fbpx
الرئيسية / رحلات / ولاء إسماعيل تكتب من ماليزيا: برنامجك الكامل لزيارة كوالا لامبور

ولاء إسماعيل تكتب من ماليزيا: برنامجك الكامل لزيارة كوالا لامبور

رحلة- ولاء إسماعيل:

رحـلة السفــر مبتنتهيش بمجرد رجوعك لبلدك، السفر رحلة بتعيش معاك طول حياتك، فى السفر بتتعرف على شخصيتك الحقيقية، بتتعرف على معدنك الأصلى، بتبان على حقيقتك لأنك بتبقى في بلاد غريبة، بتعيش مع ناس مش شبهك مختلفين عنك فى كل حاجة، فى أخلاقهم فى تربيتهم فى معتقداتهم في أكلهم في شربهم فى كل حاجة وبتتعرف على ثقافتهم.

السفر هو الآلــة اللى بتثبت بها لنفسك أخلاقك وأفكارك ومعتقداتك وقوة تحملك وكيفية تعاملك فى المواقف الغريبة، السفر هو المكان الكبير اللى كل حاجه بتحصلك هناك متقدرش تتوقعها، السفر بيخليك تنضخ فكريا وبيزيد ثقتك فى نفسك وبيغير منظورك للحياة ويخليك تعرف تتصرف في أي موقف، لأن مفيش حل تانى غير إنك تتصرف بحكمة وده اللى حصل معايا فى مالـــيزيا.

فـى الســفر كـل حــاجه وأى حــاجة بتبـــــقى متـــاحة والقـــرار بيبــقى ليـك أنـت لوحــدك. وهنا الحلم بدأ “السفر حول العالم” فى البداية مكنتش عارفة أبدأ من أنهى بلد؟ وبعد تفكير وبحث استقريت على ماليزيا كأول وجهة لي خارج مصر، وهنا هتكلم بالتفصيل ليه ماليزيا؟

*الفيزا

ماليزيا لا تحتاج إلى فيزا للمصريين إذا مكتوب فى الباسبور وظيفة، فتحجز الطيران وسافر وهناك هتاخد تأشيرة لدخول البلد من المطار لمدة 90 يوم ببلاش، وإذا كان مكتوب فى الباسبور طالب أو حاصل على فهتبقى محتاج تصريح أمنى وده بيتعمل فى مجمع التحرير.

*قبل السفر

حجزت الطيران قبلها بشهر ونص وده خلى سعر التذكرة أقل من الطبيعى وأفضل موقع تستخدمه للطيران Skyscanner وحجزت الهوستيل من على hostelworld  وقريت عن البلد وعرفت الأنشطه اللى هناك وعملت خطة مبدائية للرحلة من على Tripadvisor.

 

*كوالالمبور (العاصمة)

وصلت المطار بالليل ومكانش فى غير التاكسى وفى المطار المكاتب موجوده لحجز التاكسي، والحلو فيه إن السعر موحد للمكان الواحد ولو معاك حد فى التاكسى السعر بيتقسم عليكم.

وصلت الهوستيل ودى كانت أول حاجة قلقانى بس روح المغامرة وتجربة حاجة زى الهوستيل كانت شدانى جدا إنى أعملها. فكرة الهوستيل إنه كذا غرفة وكل غرفة فيها أكتر من سرير وانت بتحجز سرير واحد ليك وبيبقى معاك ناس تانية من بلاد مختلفة، الهوستيل بيبقى متقسم غرف للبنات فقط وغرف مختلطة. الهوستيل كان فى منطقة Bukit Bintang، نزلت فى هوستيل kl Dorms ب 26 RM فى الليلة بالفطار.

من التقاليد الأساسية فى ماليزيا هى خلع الأحذية قبل الدخول للمنزل أو للهوستيل وده لأن الأحذية بها كم كبير من البكتريا التى لا يمكن رؤيتها بالعين المجردة.

 

أهم الأماكن التي لا يمكن أن تزور ماليزيا دون رؤيتها:

 

*البرجين التوأم (بتروناس): كانوا أطول برجين فى العالم وفيهم 88 طابق، ولو عايز تطلعهم فالأفضل إنك تحجزها أون لاين بـ 80 رينجت، وجنب البرجين هتلاقى حديقة كوالالمبور، بيتم فيها عرض النافورة الراقصة وألوانها أكثر من رائعة، وهتلاقى كمان فى نفس المكان Suria KLCC twin towers مركز للتسوق، علشان أروحهم ركبت أتوبيس وكان ببلاش.

*كهوف باتو : ركبت مترو بـ 2.5 رينجت لمحطة klcc ومونوريل بـ 2.6 رينجت وواحد كمان بـ 2.6 رينجت ووصلت محطة الباتو ودخلت (ببلاش) لقيت هناك كمية قرود ملهاش حل بتلعب وبتجرى وبتتسلق الاشجار والصخور وكمان هتلاقى حمام كتير حواليك 😀   وفى معابد ومزارات هندوسية كتير وهتطلع أكتر من 300 سلمه علشان توصل للكهوف وهناك شربت Coconut  بـ 5 RM وبعد كده ركبت المونورويل بـ 2.5  رنجت ووصلت KL Sentral  ودخلت ماكدونالدز وأخدت وجبة كومبو fish  بـ 8 RM واتمشيت فى شارع العرب.

*شارع العرب : فى منطقة Bukit Bintang  هتلاقى فيه كل وأي حاجة من أكل وشرب ولبس وهدايا وأحذية ومطاعم وكافيهات ومولات وكل حاجة، والأسعار حلوة جدا، وكمان تقدر تفاصل.

 

*حديقة الطيور: الدخول لها بـ  50 RM ركبت مونوريل لـ KL Sentral بـ 2.5 RM ومترو بـ 2.20 RM واتمشيت شوية ووصلت منطقة Jalan Perdana ودخلت الحديقة ولقيت فيها طيور كتيرة جدا وأنواع مختلفة. الطيور حره طلقة هتلاقيها ماشيه جنبك وحواليك فى كل مكان وفى عروض كمان للطيور. المكان مميز وشوفت فيه طيور أعرفها ومعرفهاش بس هى من أكتر الأماكن اللى استمتعت فيها وخرجت منها وفى نفس المنطقة روحت على حديقة الأوركيد.

*حديقة الأوركيد: كمية الزهور الموجودة هنا ملهاش مثيل وهتلاقى فيها نباتات ومناظر مريحة جدا للعين والبهجه هتحسها فى كل حته هناك، ومنها طلعت ركبت تاكسى بـ 4 RM  وروحت على حديقة الفراشات.

 

*حديقة الفراشات : الدخول لها بـ 22 RM، هتلاقى فيها فراشات غريبة ومختلفة وأنواع متعددة وألوان كتيرة وأحجام مختلفة، وهتلاقى أشجار مخصوصة للفراشات دى وبعض الزهور وكمان  بحيرات فيها أنواع وأشكال مختلفه من الأسماك والسلاحف والضفادع وفي طريقك للخروج ستمر على صالات تحتوي على أحواض ضخمه من الزجاج وبداخلها أنواع غريبة من الحشرات. ويوجد أنواع كثيرة من العقارب والعناكب والثعابين، وستشاهد أيضا أنواع كثيرة من الحشرات محنطه ومعلقه على الجدران وقبل خروجك من الحديقه ستدخل محل لبيع التحف التذكارية وطلعت منها روحت على مسجد نيجارا.

*مسجد نيجارا : المسجد الوطنى فى كوالالمبور الدخول له مجانا، اللى بيدخل المسجد سواء ولد أو بنت فبيدوه عبايات مكتوب عليها المسجد الوطنى وبتتلبس وانت داخل وشكلها حلو الصراحة،  المسجد مساحته كبيرة جدا وبيستوعب تقريبا 15000 مصلى ومن الحاجات اللى أبهرتنى جواه، المعمار الإسلامى الحديث وكمان فيه نافورات وأحواض رائعة، من كتر ما بهرنى مش عارفة أوصفه.

 

*متحف الفن الاسلامى

*مبنى السلطان عبد الصمد وميدان ميرديكا كوالالمبور ومكتب بريد ميدان ميرديكا قديماً ومعرض كوالالمبور Kuala Lumpur City Gallery، و Royal Selangor Club at Merdeka Square الأماكن دى كلها جنب بعض وفى نفس المنطقة ومش عارفه أنا وصلتلهم إزاى لأني خرجت من المتحف الإسلامى وقعدت اتمشى فى الشوارع ومركبتش أي حاجه بس لقيت نفسى وصلت للمنطقة، اللى فيها كل ده وبجد انبسطت جدا جدا ولقتنى وصلت لمنطقة حستها قطعه من أوروبا من مبانيها وشوارعها.

 

*الشوبينج : Pavillion mall، Low Yat Plaza، Sogo Mall، Lot 10، Times Square…الخ

شاهد أيضاً

السياحة في جاكرتا

السياحة في جاكرتا للمسافرين العرب: برنامج سياحي لزيارة شامل

السياحة في جاكرتا | الرحالة |   سيداتي ساداتي، معكم قبطان رحلتكم، أبلغكم بأن طائرة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *