الرئيسية / تقارير مميزة / كيف تنجو بنفسك من النشالين في مترو أوروبا: إنسى الجيب اللي ورا

كيف تنجو بنفسك من النشالين في مترو أوروبا: إنسى الجيب اللي ورا

تجربة- عمرو شريف:

موضوع المترو بره مصر من المواضيع الأساسية، اللي لازم بنلجأ لها، لأن المترو في البلاد الأوروبية يعتبر أرخص وسيلة مواصلات، وطبعًا شبكاتهم يا وعدي عليها، بتوديك كل مكان في البلد, لكن بقي المشكلة الكبيرة اللي بتقابلنا دايما هي موضوع النشاليين.

بصراحة الموضوع ده منتشر جدًا جدًا عندهم، وفيه مدن زي أثينا، الطبيعي إنك تشوف حد اتسرق قدامك كل ما تركب المترو، أنا النهارده هقول لكم شويه نصايح وطبعا تتطبقوها على أي مترو تركبوه في أي دولة، لأن المنظومة واحدة والأسلوب تقريبا واحد.

– أولا: إوعي تمشي معاك فلوس كثيرة في أي مترو، يادوب خد علي القد، ولو مثلًا رايح شوبينج، حاول تاخد مثلًا ورقة واحدة فئة كبيرة، عندهم ورق 500 يورو و200 يورو، وخد معاك شوية فكة علشان الأكل وكده، وطبعًا كارت فيزا واحد بس علشان لو مزنوق في فلوس أو بتحب تشتري بالفيزا.

– ثانيًا: إنسى خالص تحط الفلوس في الجيب الوراني بتاع البنطلون، والأفضل تقسم الفلوس في جيبيين يعني واحد يمين وواحد شمال، وكارت الفيزا في جيب تالت، ويا سلام بقى لو معاك شنطة ظهر يبقي تحط الفلوس جواها، وتمسك الشنطة كويس قوي، والموبايل حاول وانت في المترو ما تطلعهوش علشان لو غالي هيبان، لو موبايل رخيص وعدم وندم طلعه عادي 🙂 وطبعا الموبايل يتحط في جيبك القداماني بتاع البنطلون، وتكون دايما حاطط إيدك على الجيب ده، علشان محدش يحط إيده في جيبك.

– ثالثًا، نظام النشالين إيه، عامة هم بيكونوا 3 أو 2 واقفيين منفصليين عن بعض وكأنهم ما يعرفوش بعض، ودايما عند نفس الباب واقفيين وبينهم مسافات صغيرة، وأكثر أسلوب للنشل بيكون وانت نازل المحطة ?, تروح الباب والباب بيفتح يكون اثنين سادينه كانهم مش واخدين بالهم والثالث وراك بيزقك تنزل، يعني يا حلو بتكون عامل زي السندتوتش وانت بقي الحشو اللي فيه، وانت في الوقت ده بتكون متصربع تنزل، وكل همك تلحق تنزل وهم بيسرقوك وانت مش حاسس، لأنك مركز في شيء تاني، والسرقه بتتم في ثواني، إيدهم في جيبك, أو شنطة الستات تتفتح ويتاخد الحاجة اللي فيها يا موبايل يا فلوس ??

– رابعًا: فيه أسلوب تاني للنشل بيكون وانت واقف في نص العربية ومش نازل، يجي واحد يمينك والتاني قدامك والثالث وراك، وطبعا مش كله في نفس الوقت، وحد منعم يعمل إنه اتزق وميل عليك، وبالتالي تميل علي اللي وراك، وبالتالي تتسرق في لحظة، دايما حاول تقف وراك الباب اللي مش بيفتح، وحاول تبص كويس حواليك طول ما انت راكب.

– خامسًا: شويه نصايح عامة، مثلًا متحاولش تبين إنك سائح وتطلع في خريطة جوه المترو وكده، ولو لقيت المترو زحمه جدًا فوته واركب اللي بعديه، لأن دايما بيكون بعديه مترو جاي علي طول، ودايما إوعى تطلع موبايلك وتلعب فيه في المترو، ودايما بص حواليك وقيم الناس والموقف في المترو، وأخيرا خلي بالك لما تزور روما، أثينا وإسطنبول لأن دول لعنة في النشالين، أما بقى باريس، ده موال تاني، مش نشالين في المترو، لا حرامية علي الرصيف في محطات والله معينة و بالليل شويتين.

– نقطة مهمة للبنات, لو مسافرة أرجوكي بلاش منظرة وتاخدي معاكي أي دهب, كل الدهب والحاجات الثمينة خليها في بلدك, علشان مترجعيش تندمي عليها

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *