الرحالة و المسافرون العرب

عاصمة جورجيا | عمرو المغربي يكتب رحلته إلى جورجيا: برنامجك الكامل في تبليسي

عاصمة جورجيا | الرحالة | رحلة- عمرو المغربي:

 

جورجيا، أول بلد أقرر أمد اقامتي فيها أسبوعين، أخدت الفيزا أونلاين، وبتستعد للطيران والإقامة وترتيب شنطتك، طب مبدئيًا، ممكن تحجز الطيران من شركة العربية  http://www.airarabia.com/ar والأفضل تطلع مع طيران Air Cairo من الغردقة مباشر على عاصمة جورجيا http://www.flyaircairo.com/ar ، تبليسي التذكرة كانت قبل التعويم بحوالى 2900 جنيه ذهاب وعودة، النهارده على طيران إير كايروا عاملة حوالى 4500 جنيه بعد التعويم.

عاصمة جورجيا

أنا طلعت في أغسطس 2016 الجو كان معقول بس في آخر كام يوم كان برد ومطر، لكنه خلى للرحلة طعم تاني.

الإقامة أفضل إنك تنزل في هوستل قريب من ميدان الحرية لو عاوز توفر في الفلوس، أنا نزلت في غرفة كان فيها سريرين بس، أنا أخدتها لوحدي 15 يوم، الليلة في حدود 25 لاري تقريباً، وممكن تنقي أوتيل متوسط من بوكينج booking بس المهم يكون قريب من وسط البلد لأن التلفريك والباصات وكل حاجة قريبة جدا من ميدان الحرية، وكمان شركات السياحة والبنوك والصرافات.

مطار تبليسي

الـGPS في جوورجيا هو حياتك اوعي تستغني عنه هاتعرف منه راسك من رجيلك، وصلت مطار عاصمة جورجيا تبليسي، ودي إحداثياته عشان لو عاوز تدور على المعالم القريبة منه أو تعرف مسافة مكان الإقامة من المطار41°40’15.62″N, 44°57’25.75″E، هتوصل المطار.

حاول تظبط حجزك إنك توصل في أول النهار عشان متضيعش يوم عليك وتدفعه في السكن. مطار تبليسي مطار كبير ومحترم والناس فيه كويسيين ومتعاونين، بس اللغة السائدة هناك الروسي، وأنا بتكلم روسي كويس فظبطهم 

 

المواصلات في عاصمة جورجيا

بعد ما تاخد شنطك وتخلص المطار هاتلاقي بره باصات بتودي لحد ميدان الحرية (Freedom Squere) في عاصمة جورجيا تبليسي المسافة حوالى 30 دقيقة من المطار للميدان بالباص.

نصيحه ملوش لزوم التاكسي إلا في أضيق الحدود لأن هناك في بدايل كتير للتاكسي، وفي أماكن هاتبقي مضطر فيها للتاكسي، الباصات والمترو والتليفريك كلهم أسعارهم من 2 لـ 3 لاري (اللاري بعد التعويم بقه بحوالى 7.25  جنيه  )

فنادق جورجيا

وبالمناسبة في كام معلومة تخص الباصات في عاصمة جورجيا، اولاً لازم يكون معاك كوين (عملة فضية) لأن الدفع في الباص في ماكينة بالكوين، ثانياً الأولوية في الباص للسيدات، يعني مينفعش تقعد وفي واحدة واقفة  

وصلت الأوتيل أو الهوستيل بتاعك، متضيعش وقت، ظبط حالك وشنطك وخد شاور سريع والبس وانزل، تتمشي بقى لميدان الحرية في تبليسي وتسأل على التليفريك وهو بينه وبين ميدان الحرية 5 دقايق مشي، التليفريك ده سعره حوالى 2 ونصف لاري، وده معدل المواصلات هناك، هيوديك عند تمثال أم الجورجيين.

هاتلاقي هناك تليسكوب (منظار) تشوف منه عاصمة جورجيا كلها من فوق منظر تحفة، هو بيشتغل بالكوين (العملة الفضية) تحط 1 لاري بيديك حوالى دقيقة تقريباً وتتمشي فوق شوية تتفرج على البلد.

المطاعم العربية في عاصمة جورجيا

وأنصحك تشتري كارت بـ5 لاري جورجي وتشحنه على حسب ما انت محتاج تقعد قد ايه في تبليسي ومعاك حد ولا لا، بس خلى بالك الكارت بيستخدم في المترو والتليفريك بس الباصات لا، فممكن مثلا تشحنه بـ20 لاري، ودايما تخلى معاك كوينز عشان الباصات والحاجات اللى بتحتاج عملة معدنية.

وكمان في مطاعم عربية كتير عاصمة جورجيا تبلييسي في شارع هناك عربي فيه حفلات وديسكوهات وكافيهات وشغال للصبح بس نصيحة نام بدري عشان تستعد لرحلة بكره.

رحلة كازبيجي (سعر الفرد حوالى 65 لاري)

دي رحلة لازم تطلعوها في جورجيا، ومن الصبح بدري الساعة 8، رحلة متعبة شوية وطويلة حوالى 4 ساعات رايح وزيهم جاي، لكن تستاهل المشوار واللى مراحش كازبيجي مراحش جورجيا، مناظر تحفة للجبال الخضراء، تروح مكتب سياحة في تبليسي من بالليل قبل الساعة 9 مساءاً (موجودين كتير في ميدان الحرية) وتحجزها لتاني يوم الصبح.

لو انتم مجموعة 4 افراد ممكن تاخدوا عربية جيب لوحدكم لو مكنش تطلع عادي مع جروب من شركة السياحة، السواق بيقف بيكم 3 أو 4 مرات في الطريق عشان تتصورا في أماكن تحفة على الطريق الى كازبيجي، اوعى تقول اتصور وأنا راجع، التصوير تحفة بالنهار وانت هترجع بالليل، وبعدها هيوصل بيك لأعلى مكان قمة الجبل، بتقعدوا هناك فترة وتتصوروا وتتفرجوا على المناظر وترجعوا تاني.

العودة الى تبليسي

هترجع من رحلة كازباجي الى عاصمة جورجيا تبليسي على حوالى الساعة 6 مساءاً، نصيحة نام وانت راجع في العربية، مفيش تصوير لأنك اتصورت وانت رايح.

توصل بقه على العاصمة الجورجية تبليسي تاني، تنزل تتمشي بقى وتتغدا في الشارع العربي وتاكل شاورما في المطاعم التركية، ممتازة. اللى بيحب الشاورمة هتلاقيها متوفرة كتير وبأسعار حلوة بحوالى 5 لاري لحد 10 لاري، أنا انصحك تجيبها من المحلات التركي كانت تحفة.

السوبر ماركت في تبليسي شغال 24 ساعة، ممكن تشتري منه مكرونة وبيض وكل اللى يناسبك وتعيش حياتك لأن الهوستيل فيه مطبخ وانت ممكن تعمل أكل بنفسك، لو هتركب تاكسي فاصل هناك عادي خالص، أي حاجة ملهاش تسعيرة رسمي فاصل فيها.

 

رحلة Mtatsminda Park (رحلة مجانية)

ملاهي جورجيا، بينها وبين ميدان الحرية في تبليسي حوالى ربع ساعة بالباص بـ2 لاري، بس هي في مكان عالي، الباص هينزلك أول الشارع ولازم تاخد تاكسي مش هينفع تمشيها لأنها هتبقي متعبة، تاخد تاكسي 5 دقايق بـ 5 لاري، أو تاخد تاكسي من ميدان الحرية للبارك على طول بحوالى 15 لاري جورجي.

دي مش لازم تروحها الصبح، ممكن تروح الصبح حديقة حيوان تبليسي (Tbilisi Zoo) وتروح بعدها على Mtatsminda Park فيها أماكن جوه للتصوير تحفة دي ممكن تاخد منك نصف يوم، فيها تماثيل وملاهي وكلاب كبيرة جدا (تحس إنها أسد)، بس خلى بالك في أماكن جوه التصوير فيها بفلوس 1 أو 2 لاري.

رحلة Mtskheta (لقاء النهرين)

بتحجزها برضه من شركة السياحة في عاصمة جورجيا تبليسي بتبقي باكيدج على بعضه، بحوالى 50 لاري، يفضل جروب مع بعض لأنها فيها أماكن حلوة قوي للتصوير ولقاء النهرين، وبترجع منها حوالى الساعة 5 مساءً، وأنا شايف إنك تطلع بدري أحسن عشان ترجع بدري وتستغل اليوم، وتنزل تعمل شوبينج في تبليسي.

 

أخيراً: نصيحة بلاش باتومي أو باطومي، فيها مشاكل كتير ونصب وسرقة، تبليسي كفيلة إنها تخليك تستمع بالرحلة وترجع لها تاني، وكمان الشوارع المحيطة بميدان الحرية فيها كل حاجة ممكن تتخيلها فانت خللي النهار للرحلات خارج تبليسي والليل للعاصة تبليسي.

ألقاكم في رحلة قادمة قريباً جدا

اترك رد

لن يتم نشر عنوان بريدك الإلكتروني.