fbpx
الرئيسية / آسيا / مصطفى أمين يكتب رحلة السياحة في جورجيا : خاتشبوري وشاي بالمانجو
رحلة السياحة في جورجيا
رحلة السياحة في جورجيا

مصطفى أمين يكتب رحلة السياحة في جورجيا : خاتشبوري وشاي بالمانجو

رحلة السياحة في جورجيا | الرحالة | رحلة- مصطفى أمين:

الحمد لله سافرت جورجيا قبل حوار التصريح الأمني. ?? الرحلة كانت جميلة جدا. الحمد لله مكانش في حاجة ضايقتنى غير إني رجعت تانى مصر ??

الطيران كان بـ 5700 من شرم إلى جورجيا والرجوع على شرم برضه. كنت قاعد في هوستيل بـ 15 لارىفي لليوم. فى شارع روستافيلى. الرحلة كانت 7 أيام بس.

أول ما نزلت المطار دخلت عشان يتختم لي دخول. سألني على الفيزا أكيد وحجز الفندق. ختم لي وعديت أخدت الشنطة. واشتريت خط من المطار عشان اطمن أهلي. كان بـ 30 لاري. هو كده غالي بس كان فيه مكالمات دولية عشان كده غالى شوية.

رحلة السياحة في جورجيا

طلعت بره ركبت الباص رقم 37. وعلى فكرة اعمل حسابك يكون معاك نص لاري كوين. عشان تدفع بيه. وممكن تفك من أي مكتب صرافة فى المطار.

ركبت الباص وكان معايا أربع شباب مصريين. اتعرفت عليهم أول ما نزلت هناك. كانوا معايا ع الطيارة. ركبت معاهم. ونزلنا بعيد شوية عن المكان اللي احنا عايزينه. عشان نتمشى شويه، وماكنتش عايز أروح الهوستيل عشان أحط الشنط?

رحلة السياحة في جورجيا

على فكرة من غير google maps كنت معرفتش أروح أي مكان هناك، فانت لازم هتستخدمه لأنك من غيره هتتوه مليون المية ?

نزلت من الباص وبعد كده اتمشينا لحد شارع اسمه مرجانشيفلى. بعد كده سبتهم ودخلت المترو اشتريت كارت المترو بـ 3 لارى وشحنته بـ 2 لاري (سعر المترو نص لاري) بعد كده كنت رايح الهوستيل بتاعي ففجأة كلمنى ع النت MostafaSasa , وقالى إنه فى جورجيا وادانى عنوان الهوستيل اللي هو قاعد فيه.

مصطفى أمين
مصطفى أمين

روستافيلي

بعد كده نزلت منطقة روستافيلي لأن الهوستيل كان هناك، ومصطفى كان فى رحلة وراجع بالليل. المهم حطيت الشنط ونزلت بالسيلفى ستيك ? الشارع. وكنت بكلم والدتي واختي ع السكايب. المهم كنت فاتح السيلفى ستيك وحاطط الهاند فرى وبفرجهم ع الشوارع وكده. المهم فجأة لقيت واحد حضنى وعايز يتصور معايا.

أنا الصراحة افتكرته ***** ?? بعد كده فهمت انه بيحسب إنى مذيع وماشى بصور الشوارع وكده. بعد كده لقيت 4 بنات بيتصوروا معايا تانى وناس كبيرة وقاعدين يتكلموا جورجى وانا مش فاهم ولا كلمة بضحك بس رحت قافل الكاميرا خالص ?

كملت مشى حوالى ساعتين بعد كده رجعت تاني بالمترو لمحطة روستافلى. وطلعت الهوستيل استنيت مصطفى عشان يجى وناكل ولأنى مكنتش فاكر اصلا. ونسيت الاكل من جمال البلد. وانى نفسى اشوف كل شىء فيها. المهم نزلت كلت عند محل اسمه البغدادي. وده راجل إيرانى فاتح مطعم حلال قريب من الهوستيل.

رحلة السياحة في جورجيا

تانى يوم بقى كنت متفق مع ناس من برنامج couchsurfing انى أقابلهم ودول قضيت معاهم حوالي 3 أو 4 أيام مش فاكر. بس بنتقابلوا مش ببات عندهم. ومش فاكر فى اليوم التانى أو التالت اتعرفت على AlaaYassine وقررنا نتفسح مع بعض هناك.

طلعنا رحلة زورنا kazbegi – ananuri – guduari ومش فاكر الباقى? كانت رحلة جامدة جدا وأجرنا jet ski وأكلنا الخاتشبورى هناك وفراخ كده غريبة وطبعا اخدنا حوالى 42132 صورة ?? ختمت بحاجة غير متوقعة ان بالليل واحنا راجعين البوليس قفل الطريق لان كان الجو كان وحش ومينفعش نرجع للمدينة تبليسى.

المهم قعدنا في كافى بالليل المنظر منه تحفة، وبعد كده روحنا هوستيل عشان ننام أكيد والصبح روحنا وقفنا ع الطريق. لأن كان فاضي حوالي نص ساعة. والطريق يفتح المهم نزلنا كلنا من العربية. كنا جروب حوالى 16 شخص. نزلنا وضربنا بعض بالتلج تحت كلنا ?? كانت تجربة جميلة جدا عمرى ما هنساها.

بعد كده روحنا الهوستيل بالليل، مصطفى صاحبى حجز تيكيت لمصر ونزل تانى يوم بالليل تقريبا مش فاكر. وتانى يوم كنت بشترى حاجة من الشارع عجبتنى. وفى نفس الوقت كنت بكلم واحد صاحبي، فى التليفون، وبكلمه عربي. المهم كان فى واحد مصري بيشترى نفس الحاجة اللي هشتريها انا.

السياحة في جورجيا
السياحة في جورجيا

تبليسي

المهم اتعرفنا على بعض ورحنا مول تبليسي أنا وواحد صاحبي تاني. بعد كده اتعرفت على حوالي 7 مصريين. والحمد لله كلهم رجالة كويسين جداً. وبسأل عليهم لحد دلوقتى. وهما برضه بيسألوا علي.

المهم روحنا مول تبليسى. كان كبير وفى كل البراندات طبعاً دخلتهم كلهم ?? وبعد كده روحنا ونزلنا بالليل روحنا club. على فكرة مش غالى لو حد عايز يروح club بس فى حاجات غالية فى مناطق تانية.

وخلى بالك لأن انت أول ماتنزل المنطقة بتاعت النايت دي هيتعاركوا عليك. وفى منهم اللي هيعرض عليك حاجات حلوة ?? فانت متردش على حد وادخل أي club انت عايزه. بس نصيحة متروحش لوحدك عشان مش هتبقى حلوة واتعرف على أي حد هناك وروح معاه ده لو لوحدك لو شلة بقى هتظيط???

بعد كده روحت مش شايف حاجة قدامى روحنا الساعة 6 او 5 الصبح مش فاكر والله ? نمت وصحيت الساعة 10 الصبح وكنت فايق ازاى مش عارف ?

كاوتش سيرفينج

الناس اللي اتعرفت عليهم من برنامج الكاوتش سيرفينج كانوا 4 بنات كل واحدة ودتنى مكان مش فاكر اسمه. غير آخر يوم واحدة هناك اتصاحبت عليها ودتنى مكان اسمه mtatsminda تقريبا ودا فوق جبل كده يعتبر park كبيرة جداً وملاهى وكده. وكان يوم جامد جداً وفى مطعم ضخم هناك وأنا كنت بحسبه البرج بتاع الكهربا ده أو الشبكة لأنه شبهها قوي ????

المهم الرحلة كانت جامدة جداً ومع انى كنت مسافر لوحدى بس اتعرفت على ناس هناك مكنتش ملاحق اخرج مع مين ?? وعلى فكرة الشباب هناك 90% منهم بيتكلم انجلش ومتوقفش حد كبير لأنهم مش بيعرفوا انجلش نهائي. يعنى ممكن واحد من المليون.

المطاعم الحلال كتير قوي هناك والخاتشبوري ده الأكلة الرسمية بتاعتهم. هي زي فطيرة بالجبنة بس طعمها جامد جدا. ولو في كاتشب يبقى احتمال تاكل الطبق. ?? وفى ماك وكنتاكى وبيتزا دومينوز وهات أكيد. يعنى لو غلبت ادخل ماك كل أي شىء وجرب FUSE TEA شاي بالمانجة بس جامد قوي وفى كانز

السياحة في جورجيا
السياحة في جورجيا

التسوق في جورجيا

– مكاتب الصرافة هناك متوفرة فى كل مكان و مكاتب السياحة في جورجيا متوفرة برضه وناس عربية وجورجية شوف انت عايز ايه وروح. الرحلات هناك معقولة يعنى رحلة لـ 3 أو 4 مناطق بحوالى 35 لاري.

– الأكل هناك رخيص يعنى لو اشتريت فرخة من كارفور بـ 7 لارى كيلو مثلا. والخضار أسعاره معقولة جدا. والفاكهة كذلك. وأكيد لازم تروح كارفور عشان تشوف عندهم أكل إيه. وإيه اللي مش موجود عندنا. زي مثلا عندهم سمك السلمون. كان نفسى أجيبه بس كسلت أعمله في الهوستيل? وعندهم جبنة مدخنة عامل زى الجبنة التركى كده بس دى مدخنة.

– الهدوم هناك أسعارها زي هنا وأغلى كمان. يعني أنا كنت شارى حاجة من ZARA هناك جيت لقيتها هنا بنفس السعر بالضبط.

– الهدايا بقى انا اشتريت من شارع روستافيلى بعد محطة المترو فى ناس ياما بتبيع حاجات كتير ولوح وهدايا وكداه يعنى أكيد هتشترى حاجة أثناء السياحة في جورجيا كذكرى.

العمل في جورجيا

– الشغل بقى هناك صعب جدا مستحيل تشتغل لو انت رايح وفى نيتك انك تشتغل مش هتلاقى ممكن تفتح بيزنس زى مطعم مثلاً لكن انك تشتغل عند حد صعب قوى ولو لقيت مش هيكفيك غير أكلك بس.

– جوجل maps ده من غيره مش هتعرف تمشى وانت مطمن انك هترجع الهوستيل تانى??ع الاقل هيعرفك انت فين وهتروح على فين وبعيد اد ايه عن الهوستيل او عن المنطقة اللي عايز تروحها.

الفيزا دلوقتى لازم تروح السفارة تاخدها عشان التصريح الأمنى (يعنى كده الفيزا الأون لاين اتلغت بالنسبة للي سنهم أقل من 40 سنة).

السياحة في جورجيا
رحلة السياحة في جورجيا

نصيحة أثناء رحلة السياحة في جورجيا اشترى كارت المترو ده لانك هتحتاجه هو بـ 3 لارى واشحنه بـ 5 لاري لانك هتستخدمه فى الباص والمترو وهتركبهم كتير قوى هناك.

(على فكرة مسلسل خرم ابرة لما احمد سعد سافر فيه كان فى جورجيا (y) )

جورجيا بلد جميلة جداً من حيث كل حاجة واللي يقول غير كده يبقى مرحهاش، *لو في أى سؤال اسأل وهرد عليك اكيد.

أنصحك أيضًا بقراءة:

السياحة في جورجيا .. أجمل 6 اماكن سياحية في جورجيا : بينها جبل كازبيك

الاماكن السياحية في جورجيا : أفضل 10 مناطق يمكن زيارتها في جورجيا

رحلتي الى جورجيا | رحاب أحمد تكتب رحلتها إلى جورجيا: برنامج سياحي كامل

المدن السياحية في جورجيا | تعرف على أهم 5 مدن سياحية في جورجيا

الدراسه في جورجيا | تجربة شخصية ليوسف عادل: حققت حلمي في تبليسي

عاصمة جورجيا | عمرو المغربي يكتب رحلته إلى جورجيا: برنامجك الكامل في تبليسي

تأشيرة جورجيا | عمرو المغربي يكتب تجربته: جورجيا.. فيزا من غير طوابير

عبد الرحمن أيمن يكتب عن الاماكن السياحية في جورجيا : السياحة في تبليسي

جورجيا سياحة | أهم المعالم السياحية في جورجيا: رحلة إلى دولة البطريق

شاهد أيضاً

رحلتي الى جزيرة بوكيت

رحلتي الى جزيرة بوكيت : تجربة فتاة مصرية عمرها 19 عامًا

رحلتي الى جزيرة بوكيت | الرحالة | رحلة- بسمة محمود:   أنا بسمة 19 سنة، …