الرئيسية / آسيا / سمر خضر تكتب عن تجربة السفر الى لبنان “بعد الدولار ما ولع في الجنيه”
تجربة السفر الى البنان
تجربة السفر الى البنان

سمر خضر تكتب عن تجربة السفر الى لبنان “بعد الدولار ما ولع في الجنيه”

تجربة السفر الى لبنان | الرحالة | رحلة- سمر خضر:

في البداية لما قررت السفر الى لبنان ، كانت أسعار تذاكر الطيران معقولة إلي حد ما، بعد الدولار ما ولع في الجنيه. أسعار الأوتيل خزعبلية مقارنة بأي مكان تاني.

4 ليالي في Movenpick غرفه dual من غير أَي وجبة كانت بـ 860 دولار، مع العلم أنا مروحتش في موسم، ده في رمضان وهو وقت عادي جدًا للبلد.

تجربة السفر الى لبنان
تجربة السفر الى لبنان

تجربة السفر الى لبنان

عشان تروح أَي مكان، التاكسي مش بعداد، هو بيقول رقم ويا توافق يا تفاصل معاه لحد ما تتفقوا، بس في سرفيس، ده أرخص من التاكسي شوية، بس مبيروحش كل الأماكن.

المحلات غالية شوية بالنسبة لأسعار الـ brands.

تجربة السفر الى لبنان
صخرة الروشة في بيروت

منطقة الروشة في بيروت

كبحر مفيش أَي انبهار، زي أي بلد ساحلية. هو بس الرجالة هنا بتجري على الكورنيش topless والبنات حرانة على طول.

منطقه الروشة لطيفة، بس الأكل غالي شوية كفطار أو غدا، أنا بحسبها بالدولار مش بالمصري عشان متتعقدوش. يعني الغدا مثلا في كافيه عادي بحوالي 30 دولار وده طبعا كتير.

تجربة السفر الى لبنان
شارع الحمرا في بيروت

شارع الحمرا

منطقة الحمرا حلوة ككافيهات، القعدة فيها لطيفه بس مش رخيصة والمحلات غالية جدا فيها وهي عبارة عن شارع واحد. الأكل تحفة فنية أنا جربت أكل الأوتيل بس، وكان روعة. احنا مضحوك علينا في مصر

أنا شايفة إن شرم الشيخ أو الغردقة أو مرسي علم أحلى كتير من بيروت كبلاد ساحلية، فيها بحر وجبال وأماكن للسهر. أحلى وأرخص كتير من بيروت.

تكلفة يوم واحد في بيروت

انت ممكن تنزل أسبوع كامل في الغردقة فول بورد أحسن وأرخص من يومين في بيروت. هنا عشان تقضي يوم تخرج وتاكل مش هتصرف أقل من 150 دولار ولو حبيت تسهر ربنا معاك.

البلد مش مبهرة زي ما كنت متخيلة، أنا شايفة وعن تجربه واحدة صاحبتي إيطاليا ممكن تكون مش مكلفة زي بيروت. ما أعتقدش إني ممكن أحب آجي مره تانيه.

تجربة السفر الى لبنان
بيروت

أنا شايفه البلد أقل من عادية للمصاريف غير الطبيعية دي، أنا قضيت أحلى أسبوع في الغردقة الأوتيل كان تحفه وسي فيو وفول بورد وسهر كل يوم وطيران رايح جاي بـ 3500 جنيه.. بصراحة البلد مش مستاهله كل الضجة اللي معمولة لها.

شاهد أيضاً

السفر التطوعي إلى تايلند

السفر التطوعي إلى تايلند : تجربة فرات سامي في التطوع بمزرعة تايلاندية

السفر التطوعي إلى تايلند | الرحالة | رحلة- فرات سامي:   ابتديت يومي الرابع في …