الرحالة و المسافرون العرب

دليل السفر حول العالم : الطيران الفنادق المواصلات الاكل والاماكن السياحية

دليل السفر حول العالم | الرحالة | تجربة- نادر سليمان وإبراهيم النادي:

 

ده البوست المحبب للمصريين والعالم العربي، يلا كله يتجمع هنا ويركز معانا  😀

في ناس كتير بتسألنا انتو بتسافروا ازاي وبتعملوا إيه، طبعا ناس كتير عارفه الكلام اللي حنكتبه دلوقتي بس فيه ناس كتير جديده بسكة السفر لازم تعرف الموضوع ده، واحنا عايزين كل الفئات تسافر ومتنحرمش من لذة السفر ومننساش إن أي حد ممكن يسافر مفيش عمر معين أبدا.

دليل السفر حول العالم

قبل أي حاجه انت عارف إنك ممكن تسافر دوله واحدة بـ 5000 جنيه (2000 ريال) وممكن أقل (انت وشطارتك) لمدة أسبوع شامله كل حاجه لشخص واحد؟!، تعالوا نعرف ازاي:

 

أولا قبل أي حاجه لازم نعرف إن باسبورنا ماشاء الله قوي جدا، وفيه دول كتير محتاج نجبلها فيزا من السفاره، 😀 لو عايز تعرف ايه الورق المطلوب بالظبط أدخل هنا:

http://www.ta2shira.com/

وفيه دول كتير من غير فيزا أو عند الوصول بالمطار أو أونلاين هنوضحها في موضوع لوحده بالتفصيل.

نبدأ الجزء الأول حجز الطيران :

ودي بتبقى اغلى ميزانيه بالرحلة بس الموقع ده  skyscanner.comبيجبلك أرخص تذكرة في اليوم اللي تحدده وكمان فيه مميزات كتير زي إنك تحدد أرخص شهر أو أرخص رحله لأي دولة بالعالم.

 

الجزء التاني من الرحلة وهو السكن وطبعا عندك 4 اختيارات :

 

هوستل

وده أقل من الفندق بيكون علي شكل أكتر من سرير في غرفه (dorm room) فيه مكس أو للبنات فقط، وفيه غرف خاصة لو حابب (private room)، والهوستل أجمل طريقة للإقامة لأنك هتحس إنك في بيتك، ليك كل الصلاحيات زي المطبخ والصالة، إلخ، ده غير إنك هتقابل رحالة كتير زيك (مش سياح)، هتتعرفوا على بعض وممكن تكسبوا علاقات حلوه .وتقدروا تحجزوا الهوستيل من الموقع ده:

Hostelworld.com

 

أو الفندق وهو الخيار المعروف لأغلب الناس بس الموقع ده بينزل عروض كتير

booking.com

 

وكمان عندك شقق ناس بتأجرها على النت بتبقي شقه كامله أو غرفه بشقة وأسعارها بسيطة برضه من الموقع ده:

Airbnb.com

 

أو ممكن تسكن ببلاش عن طريق حد يستضيفك، بتتواصل مع الشخص وممكن يوافق أو لا ودي ناس كتير حتحبها عشان أبو بلاش كتر منه  😀

Couchsurfing.com

 

وطبعا لازم في أي موقع فيه حجز يكون معاك فيزا من البنك للشراء أو الدفع على النت?

دليل السفر حول العالم

الجزء التالت وهو المواصلات :

 

خليك مع أهل البلد، انت مش سايح، انت مسافر، يعني اركب أتوبيس عام، اركب توكتوك، اركب المترو أو القطر وفيه طرق كتير لأهل البلد وكل بلد على حسب وضعه، ده غير موضوع الـ hitchhiking اللي هو بتشاور لاي حد بطريقه معينه وحياخدك بطريقه والموضوع ده منتشر كتير بالعالم واحنا جربناه ممكن تبحث عنه.

وطبعا اوعى تركب الوحش المعروف باسم التاكسي في أي مكان بالعالم إلا للضروره زي مثلا لو رحلتك بالليل ومفيش مواصلات عامه اركب تاكسي للسكن غير كده لا، وعندك أحسن تطبيق للموبايل بيعرفك تركب ايه ومن اي محطه والمدة وكل حاجه في اي مكان بالعالم اسمه Rome2rio.

 

الجزء الرابع وهو الأكل :

لازم برضه تاكل زي أهل البلد مش تروح مطاعم وكافيهات غالية، كده انت مش هتحس بالتغيير لأن الأكل مهم هيعرفك ثقافات كتير، ولو اضطريت زي بعض الدول في شرق آسيا أكلهم غريب شويه عندك معظم الماركت بتبيع تونة أو فطاير ومشي نفسك.

 

الجزء الاخير إزاي نعرف الاماكن السياحية

طبعا أول ماتوصل المطار في أي مكان بالعالم اشتري شريحة نت عشان تعرف توصل للسكن أو الأماكن اللي هتزورها وده مهم جدا، والأماكن في أي مكان بتشوفها في جوجل شرح وصور أو فيديو تفصيلي باليوتيوب وتكتب مثلا top things to do in bali ده غير إن فيه برنامج اسمه trip advisor وده بيوريك أحسن الأماكن في أي بلد وإيه عيوب ومميزات البلد دي وحاجات كتير، وعندك الخريطه بتاعت البلد بالتفصيل بتتوزع بالمطارات أو السكن اسأل عنها.

 

طبعا اللغه اللي ناس كتير خايفه منها وازاي تتعامل لازم تعرفوا ان الانجلش لغة العالم ومعظم الشباب بيتكلمها بكل الدول ومش لازم تكون متقن اللغه 100% المهم تعرف تتعامل وتعرف الأساسيات بس.

دليل السفر حول العالم

فلوس السفر

أخيرا حابين نقول بلاش السؤال المعروف للكل ازاي بتجيبوا الفلوس أو عايزين نسافر بس فين الفلوس، حابين نفهمكم إن الفلوس بتتجاب بأي طريقه بس الفرق بقى اللي بيصرفها فين وبيحوشها على ايه؟!! راجعوا نفسكم كويس ..أما بقى اللي بيسألونا نشتغل إزاي برا أو ندرس أو نهاجر إزاي مش هنعرف نفيدكم، لأن دي مواضيع تانية ومعقدة احنا بنساعدك تشوف العالم إزاي بأقل تكلفة وبأحلى طريقة.

لو اتبعتوا الخطوات دي بالتفصيل صدقونا هتوفروا كتير وهيروح مفهوم السفر الغالي والصعب اللي بدماغ الأغلبية، وكل سطر مكتوب عن تجربة، أتمنى نكون أفدناكم منتظرين تجاربكم  :)وبكده خلصنا جولتنا في خليج هالونج باي بفيتنام، وراجعين انتظرونا في مدينه خيالية جديدة.. زود السرعه ياهيمااااااا 😀 ?

اترك رد

لن يتم نشر عنوان بريدك الإلكتروني.