الرحالة و المسافرون العرب

سافر بدون مشاكل صحية: لو تعبان متسافرش قبل قراءة التقرير

كتبت- شيرين السيد:

الناس اللي بتسافر الصين أو أمريكا من مصر يومها بيطول أو يقصر أكتر من 8 ساعات أحيانا، ومش بتبقى عارفة تظبط مواعيد الدواء إزاي وتعمل فيه إيه، شوية نقط كده ممكن تتبعها:

1- تخلي ساعتك مظبوطة على البلد اللي خارج منها وتاخد الدوا في نفس ميعاد البلد كل 12 أو 24 ساعة على الساعة دي.

2- تبتدي من قبل ما تسافر ترحل الدوا شوية شوية على ميعاد البلد التانية لو هتقعد مدة طويلة.

3-في أدوية لو مخدتهاش يوم مش هيجرالك حاجة أصلا حتى دوا الضغط والاكتئاب بافتراض أن الضغط منتظم.

4 – أدوية السكر مش مفروض تفوتها ولو بتاخد أنسولين محتاج تقيس أكتر مع العلم إن القياس فوق في الجو مش دقيق وغالبا أقل من العادي بسبب فرق الضغط.

5- جرعة الأنسولين السريع بتاع الأكل هتاخدها عادي مع الاكل وهتتظبط عادي على الأكل اللي بتاكله ويستحسن ماتحقنهاش إلا لما الأكل يجيلك فعلا عشان لو اتأخر ماتهبطش.

6 – جرعة الأنسولين طويل المفعول هتقل أو تزيد على حسب فرق عدد الساعات في التوقيت بين البلدين وعلى حسب الاتجاه… بمعنى انك وانت رايح للشرق اليوم بيطول ولو فرق 8 ساعات مثلا ده كده تلت يوم زاد وبالتالي تلت الجرعة تزيد والعكس لو رايح للغرب

7 – الأنسولين ممكن يتساب بره التلاجة لمدة شهر بس مش منقوع في عز الشمس ولا في تلج. وماينفعش ينحط في الشنط الـ checked in عشان درجة البرودة هتبوظه. خليه في carry on.

8 – كل ساعتين تقوم تتمشى وتحرك القدم دوائر كده عشان تفادي الجلطات، الناس الطويلة أو التخينة احتمالات جلطاتها أعلى.

9 – محدش يسيب الأدوية كلها في شنطة واحدة ويستحسن تكون في carry on اللي بتاخدها في ايدك عشان لو شنطتك ضاعت ماتحتاسش.

10 – اللي مسافر يعمل activities زي غوص مثلا يستحسن مايحجزهاش آخر يوم عشان لو تعب لازم طيرانه يتأجل 18 ساعة أحيانا أو أكتر، ولو طلوع جبل عالي زي إيفريست مثلا ده تكلفته ممكن توصل 40 ألف دولار بالمناسبة لأنك مش هينفع تعمله من غير تدريب ورحلة منظمة مع guide عشان لو عملته لوحدك مش هترجع أصلا ?

11 – في حالات مينفعش أصلا تعمل فيها أنشطة معينة زي مثلا نوبات التشنج وصرع لو حصلت انشالله مرة واحدة في العمر مفيش غوص أصلا فبلاش فتونة هبلة واسأل قبل ما تقرر تسافر أصلا.

حرصًا منا على تقديم أفضل خدمة للقارئ.. إذا كان لديك أي مشكلة مع محتوى التقرير، بخصوص معلومات غير صحيحة أو منسوخة من موقع آخر، أو وجود معلومات تعتقد أنه من المفيد إضافتها، يرجى استخدام هذا النموذج لإفادتنا بالشكوى أو التصحيح أو الإضافة.

اترك رد

لن يتم نشر عنوان بريدك الإلكتروني.