fbpx
الرئيسية / رحلات / الرحله | حازم بدر يكتب عن الرحله الكومبو: سافر 6 دول في 32 يوم

الرحله | حازم بدر يكتب عن الرحله الكومبو: سافر 6 دول في 32 يوم

الرحله | الرحالة | رحله- حازم بدر:

في أكتوبر الماضى عملت رحله كومبو 🙂 شملت ٦ دول: ماليزيا وكوريا والصين وهونج كونج وتايلاند وتركيا لمدة ٣٢ يوم، هتكلم هنا عن التأشيرات وتذاكر الطيران والفنادق والمزارات السياحية المهمة، أربطوا الأحزمة واستعدوا للإقلاع 🙂

تاشيرة ماليزيا وكوريا الجنوبية وهونج كونج

– ماليزيا وكوريا وهونج كونج بدون تأشيرات للمصريين وان كان فيه بعض التدقيق مع المصريين في كوريا وأقل منه في هونج كونج، وهتكلم بالتفصيل عن كل حالة.

تاشيرة تركيا

– فيزا تركيا أخدتها أون لاين لأنى أكبر من ٤٥ سنة ولو انت أقل من ٢٠ سنة أو معاك فيزا شنجن أو أمريكا ممكن تعمل فيزا تركيا أون لاين برضه وبدون أي أوراق لا تذكرة ولا فندق ولا حساب بنكى، بس هناك في المطار ممكن يسألك عن تذكرة العودة وحجز الفندق.

اقرأ أيضًا: أسرار استخراج تاشيرة تركيا : 10 معلومات يجب أن تعرفها

تاشيرة تايلاند

– فيزا تايلاند بتطلع بعد ٤٨ ساعة من سفارتها في الدقى وبتكتب الأبليكاشن أون لاين وتطبعها وترفق معاها كشف حساب بنكي لمدة ٣ شهور وخطاب من جهة العمل وتذكرة طيران مبدئية وحجز فندق باسم المسافر وصورتين خلفية بيضاء وطبعا جواز السفر.

تاشيرة الصين

– نفس الأوراق بتاع تايلند قدمت بيها في قنصلية الصين في إسكندرية بس كنت عامل كشف الحساب لمدة ٦ شهور والأبليكاشن بتكتبه يدوى في القنصلية وبتطلع خلال ١٠ أيام أو تلات أيام أو في نفس اليوم لو دفعت رسوم زيادة.

الرحله

التصريح الامني

أنا مليش تصريح أمنى لأنى عديت الـ ٤٠ سنة وبيفرق التصريح الامني من دولة للتانية ومن مهنة لأخرى.

 

ترتيب الرحله وتذاكر الطيران

رتبت المدن طبقا لحاجتين: الأولى الطيران الأرخص والتانية إني رتبتهم مدينة رخيصة وراها مدينة غالية وهكذا عشان أقدر أتحكم في المصاريف والعملية ما تضربش مني 🙂

حجزت للرحله دى خمس تذاكر:

التذكرة الأولى على التركية من القاهرة لكوالالمبور والعودة من بانكوك لإسطنبول ثم العودة من إسطنبول للقاهرة (كل دى تكت واحدة كان سعرها أون لاين ٥٨٥ دولار وانا اشتريتها من مكاتب الطيران اللى في التحرير بـ ٥٢٠٠ جنيه مصرى ساعتها).

الرحله من القاهرة الى كوالالمبور

انطلقت من القاهرة يوم الجمعة سبعة أكتوبر على التركية وعملت ترانزيت في إسطنبول أقل من ساعتين وركبنا تانى إلى كوالالمبور في رحلة طيران لمدة عشر ساعات.

وهنا في ملاحظتين، الإماراتية أفضل كتير من التركية من حيث الراحة في الطيارة كمان المدة من دبي لكوالالمبور حوالي سبع ساعات طيران.

فبالتالى الأفضل إلى ماليزيا الطيران الخليجى لأنه أفخم وأقل وقتا ومن أفضل الشركات الخليجية الإماراتية والقطرية.

الرحله الى كوالالمبور

رحله في كوالالمبور

وصلت مطار كوالالمبور السبت قبل المغرب والتعامل في مطار كوالالمبور سلس جدا مفيش فيه أي تعقيدات ومن المطار إلى المدينة عندك عدة اختيارات:

التاكسى بحوالى ٨٠-١٠٠ رنجت

جراب كار بحوالى ٦٠ رنجت

القطار إلى KL Sentral بـ ٥٠ رنجت

الباص إلى KL Sentral بـ ١٠ رنجت

نزلت في هوستل قريب من محطة المترو بازار سينى اللى هى على بعد محطة واحدة من السنترال وكان موقعه نموذجى قريب من كل المعالم الهامة اسمه ترافل هوب من موقع بوكينج

الاماكن السياحية في كوالالمبور

طبعا ناس كتير جدا اتكلمت عن كوالالمبور وماليزيا وعشان كده هاقول عناوين بس

1- البرجين التوأم ومول سوريا

2- برج المنارة

3- شارع العرب

4- حديقة الطيور

5- سنترال ماركت

6- تشاينا تاون

7- جنتنج هايتس

8- كاميرون هايتس

9- وطبعا لو عندك وقت أطول في ماليزيا ممكن تزور بينانج ولنكاوى وملاكا.

الرحله في الصين

المطاعم في كوالالمبور

الأكل الآسيوى عموما مش مستساغ لنا لكن الأفضل هو الأكل التايلاندى وأنا كنت في الأغلب باكل سى فود وباكل في فود كورت بتاع مول سوريا اللى تحت البرجين التوأم.

الرحله من ماليزيا الى كوريا الجنوبية

التذكرة التانية من كوالالمبور لسيول على إير اسيا ودى حجزتها من كوالالمبور بـ ١٢٥ دولار بدون شنط ولا وجبة وكان معادها يوم الخميس ١٣ اكتوبر الساعة ٨ صباحا من المطار الاقتصادى في كوالا KLIA2.

خرجت من الهوستل الساعة ٤.٥ الفجر وركبت تاكسى بـ ١٠ رنجت للسنترال وأخدت الباص للمطار الاقتصادى بـ ١١ رنجت الساعة ٥ وصل حوالى ٦ وركبت إير اشيا لمدة ٦ ساعات لحد سيول.

وصلت مطار انشون بسيول الساعة ٣ العصر وفي المطار استقبلونى استقبال حافل غالبا لأنى مصرى:)

الرحله في كوريا الجنوبية

اخدونى لصالة وعملوا معايا زى إنترفيو بتاع السفارة وجاى ليه وهتروح فين وشافوا تذكرة العودة وحجز الفندق وبعدين اعتذروا لى وختموا لى دخول لمدة شهر.

اشتريت كارت المواصلات من المطار بـ ٦٠٠٠ وون كورى وشحنته بـ ١٠٠٠٠ وون وركبت القطار وبعدين المترو لحد الهوستل الجميل “كيمتشى”.

كوريا أبهرتنى الحقيقة تحس إنك في أوروبا مش آسيا، شوارع جميلة جدا ومحلات عالمية وشبكة مترو عظيمة وحديثة أفضل من مترو باريس، باصات جميلة ومناطق سياحية وشوبنج رائعة في إيتايوان ودونج ميونج وغيرها كتير وممكن أبقى أنزل لكم ملف عن أشهر الأماكن السياحية في كوريا.

الاماكن السياحية في كوريا الجنوبية

1- برج إن سول الجميل

2- القصور الإمبراطورية

3- منطقة التسوق دونج ميونج واللي فيها مسرح العرض الكوري الشهير نانتا.

4- منطقة إيتاوان السياحية واللي فيها المركز الإسلامى والمطاعم الحلال ومناطق الشوبنج

5- رحله المنطقة العازلة بين الكوريتين

الرحله من كوريا الجنوبية الى الصين

التذكرة الثالثة كنت حاجزها أون لاين على طيران جنوب الصين من سيول لبكين يوم الثلاثاء ١٨ أكتوبر الساعة ١٢ الظهر من مطار جيمبو واللي لا يقل عن مطار انشن الرائع.

وصلت بكين الساعة ٣ العصر وزى ما كان التعامل راقى جدا في القنصلية الصينية كان برضه في مطار بكين واستغرق الدخول دقائق قليلة.

برضه اشتريت كارت المواصلات بـ ٢٥ يوان وشحنته بـ ٥٠ يوان من المطار وسحبت فلوس صينى من الماكينة بالكريدت كارد بس خدوا بالكم مش كل المكن بيشتغل مع الكروت المصرية.

ركبت القطار برضه لقلب بكين وبعدين المترو لهوستل “دراجون” في بكين القديمة.

الاماكن السياحية في بكين

1- طبعا رحله سور الصين العظيم

2- رحله معالم بكين (ميدان تيان ان مين- بوابة السماء- المدينة المحرمة- معبد السماء- القصر الصيفي).

3- مسجد نيوجى (أكبر وأقدم مسجد في بكين)

4- منطقة الشوبنج والماركات العالمية والمطاعم في “وانج فوجينج”

5- محطة قطارات بكين العظيمة واللي تشبه محطة قطارات القاهرة ومحطة قطارات الإسكندرية. بس تخيل انك ممكن تركب القطار من بكين لحد موسكو شمالا وهونج كونج جنوبا وقريبا لحد لندن غربا.

اقرأ أيضًا: الرحلة | حازم بدر يواصل الرحلة الكومبو: هونج كونج – بانكوك – اسطنبول

حجز فنادق تركيا من Booking

فنادق اسطنبول – فنادق طرابزون – فنادق فتحية – فنادق انطاليا – فنادق مرمريس – فنادق انقرة – فنادق بودروم – فنادق بورصة – فنادق ازمير – فنادق اوزنجول

مقارنة أسعار الفنادق في تركيا من مواقع مختلفة

الفنادق في اسطنبول – الفنادق في طرابزون – الفنادق في فتحية – الفنادق في انطاليا – الفنادق في مرمريس – الفنادق في انقرة – الفنادق في بودروم – الفنادق في بورصة  – الفنادق في ازمير – الفنادق في اوزنجول

العمل في الخارج

فرص عمل في الخارج – سجل السيرة الذاتية للعمل في الخارج

شاهد أيضاً

السياحة في جاكرتا

السياحة في جاكرتا للمسافرين العرب: برنامج سياحي لزيارة شامل

السياحة في جاكرتا | الرحالة |   سيداتي ساداتي، معكم قبطان رحلتكم، أبلغكم بأن طائرة …