الرئيسية / رحلات / سامح رضوان يكتب رحلته إلى ماليزيا: كيف تضرب عصفورين بحجر واحد

سامح رضوان يكتب رحلته إلى ماليزيا: كيف تضرب عصفورين بحجر واحد

رحلة- سامح رضوان:

السفر نعمة من نعم ربنا توجب الشكر إن ربنا يسرها لك، قبل أي حاجة، أحب أوجه كل الشكر للمهندس Bahaa Aldeen Farouk على كل نصائحه،  وكل الشكر لكل شخص قدم معلومة أو نصيحة أو اقتراح في موضوع السفر فمن لم يشكر الناس لم يشكر الله.

السفر مش صدفة ولا فكرة طارئة، السفر تخطيط وتنظيم ودراسة وخطة يديلة ومبلغ مجنب للطوارئ، بالعربي كده، ده امتحان والنتيجة بتعرفها لما ترجع وتشوف انت نجحت بنسبه كام في المائة في اللي انت خططته.

يلا بينا بقى، ماليزيا مش دولة بتزورها، ماليزيا حالة بتعيشها، الترانزيت حاول تخليه مده طويلة وتشوف مع شركة الطيران إمكانيه حجز فندق وتأشيرة مؤقتة، ده بيحقق حاجتين زيارة دولة إضافية، وجود تأشيرة علي جواز سفرك مدة كافيه للراحة (خصوصًا لو معاك أسرتك وفيها أطفال).

اعمل حسابك دايما في عملة دولة الترانزيت لأنك هتحتاجها هتحتاجها (تغيير العملة في المطارات بيخسر كثير).

وصلت مطار كوالا بالسلامة، ونزلت من الطيارة  هتلاقي نفسك بتفكر في حاجتين هعمل إيه دلوقتي، وهروح الفندق إزاي. هتعمل إيه دي هتلاقي يفط مكتوب عليها بـ 33 لغة منهم العربية هتتحرك إزاي في المطار، وهتعمل إيه وعادي جدًا إنك هتلاقي قطار تركبه ينزلك عند مكاتب التأشيرة (شبابيك للماليزيين وشبابيك للأجانب)، خلصت التأشيرة، هي في الغالب 90 يوم واستلمت شنطتك وخارج من المطار.

عندك حلين (الأول تطبيق اسمه grab وده له دور محوري في رحلتك، أو مكاتب الخدمة داخل المطار), التطبيق زي أوبر كده بس أرخص، لو معاك أسرة وشنط كثير هتخش على مكتب الخدمة تاخد ميني فان وتفاصل، بتبلغه اسم الفندق وهو يقولك السعر وبتفاصل لغاية 20% مثلا.

بالنسبة للفندق، أغلب الـ check in بيبقي الساعة 2، فلو طيارتك هتوصل بدري فالأفضل تبعت إيميل للفندق من قبلها لتنسيق الـ early check in واختيار الفندق، لازم تشوف موقعه ومدى قربه من أماكن المزارات ومحطات المونوريل (المترو المعلق).

أنا كنت نازل في فندق اسمه wp hotel، في منطقة هادئة ولو عندك النية لزيارة لانكاوي أو بينانج والعودة لكوالا مرة أخرى فلازم تتأكد إن الفندق فيه خدمة luggage storage (تخزين الأمتعة).

بروجرامك تحضره قبل ما تسافر، وتنفذه فور الوصول (نصيحة ابدأ بالمناطق البعيدة الأول). جنتنج هايلاند لو شباب، كفاية عليها من 4 إلى 5 ساعات، لو أسرة ممكن تزود ساعة أو اتنين تنزل محطة  kl sentral، الدور اللي تحت هتلاقي موقف الباص، تحجز ذهاب وعودة علشان ما تتسوحش (طيب حبيت تطلع بسياره عن طريق grab اتفق مع السواق يعديك علي باتو كيف batu cave وانت رايح لمده 20 دقيقة وتبقي تظبطه في الـ rate وأول لما توصل جينتتج تحجز باص العودة وبعدين تنطلق بالتلفريك (جنتنج مع باتو كييف كفيلين باستنزاف الطاقه لهذا اليوم) من 9 صباحا حتي 6 مساءً.

صنواي لاجون، دي أكوا بارك وحديقة حيوان مصغرة وحاجات كثير كده ممكن ما تلحقش تخلصها خلال اليوم من 10 ص إلى 6 مساءً وجنبها مول حلو كده تطلع من الأكوا تخش عليه تعمل شوبنج صغير وتروح جميع المولات بتفتح 10 ص إلى 10 مساءًا) طيب ملكش في الشوبنج تطلع من صنواي على i city وتبقي ضربت عصفورين بحجر واحد (متحف الشمع وsnow walk والحديثة المضيئة) وأنشطة تانية.

لما تروح تزور البرجين التوأم محطة klcc عندك، الأكواريوم حوالي ساعتين، وبعده تخش  petro sains مدينة العلوم، حاجة كده روعة للكبار والأطفال من (10 سنوات كده) حوالي ساعتين ونص برضه، وبعدين تنزل علي النافورة الراقصة وتركب المترو وتنزل على jalan betalin المدينة الصينية china town شويه هدايا تذكارية وتحقيق هواية وإشباع رغبة الفصال عند المصريين تبدأ من الربع وتزود وتسيبه وتمشي نده لك تنجز، نفضلك يبقي مش محقق ربحية، وساعتها الأمر يرجع لك في قرار الشراء.

التجول في شوارع كوالا متعة لوحده، والتعامل مع أهل البلد مريح نفسيا وبلاش بعد 11 بالليل لوجود بعض سكان الشوارع (مسالمين جدا) بس وارد تشوف مناظر غير لائقه للأسرة أو للسيدات الأفاضل.

إشارات المرور هتلاقي زرار في عامود الإشاره تدوس عليه يعجل بفتح الإشاره للمشاه (شفته مرتين أو تلاتة  ? ?)

لازم تخطف رجلك كده لحد bukit pentang شارع العرب تتمشى تتعشى تتمسج وتغير عملة من الصرافة اللي جنب ماكدونالد، أفضل سعر عن أكثر من تجربة مش اللي فيها ويسترن يونيون، ونتابع الحلقة الجايه مع قطعة من الجنة على الأرض اسمها لانكاوي.

 

شاهد أيضاً

السفر التطوعي إلى تايلند

السفر التطوعي إلى تايلند : تجربة فرات سامي في التطوع بمزرعة تايلاندية

السفر التطوعي إلى تايلند | الرحالة | رحلة- فرات سامي:   ابتديت يومي الرابع في …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *