع فودافون هيبعتولك الورق المطلوب، ضمن الورق ده هيكون الأبليكايشن اللى تملاه ببياناتك عشان تقدمه يوم المقابلة فى السفارة، أو لو اتعاملت مباشرة مع السفاره برضه هيبعتولك الأبليكايشن ده مع الورق، أو أبسط حاجه بتعمله download مباشرة من موقع السفارة وده بيكون مجانى فى كل الحالات.

 

٢- حجز مبدئى للفندق أو الهوستيل

و ده بتعمله من موقع booking.com وتختار التاريخ أو الفتره اللي هتقعدها هناك، بحيث تكون مطابقة طبعا لتذكرة الطيران والتاريخ اللى انت كاتب إنك مسافر فيه فى الأبليكاشن.

بتختار إقامه (فندق أو هوستيل)، فيها إمكانية الإلغاء المجانى green cancelation بس لاااازم تاخد بالك: إلغاء مجانى قبل تاريخ كذا، مثلًا: Free cancelation “Till” 25 july 2016، عشان بعد التاريخ ده لو لغيت الحجز هيخصموا من الكارت اللى انت حاجز به سعر أول ليلة.

طبعا مش شرط خالص إن الفندق ده هو اللى هنقعد فيه فعلاً، لسه هنتكلم عن إزاى نختار الإقامه المناسبة سواء فندق أو هوستيل.

 

٣- تذكره طيران مبدئية

محدش أبداً يحجز تذاكر طيران (حجز مؤكد) قبل ما يضمن الفيزا، إلا فى حالة لو لقى تذكرة سعرها كويس جداااا وكمان شروط الغائها ممتازة. بمعنى مثلا إنه يخسر ٢٥٠ جنيه كحد أقصى، و بصراحه مش بنصح خالص بكده.

فى كذا طريقه عشان تجيب الحجز المبدئى للطيران:

ممكن من أى شركة سياحة، لو هتشترى منهم مثلاً وثيقه التأمين إذا لقيت سعرها كويس عندهم ممكن تطلب منهم يطبعولك تذكره الطيران دى مقابل زياده مثلا ٣٠ أو ٤٠ جنيه بالكتير.. متزودش عن كده مش مستهله.

أو فى مواقع حجز خطوط طيران بيكون فيها خاصيه pay later زى مثلاً الطيران التركى، كأنك بتحجز التذكرة وبتفضل بتاعتك لمده ٢٤ ساعة، انت بس محتاج دقيقتين، تطبع التذكرة وشكراً جدًا، بقى معاك كده حجوزات مبدئية فندق و طيران.

10 نصائح للحصول على تاشيرة شنجن

٤- خطاب من جهة العمل HR letter

ده فى رأى أهم ورقه فى كل أوراق السفارة، جواب من جهه العمل اللى انت بتشتغل فيها، بيقول انك بتشتغل فى المكان الفلانى من تاريخ كذا ولغايه دلوقتى، فى المنصب الفلانى، و مرتبك كذا. وفى كمان بعض السفارات ممكن تطلب منك ورقه الإجازه بتاعتك أو ممكن بدلها تضيف بس فى جواب جهة العمل ملحوظة إن الشخص الفلانى ناوى يسافر البلد الفلانيه فى الفتره من كذا لكذا، و دى عشان يضمنوا إن عندك فى الشغل عارفين إنك خالع وراجع تانى بالسلامة إن شاء الله، ودى أهم نقطه فى الحياه عندهم، إنك راجع بالسلامه تانى،  إن شاء الله هبقى أنزلكم على الموقع مثال لصيغة خطاب العمل عشان بيطلب منى كتير قوى.

 

٥- كشف حساب البنك

و ده بقى اللول الكبير، أكتر إشاعات وفتى وتأليف بتطلع على الورقة الغلبانة دى. أولًا مش بكتر الرصيد يا جدعان، ياما ناس اترفضوا عشان رصيدهم كبير أساساً!. لازم الدنيا تكون منسقة ومنطقية، يعنى ميجيش واحد بقاله سنه بيشتغل وحاطط لى ٢٠٠ ألف جنيه مثلا، خلى رصيدك متفق مع موقفك ومنصبك الله يكرمكم.

و من اهم 10 نصائح للحصول على تاشيرة شنجن زى ما بقالى مليون سنه بقول: حوش فلوس السفر فى البنك، هيكون عليه حركه سحب و إيداع و دى أهم نقطة إنه شغال، و تيجى فى الآخر معاك ٦٠٠٠ ولا ٧٠٠٠ جنيه رضا قوي، اطبع كشف الحساب و هو فيه الرصيد ده. تاخد الفيزا، تسحبهم و تصرف منهم بقى على السفر، حلو؟.

فى سفارات بيطلبوا آخر ٣ شهور وفى بيطلبوا آخر ٦ شهور، كشف الحساب يكون موجه للسفارة و بالإنجليزي، تبلغ موظف البنك بالكلام ده، و تراجعه كويس بعده.

 

٦- وثيقه التأمين

بتشتريها من أي شركه تأمين أو شركة سياحة، و بيكون مكتوب عليها سعرها ومطبوع، طبعاً شركات السياحه لازم هيبيعوها أغلى من سعرها، وفي الحالة دى زى ما قلنا ممكن لو مزودين فى سعرها تاخد انت بيه بقى الحجوزات المبدئية بتاعه الطيران والفندق.

طبعاً بتجيلى ناس تقولى انتى بتسافرى ازاى؟؟! ده التأمين لوحده بـ ٣٠ ألف جنيه مثلاً!.. بلح! بلح!، يا جماعه فى فرق بين رقمين، الأول قيمة الوثيقة: و ده الرقم اللى الوثيقة بتغطيه، يعنى مسموح لك تتعالج بقيمه ٣٠٠٠٠ جنيه، والثاني سعر الوثيقة: و ده بيكون مكتوب ومطبوع زى ما قلنا وده بيكون حسب عدد الأيام، يعنى مثلاً الأسبوع ممكن يعمل ٨٠ جنيه، ممكن الشهر يعمل ١٢٠ جنيه وهكذا.

10 نصائح للحصول على تاشيرة شنجن

٧- صور شخصية:

بيكون مكتوب فى الورق المطلوب مواصفات الصورة، وفى كمان استوديوهات عندهم المعلومات دى، الشروط بتكون عن حجم الصورة، نسبة الوجه قد ايه من الصورة، و طبعا الخلفيه تكون لونها أبيض.

نسبه الوش من الصوره يعنى لو الصورة ٤*٦ مثلا، تكون كلها الوش مش مبينه مثلا انت لابس جزمه لونها إيه، عشان يشوفوا ملامحك كويس، مش لازم خااالص تكون مكشر، المهم متكونش عاوج رأسك ولا واخد وضعية هانى شاكر أو أى فنان تاني، افرد ضهرك بس و اقعد عدل كده و رقبتك لقدام وانت هتبقى زى الفل ان شاء الله، أنا عمرى ما بلمت فى ولا صوره على فكرة.

 

٨- شهادة التحركات:

الجهه الى بتطلبها هي سفارة الدولة اللي انت عاوز تزورها، والسبب هو لو أول مرة تطلع فيزا شنجن، أما الرسوم فالمتوسط بيكون 10 جنيه، وبتختلف على حسب السفارة الموجه لها الطلب.

الشهادة بتطلع من مجمع التحرير، هتروح هناك، هتطلع الدور الثالث، تشتري الاستمارة اللي موجهة للسفارة اللي انت عايزها، وسعرها حسب السفارة بس متوسط سعرها 10 جنيه غير الدمغات و السلطات و البابا غنوج، بتطلع تقريبا فى أسبوع، بس لازم تراجعها كويس عشان عادى جداً إن يطلعوا فيها غلطات.

 

٩- تصريح الأمن الوطني:

الجهة اللي بتطلبه هي المطار في مصر، أما السبب فهو لو مش مكتوب في الباسبور مؤهل عالي أو وظيفة، وبتكون مطلوبة لو انت مسافر معظم الدول اللي بندخلها بدون تأشيرة، أو لو دول فيها توتر في الأوضاع الأمنية مثلًا، ومكتوب قائمة بالدول دي في مجمع التحرير، اللي بيطلع منه التصريح.

10 نصائح للحصول على تاشيرة شنجن

١٠- إذن السفر:

الجهة اللي بتطلبه هي المطار في مصر، والسبب إن ميكونش معاك إعفاء نهائي من الجيش، وبيطلع من التجنيد، ولو حصل وموقفك من التجنيد اتغير لأي سبب، و مبقاش مطلوب منك التصريح ده لكن فى نفس الوقت مفيش على الباسبور ما يثبت تغيير موقفك من للتجنيد، يبقى لازم تاخد معاك الورقة اللي تفيد بالتغيير ده، معاك و انت رايح المطار ومسافر يعنى.

طبعا الأوراق رقم ٩ و١٠ مش هتقدمهم فى السفارة ولكن فى المطار، بس طبعا كان لازم نتكلم عنهم هنا.

الحقيقه بعد ما خلصت الموضوع ده وتعبت فى كتابته أكتر ما بتعب فى تحضير ورق السفارة، خرجت بالملحوظة المهمة دي: مييين قال اننا فى مجتمع ذكورى؟؟ 😀 البوست ده لوحده كفيل يخليكى تحمدى ربنا انك بنت ? ده كفايه التجنيد والفنكوش ده ? الحمد لله!.

أنصحك أيضًا بقراءة:

فيزا بريطانيا : شرح طريقة الحصول على تاشيرة بريطانيا خطوة بخطوة

تاشيرة هولندا | كيف تحصل على تاشيرة شنجن من سفارة هولندا بسهولة

12 نصيحة للحصول على فيزا شنغن من سفارة اسبانيا : معك خطوة بخطوة

استخراج فيزا بريطانيا للطلاب: نجيب على أهم 10 أسئلة عن تاشيرة بريطانيا

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …