fbpx
الرئيسية / آسيا / رحالة مصري يرصد الاحتفال برأس السنة الصينية في هونج كونج: احنا مش عايشين

رحالة مصري يرصد الاحتفال برأس السنة الصينية في هونج كونج: احنا مش عايشين

رحلة- السيد مصطفى:

احنا نص الليل في هون كونج، أنا تقريبا آخر واحد ماشي في الشارع، اليوم التاني لاحتفال رأس السنة الصينية. طول عمري بتجنب التجمعات في مصر، بالأخص في الأعياد أنا وأي حد أعرفه، بسبب السفالة اللي بتحصل في الشوارع .

دي أول مرة أشوف الألعاب النارية وهي بتتعمل بجد، حاجة خرافة. أول مرة أشوف البراشوت وهو بينضرب في الجو مش على الأمن المركزي، الألوان في كل حتة. العيلة وهي لابسة الحتة اللي علي الحبل ونازلة تتمشى في الشارع.

الناس وهي من كل الأعمار وكل الألوان والجنسيات، أبيض بني أسمر أصفر مش فارقة، كلهم في الشارع، متر في متر، و ملايين البشر والبوليس بيأمن بجد. البوليس بينظم الحشود دي كلها زي الساعة.

البوليس كمان اعتذر لي علشان وقف الطريق قبل ما أعدي علشان يفتح الطريق للاتجاه التاني، وقبل ما يفتح لي الطريق بيديني تعليمات بالإنجليزي إني ما أجريش و لا استعجل المشي علشان اللي ورايا مش يجيله ذعر ولا الناس تخاف. البوليس بيقول لي إني عندي مسؤولية تجاه الناس اللي ماشية ورايا ولازم أحافظ علي سلامتها.

الاحتفال بدأ 8 مساء وخلص 9 بالضبط ولسه في بكره كمان، مفيش تحرش ولا سفالة ولا قلة أدب ولا ذعر، في الاحتفالات كان كلهم لابسين جيبات قصيرة وعدد مهول من البشر في الشارع وكان في خمرة ومفيش خناقة واحدة ولا في حالة تحرش جنسي واحدة والشارع نضف بعد الاستعراض بساعة.. رجع نضيف زي الأول بالضبط.

وبعد كل ده ما خلص، الناس عملوا طوابير أوتوماتيك علشان يدخلوا محطة المترو ويركبوا الأتوبيس. طابور طوله اثنين كيلو متر خلص في ٤٥ دقيقة. محدش فكر ياخد دور حد ولا يركب بالواسطة ولا يطلع يركب من غير دور، ولا واحد دور علي حد يعرفه يدخل قدامه، والأولوية لمتحدي الإعاقة وكبار السن والحوامل.

أنا أول مرة أحس إني عايش بجد ومروح الفندق طاير، احنا مش عايشين في مصر، احنا حكامنا سرقونا وقتلونا وضيعونا لما خربوا نظام تعليمنا، ويستحقوا الإعدام علي الجريمة دي بس.

المهم كده الواحد احتفل برأس السنة الهجرية ورأس السنة الميلادية وحاليا بيحتفل برأس السنة الصينية =D .الجميل إني شفت كوريا وفيتنام وهونج كونج وهم بيحتفلوا بعام الديك والزخارف في الشوارع واختلافها =D فكل سنة وانتم طيبين بمناسبة رأس السنة الصينية =D عام الديك

شاهد أيضاً

أجمل 9 اماكن في بوكيت

أجمل 9 اماكن في بوكيت : بينها معبد شالونج وجزيرة سيميلان

أجمل 9 اماكن في بوكيت | الرحالة | تايلاند تلك الدولة الساحرة الجاذبة للسياح، نظرً …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *