fbpx
الرئيسية / الشنجن / تعرف ان ممكن تاخد شنجن وضابط الجوازات يرفض دخولك: تعرف كيف تتعامل معه

تعرف ان ممكن تاخد شنجن وضابط الجوازات يرفض دخولك: تعرف كيف تتعامل معه

تجربة- بهاء فاروق:

تصدق إنك ممكن بعد ما تاخد فيزا شنجن وتسافر ممكن موظف الجوازات يرفض دخولك، للأسف ده حقيقي, فحصولك على الفيزا لا يضمن 100% إنك تدخل دول أوروبا, موظف الجوازات ليه السلطة إنه يرفض دخولك للدولة لو شك في أمرك وممكن يرجعك بلدك على نفس الطيارة، لكن هقولكم على الأسرار اللي تخلي دخولك من الجوازات مضمون 100% إن شاء الله.

أسرار الدخول على موظف الجوازات في المطار:

أولا: حاول على قد ما تقدر أنك تكون واخد الفيزا من البلد اللي هتزورها أول شيء, لأن لما بيلاقوا العكس بيغلسوا عليك شوية, ويسألوك 100 سؤال.

ثانيا: تدخل وانت مبتسم وتدي له جواز سفرك ومتحاولش إنك تلفت النظر ليك في الطابور بإنك تكلم بصوت عالي أو تعمل أي حاجه تلفت انتباه الشرطة ليك, علشان محدش يركز معاك.

ثالثا: وده أهم شيء, إنك تكون محضر خط سيرك بالتفصيل الممل وطابع كل الورق في ملف ومرتبه تبعا لتاريخ الحدث, ويا سلام لو عملت بالنصيحة وحجزت الرحلات أون لاين.

رابعا: طبعا هتتسأل للمرة الـ 100 انت داخل تعمل إيه؟، لازم تجاوب إجابة مقنعة 100% يعني كل حاجة بإثبات, إزاي؟، توضح له أنا هقعد في دولتكم دي كذا يوم وده حجز الفندق وهروح المكان الفلاني والمكان الفلاني ودي حجوزات الرحلات السياحية أون لاين وتعرفه إنك علشان تروح لهم هتروح لهم إزاي وهتركب أي مترو وبيفتحوا امتى وسعر تذكرتهم كذا وبعدين هسافر للدولة الفلانية وده حجز الطيران ليها وهزور فيها كذا وكذا ودي تذاكرهم وهكذا.

ده هيخليه وهو مغمض يقتنع انك داخل فعلا للسياحة وعارف كويس انت بتعمل ايه وهيختم لك دخول مباشرة.

تجربة شخصية: في آخر سفرية لي لأوربا, كنت واخد الفيزا من هولندا وفعلا سافرت على أمستردام وكنا 4 شباب, وأنا واقف في الطابور شفت كذا واحد مش بيختم له ويرجعه تاني لمكتب آخر ويعملوا معاه زي تحقيق صغير, طبعا أنا حطيت إيدي على قلبي، احنا كل أوراقنا مظبوطة, بس 4 شباب وجايين أوروبا وعرب يبقى لازم نظبطهم 🙂 , المهم طبعا أنا منظم الرحلة فدخلت أول واحد واديت الظابط الجواز ودار الحوار التالي:

الظابط: انت جاي ليه؟

أنا: حضرتك جاي سياحة.

الظابط: جاي لوحدك؟

أنا: لأ معايا 3 أصدقائي

الظابط: أيوة يعني هتعمل إيه انت وأصدقائك؟

أنا: (رحت مطلع له الملف, طبعا الظابط شافه اتخض ههههههه لأنه كان تقريبا 100 ورقة) بدأت أشرح له الملف، هقعد في أمستردام 3 ليالي وحاجز في فندق كذا وحاجز متحف رايكس وده فيه لوحات لفنانين كذا وكذا علشان أنا بحب الفن جدا, ودي تذاكر الدخول (أنا طبعا حاجز كل خطوة أون لاين قبل السفر) وحاجز جولة في النهر ودي التذاكر وجولة سياحية ودي التذاكر وسهرة بالليل في المكان الفلاني وهيكون فيه فلان الفلاني, طبعا الظابط سمع الكلام ده اتمزج على الآخر وحس إني هولندي أصلا هههههه.

الظابط: انتي اشتغلي ايه؟

أنا: مهندس

الظابط: آه علشان كده بتكلم إنجليزي كويس

أنا: ابتسامة لطيفة 🙂

الظابط: (وطبعا وهو مبتسم اتأكد ان أوراقي كلها سليمة, ختم مباشرة بدون أي تفكير) نادي أصحابك اللي معاك (كانوا طبعا واقفين بعدي).

طبعا ختم كل الجوازات بعد ما اتأكد إن كلنا جايين سياحة والملف ميخرش الميه

الظابط: Welcome  to Amsterdam

معلومة: بمجرد دخولك لأي دولة من دول أوروبا مفيش أي حد هيسألك تاني على جواز السفر طول ما انت بتتنقل بين دول أوربا لحد ما تطلع من دول شنجن كلها مره تانية.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *