الرئيسية / آسيا / بهاء فاروق يكتب رحلته إلى جزيرة جيمس بوند في تايلاند : تصلها عبر مغارة
جزيرة جيمس بوند في تايلاند
جزيرة جيمس بوند في تايلاند

بهاء فاروق يكتب رحلته إلى جزيرة جيمس بوند في تايلاند : تصلها عبر مغارة

جزيرة جيمس بوند في تايلاند | الرحالة | رحلة- بهاء فاروق:

 

رحلتنا النهارده كانت لجزيرة من أشهر وأجمل جزر بوكيت في خليج فانج نجا وأسمها جزيرة جيمس بوند أو جزيرة تابو (اتسمت بالاسم ده علشان فيلم من أفلام جيمس بوند اتمثل عليها man with the golden gun).

 

خليج فانج نجا يقع شمال جزيرة بوكيت وكله مسلمين والمراكب كمان بيكون الطاقم كله مسلمين اللي بيشتغلوا عليه وطبعا كل الأكل حلال.

 

جزيرة جيمس بوند في تايلاند

 

بخصوص رحلة جزيرة جيمس بوند في تايلاند دي تقدر تروحها بكذا طريقة: المركب السريع أو المركب الكروز أو المراكب الخشبية الطويلة, أنا دائما بفضل في الرحلة دي المركب الكروز للاستمتاع بالمناظر الطبيعية الرائعة على طول المسافة لحد ما توصل للجزر وكمان تنفع قوي هواة التصوير.

 

ملحوظة: فيه شركات كتير بتطلع للجزيرة دي وبأسعار مختلفة لكن نصيحة اختار شركة نظيفة وموثوق فيها علشان مستوى الخدمة والأكل والمركب يكون نظيف 😉

 

خليج فانج نجا

 

السواق وصل بالسيارة حسب الاتفاق في الموعد الساعة 8 صباحا والمسافة إلى الميناء حوالي ساعة, وبعد الوصول بتتحرك بالمركب الكروز (مركب دورين) علشان تستمتع بأحلى مناظر ممكن تشوفها لخليج فانج نجا.

 

خلال الرحلة بتزور أكثر من جزيرة وهم: باناك وهونق وجيمس بوند ولاوا وكل مرة السفينة بتتوقف وبتنزل قوارب مطاطية وكل اتنين بيركبوا مركب (وبيكون معاهم فرد من الطاقم هو اللي بيجدف) ويبدأوا يدخلوا داخل مغارات علشان يوصلوا للجزيرة, بجد مغامرة ممتعة, طبعا المناظر داخل المغارات حاجه خيال, بس متتخضش لو بصيت فوقك لقيت خفافيش ولا حاجة.

 

المهم داخل المغارات دي بتشوف تكوينات للصخور من ملايين السنين لحد ما بتوصل لمنطقة محصورة بين الجبال اسمها غابات المانجروف بيكون الشجر فيها طالع من البحر وكل جذوره داخل البحر. توقفنا مرتين بالمركب الكروز علشان ندخل المغارات دي والثالثة كانت الى جزيرة جيمس بوند

 

جزيرة جيمس بوند

 

ملحوظة: على جزيرة جيمس بوند هتلاقي أكشاك كتير ومسلمات بيحولوا يبيعوا لك منتجات زي اكسسوارات وتذاكارات, لو عجبتك حاجة فاصل كويس ولو حسيت إنها تستاهل فعلا مفيش مانع تنفعهم برضه واعتبرها صدقة لأنهم غلابة جدا وعايشين على بيع الحاجات دي للسياح فقط.

 

بعد ما رجعنا المركب كان وقت الغداء (وده بيكون على نفس المركب) مع ملاحظة ان المشروبات والفاكهة طوال الرحلة كانت بتقدم على المركب مجانا, عبارة عن (أسماك ورز وسلاطات وفراخ واناناس محمر وأنواع فاكهة رهيبة وعصاير), الأكل كان جيد جدا ومكنش فيه أي مشاكل.

 

جزيرة جيمس بوند في تايلاند

 

آخر جزيرة وصلنا ليها اسمها لاوا, وده بيكون وقت حر تقدر تنزل البحر تسبح أو تعد على الجزيرة أو تاخد مركب وتجدف لوحدك. الرحلة رائعة بكل المقاييس ومتتفوتش لأنك هتشوف مناظر للطبيعة سبحان الله عليها. وطبعا هواة التصوير مش هيشبعوا تصوير.

 

ملحوظة: وانت رايح هتكون لابس المايوه وتي شيرت, وتاخد صن بلوك, والكاميرا طبعا وتكون مشحونة كويس وشنطة فيها منشفة صغيرة.

شاهد أيضاً

الاماكن السياحية في بوكيت

أجمل الاماكن السياحية في بوكيت : بينها سوق تشاو فاه والمنزل المقلوب

الاماكن السياحية في بوكيت | الرحالة |   الاماكن السياحية في بوكيت لا تعد ولا …