الرحلة | الرحالة | رحلة- حازم بدر:
اتكلمنا المرة اللى فاتت عن كوالالمبور وسول وبكين والنهاردة هنتكلم عن هونج كونج وبانكوك واسطنبول، في الموضوع اللى فات ناس سألتنى أنهى أجمل أو أنهى أرخص مدينة. كل مدينة لها جمالها.
سول مثلا مدينة أوروبية جميلة ومريحة وغالية.. هونج كونج مدينة عالمية مبهرة ناطحات سحاب وكبارى معلقة وأنفاق وجزر ومحيط وسواح من كل أنحاء العالم وبرضه غالية.. كوالا مدينة شيك ووقورة وأسعارها قريبة لمصر.
إسطنبول خليط من الشرق والغرب وأسعارها متوسطة.. بانكوك مدينة زحمة وقديمة ومش منظمة لكن دمها خفيف ومليانة سواح ورخيصة جدا.. بكين مدينة عريقة محتفظة بهويتها من آلاف السنين وأسعارها متوسطة وهكذا.
الرحلة الى الصين
في بكين هتقابلك مشكلتين، اللغة والأكل لأنها مش مدينة سياحية بالدرجة الأولى فمش هتلاقي حد بيتكلم إنجليزي إلا في الفنادق.
ومش هتلاقي مطاعم الأكل التركى والعربى المنتشرة في كل المدن السياحية في العالم وحتى الأكل الحلال الموجود قرب مسجد نيوجى هوه أكل صينى وكان الحل الوحيد التعامل مع مطاعم ماكدونالدز وكنتاكى القليلة.
ومن اشهر الوجهات السياحية في الصين شنغهاى وجوانزو واقصى صدمة قابلتنى في الصين إن الفيس بوك وجوجل مقفولين ولازم تنزل برامج بروكسى عشان تستخدمهم.
الرحلة
الرحلة من بكين الى هونج كونج
التكت الرابع: من بكين الى هونج كونج على Air China من مطار بكين الساعة واحدة الظهر يوم ٢٤ اكتوبر.
وصلت هونج كونج الساعة أربعة العصر واشتريت كارت المواصلات وممكن كمان تستخدمه في الشراء “أوكتوبوس” بـ ١٥٠ دولار هونج كونج.
ركبت الباص من المطار للمدينة بـ ٣٥ دولار لحد هوستل “هومى ان نورث بوينت” قريب جدا من محطة مترو “نورث بوينت”
هونج كونج مدينة جميلة نصها إنجليزى ونصها صينى.. مدينة تجارية وسياحية ومهرجانات شبه دبى كده واشهر مزاراتها:
الاماكن السياحية في هونج كونج
1 – ميناء فيكتوريا وهى من أكبر موانئ جنوب شرق آسيا وسبب احتلال انجلترا لهونج كونج وفصلها عن الصين
2 – قمة فيكتوريا اللى بتطلع لها بالترام وتشوف هونج كونج كلها وميناء فيكتوريا وناطحات السحاب وفي القمة هتلاقوا المول العظيم اللى فيه متحف مدام توسو وعرض الصوت والضوء ومتحف لسكة حديد هونج كونج ومطاعم وكافتريات ومحلات ملابس وهدايا وتقليد قلوب الحب (على وزن أقفال الحب).
3 – ساحة ” تسيم شا تسو” في شبه جزيرة كولون اللى بتطل على ميناء فيكتوريا وفيها الكثير من المطاعم والمتاحف ومناطق الشوبنج وبرج الساعة وتماثيل لنجوم هوليود زى بروس لى وعرض الاضواء الشهير.
4 – ديزنى لاند وهى من افضل مدن ديزنى في العالم
5 – حديقة المحيط “Ocean Bark”
6 – جزيرة لانتو وركوب التلفريك والصعود الى تمثال بوذا الذهبى
الرحلة الى تايلاند
قضيت اربع أيام في هونج كونج وانطلقت الى المحطة قبل الاخيرة في الرحلة الى بانكوك على اير اسيا يوم ٢٨ اكتوبر ووصلت مطار بانكوك الاقتصادى الساعة ١١ مساء.
اشتريت خط تليفون تايلاندي بـ ٢٠٠ بات وغيرت فلوس قليلة في المطار وركبت الباص لوسط المدينة باقل من ١٠ بات وبعدين ركبت تاكسى بـ ١٠٠ بات للهوستل الشعبى جدا Ares 🙂
رحلة بانكوك
بانكوك خفيفة الدم والاسعار ورغم حرارتها ورطوبتها الا انك بتبقى مستمتع بالمشى في شوارعها. أكتر مدينة تستمتع بالأكل في شوارعها، مطاعم السى فود، باعة السناكس، باعة الفواكه الاستوائية مانجو، أناناس، بطيخ، كنتالوب، باعة الآيس كريم بجوز الهند، طول ما انت ماشى تلاقى ناس فارشة بأكل 🙂
من مميزات الهوستل الشعبى جدا انه كان عامل رحلات رخيصة جدا في بانكوك وكمان كان عامل خدمة النقل للمطار بـ ١٥٠ بات وده نص سعر التاكسى والرحلات الشهيرة في بانكوك.
الاماكن السياحية في بانكوك
1- – كامب الافيال : تركب الفيل وممكن تحجز السباحة مع الفيل بس تكونوا مجموعة وكمان تعمل رافتنج في النهر (الركوب على حصيرة في النهر)
– السوق العائم
– الرحلة الى مدينة كانكانبرى وزيارة متحف الحرب العالمية ومقابر جنود الحلفاء وخط قطار الموت اللى بيعبر نهر كواى وبيوصل بين تايلاند وبورما واللى بناه اليابانيين في الحرب العالمية بالسخرة ومات اثناء البناء الاف الاسيويين واسرى الحرب من الحلفاء
– رحلة للمعابد البوذية
– رحلة عشاء نهرية في نهر خاو فرايا
– الشوبنج في مول MBK بمنطقة سيام ومول ديسكفرى واللى فيه برضه متحف مدام توسو واكواريوم الاحياء المائية
خلصت أيام بانكوك بسرعة وندمت انى ما طولتش شوية وكنت رحت بتايا وبوكيت… لكن تتعوض ان شاء الله 🙂
الرحلة الى تركيا
رجعت للتكت الاصلى وركبت من مطار بانكوك الدولى الطيران التركى الى اسطنبول يوم ٢ نوفمبر الى اخر محطات الرحلة
وصلت اسطنبول حوالى الساعة ٧ مساء بعد ١٠ ساعات طيران وبعد عبور طابور الجوازات الطويل جدا اشتريت كارت المواصلات الشهير بتاع اسطنبول بـ ٦ ليرة وشحنته بـ ٤٤ ليرة وركبت المترو لحد هوستل ” بيلا فيستا ” في ميدان تقسيم
طبعا كلكم حافظين اسطنبول 🙂
الاماكن السياحية في اسطنبول
1 – غنى عن التعريف الاكل التركى والحلويات التركية ومشروب العيران أو الايران
2 – مسجد السلطان احمد (المسجد الازرق) والمسلة المصرية
3 – أيا صوفيا
4 – توب كابى (الباب العالى)
5 – متحف الحضارة الاسلامية
6- مسجد السلطان احمد بالمجان طبعا وفيه تكت مجمع بـ ٨٥ ليرة يدخلك ٱية صوفيا وتوب كابى ومتحف الحضارة الاسلامية وشوية متاحف كمان لمدة خمس أيام
7- – رحلة البوسفور
8 – ميدان تقسيم وشارع الاستقلال بمطاعمه ومحلات الحلويات التحفة
9 – السوق المصرى للملابس والجلود والبهارات والحلويات
10 – رحلة جزيرة الاميرات باليخت وركوب الحنطور والغداء على الجزيرة
11- رحلة مدينة البورصة الخضراء واللى تعتبر من اشهر اماكن التزحلق على الجليد في الشتاء وزيارة معالمها ومنتجاتها من الملابس والجلود والحلويات والمربى والعسل الجبلى والزيوت وركوب التلفريك ومشاهدة مدينة البورصة القديمة من التلفريك
12- رحلة صابنجة ومعشوقية وصابنجة عبارة عن بحيرة وسط الجبال ولها كورنيش كامل الخدمات وممكن تركب البدال ومعشوقية عبارة عن غابة بها شلالات صغيرة وممكن تكتشفها بالبيتش باجى
دى كانت رحلتى الكومبو اللى استغرقت ٣٢ يوم زرت فيها ٦ دول وحاولت اعمل ملخص للرحلة في البوستين دول وارجو انى ما اكنش طولت عليكم كتير 🙂 والى اللقاء في رحلات كومبو جديدة 🙂