fbpx
الرئيسية / أوروبا / عالم ديزني | 12 نصيحة للاستمتاع بوقتك في رحلة ديزني لاند
عالم ديزني لاند
ديزني

عالم ديزني | 12 نصيحة للاستمتاع بوقتك في رحلة ديزني لاند

عالم ديزني | الرحالة | تجربة- بهاء فاروق:

أول ما تدخلها بتحس كأنك رجعت 20 سنه لورا هتصحي الطفل اللي نايم جواك, هتنقلك لعالم خيالي كل حاجه حواليك بتحكي قصة من قصص عالم ديزني وطول ما انت ماشي فيها بتسمع موسيقى أفلام عالم ديزني بتحسسك بجد كأنك جوا فيلم كارتون. لو انت في باريس متفوتش التجربة دي, ديزني لاند بيزورها كل سنه حوالي 15 مليون زائر.. طيب ازاي ننظم رحلتنا لديزني لاند علشان منفوتش أي حاجة فيها؟

12 نصيحة للاستمتاع برحلة عالم ديزني لاند

1- روح بدري أول ما الحديقة تفتح وهي بتفتح الساعة 10 الصبح علشان تقضي أكتر وقت في حديقة عالم ديزني وتركب أغلب الألعاب وبتقفل 10 بالليل في الشتا و11 بالليل في الصيف.

2- خلي زيارتك تكون يوم وسط الأسبوع وابعد عن الويك إند وأيام الأجازات علشان متقفش في طوابير طويلة لانتظار الألعاب (في أيام الزحمة ممكن تقف 3 ساعات عادي على لعبة 🙂 ) وهقولك تحل الموضوع ده إزاي في آخر نقطة 😉

ديزني لاند فرنسا
ديزني لاند فرنسا

الألعاب في عالم ديزني لاند

3- لو معاك أطفال ابدأ بالبارك لأنها كلها ألعاب أطفال أكتر ولو كنتم كبار ابدأ بالستوديوز لأن ألعابها للكبار وهم.

4- ابدأ بالألعاب اللي بتاخد وقت انتظار طويل علشان بتكون لسه الحديقة فاضية شوية فتدخل بسرعة.

5- حدد الألعاب اللي انت هتلعبها في زيارتك لديزني لاند, لأنك لما تدخل هتتوه وسط كترة الألعاب وصعب قوي تركب كل الألعاب, وتقدر تعرف الألعاب من موقعهم ومن البروشور اللي انت أخدنه قبل ما تدخل.

المطاعم في ديزني لاند

6- في مطاعم كتير بس الصراحة غالية, فممكن تاخد معاك أي أكل ودخوله مسموح, فخد معاك شوية سناكس وساندوتشات وانت رايح.

7- ساعات بتبقى الطوابير طويلة ومكتوب بره الوقت المتوقع لوصولك للعبة وممكن يبقى بعد 40 دقيقة مثلا , متتوهمش وأدخل عادي الطابور بيمشي بسرعة ومش هتحس بالوقت لأنك وانت واقف في الطابور نفسه هتكون عايش جوا قصة اللعبة اللي هتركبها.

8- لو معاك أطفال خليهم دايما تحت عنيك ولو لا قدر الله طفل تاه, اطمن مش هيعرف يطلع لوحده والأمن في كل مكان وفيه مكتب خاص بالأطفال المفقودين.

ديزني لاند فرنسا
ديزني لاند فرنسا

عرض قصر ديزني لاند

9- بلاش حركات لطيفة إنك تزاحم حد في الطابور أو تنظ السور مثلا 😀 لأن هناك هتلاقيهم محترمين جدا وكل واحد بيحترم دوره 🙂

10- فيه عرض مش طبيعي وهو العرض الرئيس لعالم ديزني لاند بيبدأ الساعة 11 بالليل عند قصر ديزني وده لا يفوتك مهما كنت تعبان لازم تتفرج عليه (احنا خلصنا لعب الساعة 8 وفضلنا قاعدين لـ 11 بليل علشان نتفرج عليه والصراحة لم أندم على أي ثانيه انتظار علشان أشوف العرض ده لأنه إبهار بمعنى الكلمة).

بجد من أحلى العروض اللي هتشوفها في حياتك, العرض مدته تقريبا نص ساعة, أول ما تخلص لعب وعلى الساعة 9 كده مثلا روح اختار مكان مناسب أمام القصر واقعد هناك ومتتحركش لأن على الساعة 10 تقريبا هتلاقي المكان بقى زحمة جدا.

بس نصيحة أول ما يخلص العرض تطلع بسرعة على القطار لأن لو اتأخرت في الطلوع هتلاقي زحمة جدا عند القطار للعودة إلى باريس, أسرع طريق انك تمشي عبر المحلات باتجاه بوابة الخروج لأن هتلاقي الشارع الرئيسي طوفان من البشر 😀

 

ملابس ديزني لاند

11- لو هتروح مع أولادك, نصيحة أخوية اشتري لهم ملابس شخصيات عالم ديزني لاند اللي بيحبوها  قبل ما تروح هناك وخليهم يلبسوها في الحديقة لأن الأطفال هناك أغلبهم بيبقوا لابسين زي الأميرات (كان على وقتنا أميرات فروزن ايلسا وأنا) ولو فكرت تشتري اللبس من هناك فاعمل حسابك على فستان بـ 700 جنيه أقل حاجة 😀

12- الـ Fast Pass دي خدمة عملاها ديزني على بعض الألعاب اللي بيكون عليها انتظار طويل جدا, هتلاقي جهاز خارج اللعبة مكتوب عليه fast pass بتمرر تذكرتك المطبوعة عليه وبيطلع لك تذكرة صغيرة بتسمح لك انك تدخل اللعبة مباشرة في وقت معين.

خليني أقولكم مثال: يعني مثلا وصلت لعبة بيتر بان الساعة 11 الصبح هتلاقي عندها fast pass هتمرر تذكرتك المطبوعة على الجهاز وهيطلعلك تذكرة مكتوب فيها الموعد اللي تيجي فيه تدخل اللعبة على طول بدون ما تقف في طوابير.

مثلا هيكون مكتوب عليها الدخول الساعة 1 الظهر, هيبقى أمامك ربع ساعة فقط من 1 إلى واحده وربع لازم تكون متواجد عند اللعبة علشان تدخل من مدخل خاص ومتقفش في طوابير, هي دي فكرتها.

ديزني لاند فرنسا
ديزني لاند فرنسا

الـ Fast pass في ديزني لاند

هتقولي طيب ما أعمل كده في كل الألعاب؟ للأسف ما ينفعش لأنك لو طلعت fast pass بتذكرتك متقدرش تطلع واحدة تانية إلا بعد انتهاء وقت الأولى وهكذا, يعني في المثال الأول كان لازم تدخل اللعبة الساعة 1 الظهر مثلا , من الساعة 11 الصبح إلى الساعة 1 الظهر مش هينفع تاخد أي fast pass جديد لحد ما الأول موعده يعدي.

نصيحة: لو خلصت مثلا لعبتك اللي أخدت عليها fast pass ودخلت ولعبت, أول ما تخرج اتجه مباشرة على اللعبة الجديدة اللي عاوز تركبها وعليها فاست باس وخد واحدة جديدة وروح إلعب أي ألعاب لحد ما يجي وقت دخولك ليها.

وفيه حاجة كمان ممكن تاخد فاست باس للعبة ولو ملقتش عليها زحمة أدخلها عادي بدون الفاست باس ولما يجي وقت الفاست باس بتاعها أدخلها مره كمان بدون طوابير 🙂

أنصحك أيضًا بقراءة:

 الدليل الكامل لزيارة ديزني لاند: تقرير يجيب عن كافة تساؤلاتك

عالم ديزني لاند في باريس : لن تكتمل رحلتك إلى هناك إلا بزيارته

ديزني | 10 أسرار مذهلة لا تعرفها عن ديزني لاند: أنفاق سرية وقطط ليلية

ديزني لاند فرنسا : تعرف على أسهل طرق الوصول إليها وأفضل أوقات زيارتها

هذا التقرير منشور بالاتفاق مع صفحة Travel Secrets

شاهد أيضاً

افضل فنادق انترلاكن

افضل فنادق انترلاكن

افضل فنادق انترلاكن | الرحالة | مدينة انترلاكن في سويسرا، تقف الكلمات عاجزة عن وصف …