fbpx
الرئيسية / أوروبا / عمرو شريف يكتب رحلته إلى اليونان: أسرار السفر إلى أثينا

عمرو شريف يكتب رحلته إلى اليونان: أسرار السفر إلى أثينا

رحلة- عمرو شريف:

اليونان، يعني الخواجة كوستا والخواجه ياني 😀 , يعني بلد الزتون الكلاماته, وكمان بلد الفلاسفة اللي علمت العالم حاجات كتير لأنها من أقدم الحضارات في التاريخ , وهي كمان أكتر بلد فيه آلهه في التاريخ القديم بلد أبولو (إلهة الفنون) , وأفروديت (ألهة الجمال) , وأثينا (ألهة الحكمة) عند الإغريق القدماء.. النهارده بقى هنتكلم عن أثينا (مقصدش الألهة طبعا :D) أقصد أثينا البلد.

أسرار السفر إلى أثينا:

– وصلنا بالسلامة، بعد ما نخلص الجوزات وناخد الشنط بناخد الأسانسير في المطار ونطلع دور ونطلع بره المطار ناخد المترو, المحطة هتكون في وشك، التذكرة بـ8 يورو ولو هتشتري تذكرتين مع بعض هتكون بـ14 يورو , و3 تذاكر هتكون بـ20 يورو وخلي بالك من حاجة مهمة جدا كل محطات المترو في أثينا، مافي أبواب تدخل بيها بتذكرة, يعني تدخل براحتك خالص, إنما بقي يا حلو لو اتقفشت معاكش تذكرة هتلبس غرامة 50 يورو, وعلشان هما ولاد ناس عاملين مكن في المحطة لازم تحط التذكرة في الماكينه تطبع عليها الوقت علشان ما تشتريش تذكرة تسيبها في جيبك طول وقت الرحلة وتقول للجنه آدي تذكرتي، لأن كده ليهم إنها مش تذكرة لأنك مش حاططها في ماكينة الوقت (نفس الموضوع في تذكرة مترو المطار لازم تحطها في ماكينة الوقت قبل ما تنزل الرصيف اللي هتركب منه).

– وصلنا نص أثينا اللي هي المحطة المشهورة بتاعتهم أومنيوم، وعلي فكرة في بس خطين للمترو في أثينا والاثنين فيهم محطة أومونيوم، 70% من فنادق أثينا الرخيصة هي في حي أومونيم ده من من أول 35 يورو في الليلة للفردين فندق 3 نجوم بالإفطار، حي أومونيوم ده سمعته زي الزفت وكله بيقول عليه تجار مخدرات ودعارة وما تمشيش فيه بالليل وكلام من ده أنا كنت فيه ما فيهوش أي حاجة من المواضيع دي بس فعلا هو حي ضايع شوية، وكله أجانب وسود وعرب بس أمان جدا وهو فعلا الحي ده في وسط أثينا ومكانه ممتاز جدا للمواصلات وفيه مطاعم بالعبيط وأسعار الأكل فيه معقولة جدا.

– اشتري تذكرة المترو والباص لمدة 5 أيام بـ10 يورو وتركب بيها زي ما انت عايز يعني صباح التوفير بجد وده مش هيوصلك المطار تذكرة المطار زي ما اتفقنا في أول الكلام لها سعر لوحدها.

– أشهر أكل عندهم هو السلوفاكي أو بيتا سلفاكي وهو عبارة عن ساندوتش معمول قرطاس بس إيه، العيش شبه اللبناني بس علي تخين شويتين، والقرطاس ده بقى فيه كل ما تتخيله، يعني شاورمة علي بطاطس مقلية علي سلطة علي مايونيز علي كاتشب وده السندوتش الشعبي بتاعهم وبـ 2 يورو وطبعا تطلبه فراخ لأن اليونان تقريبا مش بتاكل غير لحم خنزير والساندوتش ده بيشبع موت مبقلظ كده وطعمه تحفة ولو بقي علي المطاعم يعني مش أقل من 6 إلى 8 يورو لو طبق فراخ علي شوية رز أو بطاطس.

– طبعا الأكل مش رخيص خالص يعني الزبادي 1.20 يورو والبيبسي بـ0.90 يورو والشيبسي بـ1.50 يورو.

-بالنسبه للمزارات نعمل فيها إيه أنا برشح اتوبيس اسمه هوب أون هوب أوف, وده فيه كذا شركه منه وفكرته انه أتوبيس دوريين وسقفه مكشوف وفيه سماعات بتحطها في ودنك ويحكي لك طول ما انت ماشي انت شايف إيه والباص ده بيقف عند كل مزارات أثينا حوالي 23 وقفة والتذكرة بتاعته بتكون صالحة لمدة يومين وتفضل تنزل عند مزار وبعدين تخلص وتركبه تاني وتروح مزار تاني وهكذا أو تركبه تتفسح وما تنزلش وتلف علي المزارات أو تلف يوم وتكمل لف تاني يوم بيه لأن التذكرة يومين وبـ18 يورو وده أغلى شركه فيه, شركات أقل بحوالي 12 يورو بس بجد يستحق يتركب بجد.

– طبعا أهم مزار عندهم واللي طايرين بيه السما هو الأكروبليس (القلعة الحصينة) وده من واحد من أهم الآثار الموجودة في العالم. وهو عبارة عن شوية عواميد فوق جبل, طبعا معظم شوارع أثينا شايفة الأكروبليس لأنه فوق جبل، نروحه ازاي بقى، تركب المترو هتلاقي محطة اسمها أكروبليس تطلع منها وتستعد انك تطلع شوية سلالام مانجه علشان انت طالع جبل وتذكرته بـ12 يورو وما ينفعش تشتريها أون لاين وتفضل تطلع لغاية ما تلاقي شوية عواميد تعدي من جواها وتطلع تلاقي شوية عواميد تانيين 🙂 بالكثير 20 عامود وده بيجيله سياح من كل مكان في العالم (يا عيني عليكي يا مصر) 🙁

– ثاني أهم حاجة هو المتحف الوطني دخوله بـ6 يورو وده ملوش محطة مترو، لازم تركب أتوبيس من ميدان أمونيا اللي المفروض نازل فيه تمشي حوالي 15 دقيقة هتلاقيه, ولو افتكرت إن كله عن الحضارة الإغريقية تبقى غلطان 😀 لأن فيه جزء كبير آثار مصرية والباقي شوية تماثيل عريانة 😀 الظاهر إنهم كانوا مغرمين بكده يعني المتحف كله تماثيل ومش كبير قوي يعني.

-فيه منطقة اسمها بلاكة ودي برضه بتروحها بالمترو منطقة زحمة وفيها سوق كده بيبيع كل الحاجات بتاع السوفينير بأسعار غالية موت وفيه برضه شوية أماكن فيها عواميد وأنفاق فيها آثار, ودي ببلاش الحمد لله.

دي أهم مزارات أثينا, وأنصح اللي يروحها ميطولش فيها ويروح على طول لإحدى جزر اليونان الشهيرة زي سنتوريني وميكانوس ورودس. ودول بجد اللي يستحقوا الزيارة, ولكن أثينا مدينه حلوة كمدخل لليونان فقط , ممكن تقضي فيها يومين أو 3 بالكتير.

حابب أحذركم مرة واتنين وثلاثة من نشالين المترو لإنهم بالهبل وبجد بالهبل وتقريبا محدش ما بيتسرقش ياموبايله يا فلوسه خصوصا المترو اللي جاي من المطار, وأنا كل ما أركب المترو كنت أخفي الموبايل والفلوس وأكون متوتر وعمال أراقب اللي حواليا وشاكك في طوب الأرض وشفت بعيني واحدة قدامي موبايلها اتسرق فخلي بالكم بجد 😉 , قد أعذر من أنذر.

هذا التقرير منشور بالاتفاق مع صفحة Travel Secrets

شاهد أيضاً

افضل فنادق انترلاكن

افضل فنادق انترلاكن

افضل فنادق انترلاكن | الرحالة | مدينة انترلاكن في سويسرا، تقف الكلمات عاجزة عن وصف …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *