fbpx
الرئيسية / أفريقيا / كريم مجدي يكتب مغامرته في جنوب أفريقيا: أركب أمواج وأنط جبال

كريم مجدي يكتب مغامرته في جنوب أفريقيا: أركب أمواج وأنط جبال

رحلة- كريم مجدي:

رحلتي المرة دي كانت لجنوب أفريقيا وتحديدا “كايب تاون” الرحلة كانت في شهر نوفمبر وده بيعتبر بداية فصل الصيف هناك. الدنيا هناك كانت هوا شويه وممكن تكون برد شويه بالليل.
التأشيرة بتطلع مجانًا للمصريين ومش لازم انت اللي تروح تقدم ورقك كمان، محتاجين كشف حساب بنكي وخطاب موارد بشرية HR Letter وصورتين وحجز طيران وأوتيل، وبتطلع في 5 أيام، والسفارة مكانها في المعادي.
اختياري لكايب تاون كان سببه إني بحب سياحة المغامرات وإنها أمان بكتير عن العاصمة جوهانسبرج.
التذكرة وحجز الإقامة كان قبل التعويم وكانت التذكرة في حدود 5000 والإقامة مكانتش في أوتيل، أجرت شقتين حلوين قوي عن طريق Air Bnb وشقتين عشان حبيت أغير 3 أيام في مكان و4 أيام في مكان تاني.
الطبيعة هناك بالنسبة لي أفضل من أوروبا وهي بلد منظمة وجميلة قوي. والأنشطة اللي ممكن تعملها هناك كتير:
1- انك تغطس مع القرش الأبيض ودي رحلة طويلة شوية بتتحرك في حدود الساعة 6 الصبح أو 8 بالكتير بالأتوبيس بتاع الشركة اللي اتفقت معاها، المياه كانت تلج وطبعا بننزل في قفص كدة والقرش أول ما بييجي كله بينزل تحت المياه عشان يشوفه، وصدقني حكاية انك تفتكر انك في قفص وان الدنيا عادي، إنسى، أول ما تلاقي القرش قدامك لازم يجيلك شعور غريب (اللي بيتكلم ده غطاس محترف يعني أصلا بغطس عادي).. القرش الأبيض مخلوق بجد حجمه ضخم والناس اللي بتحب المغامرات والأدرينالين زيي هيحبوا الطلعة دي قوي، أنا آسف بس أنا فعلا مش فاكر التكلفة بس كل حاجة في حدود 100 دولار.


2- نيجي بقى للـ Bungee Jump بس دي بعيدة عن كايب تاون حوالي 6 ساعات سواقة وفي شركات بتعملها مع الغطس مع القروش عشان هما نفس الطريق. أنا طبعا بأجر عربية أو موتوسيكل (مش سكوتر) عشان أسافر وأتحرك بيه، ساعتها اتحركت الساعة 2 بالليل تقريبا وصلت في حدود 8 أو 9 عملت أعلى قفزة من كوبري معلق في العالم ونمت ساعة في العربية ورجعت تاني على كايب تاون، طبعا مش عارف أقول إيه على جمال الطرق هناك، تاني.. بالنسبة لي أحلى من أوروبا لدرجة إني كان نفسي مبقاش سايق عشان استمتع بالطريق.
دة موقع الشركة المنظمة عشان تحجز بنفسك وتشوف فيديو: www.faceadrenalin.com
3- حاجة كده لطيفة اسمها Penguins Beach أيوه في بطاريق في أفريقيا، وده ممكن تروح تتفرج فيه على البطاريق وتتغدا هناك وترجع ويبعد حوالي 30 دقيقة من كايب تاون.


4- في حاجتين عملتهم في يوم واحد، موتوسيكلات في الصحرا ودي مش لأي حد قوي، لأن كان في بنت سايقة داست فرامل قدام واحنا نازلين من ارتفاع كبير، اتشقلبت لحد تحت، لو ملكش في الموتوسيكلات قوي راجع نفسك، ولو حد راح الواحات البحرية عندنا عارفين الكثبان الرملية اللي بنطلعها بالعربيات الجيب، نفس النظام بس بالموتوسيكلات.
الحاجة التانية كانت حلم ركوب الأمواج Surfing ودي أصعب بكتير مما كنت فاكر وبتكون عبارة عن حصة 4 ساعات مع مدرب عشان بس تقف على البورد وتركب موجة صغيرة.. أنا في خلال 4 ساعات وقفت مرتين بس والرجل قالي إني كده كويس وبتعلم بسرعة :] 5- في هناك طريق المشي فيه لوحدة بالعربية بيعتبر نوع من أنواع السياحة والطريق الوحيد اللي بتشتري تذكرة عشان تعدي منه Champion`s Peak وهو يستحق الصراحة. وأنا طبعا استغليت الفرصة وأجرت موتوسيكل BMW Gs 750 واتفرجت على أحلى طريق في حياتي.. الطريق ضيق شوية ومنحنياته حادة بس تحسه منحوت في الجبل ده غير انه بيبص على المحيط.. منظر وهمي.


6- صعود Table Mountain اللي بيبلغ ارتفاعه حوالي 1100 متر وبتطلع الجبل ده يا إما على رجليك في حدود ساعة ونص وده أحسن توقيت أو عن طريق التلفريك (أنا طلعت على رجلي) عشان أشوف المناظر الطبيعية. بس خلي بالك إن الصعود للجبل كله عبارة عن زي سلالم طبيعية، مش مجرد مشي، بس هو أنا أطلع بس كده من غير مغامرة كمان، أكيد لا، حضرتك قبل ما تقرر انك تطلع هتروح لمقر شركة www.abseilafrica.co.za وتتفق معاهم على إنك تعمل أعلى abseilingg في أفريقيا يعني أعلى نزول من جبل بالحبال، جميلة ومنظر رهيب، بس جمد قلبك وإيديك ورجليك 😀


طبعا في كام قمة تانية كانت ممكن تتطلع بس مش أعلى من دي كمان مكانش عندي وقت بالرغم من إني قضيت 6 أيام، لكن في بوم كدة حبيت أقضيه استرخاء كده معملش فيه حاجة. كل شركات السياحة أو اللي بتتفق معاها عشان تعمل الأنشطة اللي انت عاوزها في شارع واحد في وسط البلد، كان ممكن أعمل سفاري وباراجليدينج بس مش بقتنع بيهم.
لازم تروحوا مكان اسمه CLIFTON وCAMPS BAY شواطيء ظريفة والمنطقة هناك حلوة جدا، وفي Mall كبير في وسط البلد لو عاوز تعمل شوبينج.
كايب تاون فيها كل حاجة انت عاوزها من أول المغامرات لحد الشواطئ الجميلة. ودلوقتي وقت كويس قوي عشان تروحها لأن بعد شهر 4 بتكون برد.
دي مواقع لكام شركة هناك بيقدموا أنشطة كتير:
http://capeadventurezone.com/
http://www.downhilladventures.com/
https://www.capextreme.com/

شاهد أيضاً

مكتبة الإسكندرية

مكتبة الإسكندرية : أهم الأنشطة السياحية داخل المكتبة ومواعيد عملها

مكتبة الإسكندرية | الرحالة |   يقال أن مصر ليست بحاجه لمنافسة دول العالم تاريخياً, …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *