fbpx
الرئيسية / الشنجن / بهاء فاروق يكتب أسباب رفض تأشيرة شنجن وكيفية الاستئناف

بهاء فاروق يكتب أسباب رفض تأشيرة شنجن وكيفية الاستئناف

تجربة- بهاء فاروق:
ناس كتير بعتت لنا إنها قدمت على فيزا شنجن وجالها رفض، ومش عارفه إيه السبب مع إن أوراقها كاملة وسليمة, ومش عارفه إيه الخطوة الجايه بعد الختم المنيل، اللي اتختم بيه على باسبورنا بالرفض (هل هتظل علامة عار في جواز سفرنا لمدة 7 سنين؟!، طيب هل ممكن نقدم تاني, طيب ينفع أعمل استئناف؟)، أسئلة كتير أكيد بتدور في ذهنك بعد الرفض الأليم من السفارة. لو الموضوع يهمك كمل قراءة وإن شاء الله على الأقل هتفهم القصة ماشية إزاي, ولو برضه بتفكر إنك تقدم على شنجن، أكيد الموضوع هيهمك علشان متقعش في الأخطاء دي 🙂
خلينا الأول نعرف أسباب الرفض: بعد ما بيتم الرفض (لا قدر الله) بيدولك في السفاره ورقة مكتوب فيها سبب الرفض، وبيكون أمامك 30 يوم تقدر فيهم تعمل طلب استئناف.
1- طالب التأشيرة لم يبرر غرض وشروط الزيارة المطلوبة: وده أهم وأكثر سبب للرفض وبيكون لو الموظف غير مقتنع بأسباب الزيارة, يعني انت موضحتش كويس مسافر ليه, ومش موضح خط سير الرحلة، أو لم يتم تقديم الأصول كوثيقة التأمين أو خطاب العمل, أو كشف الحساب, أو انتهت صلاحية المستندات المقدمة كأن تقدم تأمين منتهي أو خطاب عمل قديم, أو المستندات المقدمة لا تتناسب مع هدف الرحلة، كأن تقدم كشف حساب ضعيف وانت ذاهب للسياحة.
أو معلومات غير صحيحة عن هدف الرحلة كأن تقدم أوراق دراسة وتختار سياحة بالنموذج, أو لم تقدم مستندات تثبت صلة القرابة لأشخاص مسافرين معك, لم تقدم خطاب عمل أو ما يثبت وجود وظيفة لديك, أو حجوزات الطيران والفنادق تم إلغائها بعد التقديم للفيزا, كل دي أسباب ممكن تؤدي إلى رفض الفيزا و يدولك رفض للسبب (2) فركز قوي إن ورقك كله يكون سليم وعامل خط سير الرحلة مظبوط ومسجل بالتفصيل كل يوم هتعمل إيه.
2- طالب التأشيرة لم يقدم أدلة على امتلاكه للموارد المالية الكافية لعيشه أثناء الزيارة ولعودته إلى بلده الأصلي: وده سببه ضعف الحساب البنكي، خصوصا عند أول طلب للتأشيرة, أو عدم تقديم كشف حساب أو تقديم كشف حساب بمدة أقل من المطلوب, أو عدم تقديم كشف الحساب على أوراق البنك, أو عدم كفاية الرصيد في البطاقة الائتمانية.
المبلغ المعتاد للحصول على شنجن إن حسابك يغطي 70 يورو لكل يوم وانت مسافر وحد أدنى 600 يورو . يعني لو ذكرت إنك مسافر لـ 15 يوم اضربها في 70 يورو = 1050 يورو, ناس هتقول كان حسابي فيه 100 ألف وما اتقبلتش وناس بيكون في حسابها 20 ألف وبتتقبل!.
الموضوع كله كالآتي, موظفين السفاره فاهمين كويس قوي من كشف الحساب الفلوس دي اتحطت امتى بالظبط، وهل فعلا المبلغ ده عليه سحب وإيداع لمدة 6 شهور ولا محطوط فقط للحصول على الفيزا, فتاريخك المالي خلال 6 شهور باين كويس في كشف الحساب, فحاول قبل ما تسافر بـ 6 شهور إن يكون فيه مبلغ كويس في البنك ويكون عليه سحب وإيداع لمدة 6 شهور.
3-المعلومات المقدمة لتبرير أهداف وشروط السفر المطلوب لا يمكن الإعتماد عليها: شبيهة برقم 2، نضيف لها الحجز الفندقي غير المؤكد, أو يكون الضامن معندوش عمل جيد أو ضمانات كافية ليتكفل بك خلال السفر, يعني لو قدمت إن مثلا قريب ليك هيتكفل بزيارتك لازم يكون عنده مهنة كويسة وسكن مناسب و كل ده بتكتبه في الأبليكاشن, لو هو حالته المادية مش كويسة هتاخد رفض.
أنا رأيي: حتى لو عندك قريب أو صديق في البلد اللي هتزورها متجبش سيرته لأنك لازم تكتب كل حاجه عنه بالتفصيل ولو هو عنده أي مشكلة في عمله أو إقامته أو سكنه هتاخد رفض وش، فانت قدم سياحة حالك حال غيرك وسيبها على الله.
4- طالب التأشيرة لم يقدم أدلة كافية على نيته مغادرة فضاء شنجن بعد انقضاء مدة صلاحية تأشيرته: هي الحالة الشائعة جدًا ودي حق للموظف يكتبها لو شك فيك 1% إنك مش راجع تاني, وأسبابها أن لم يتم تقديم خطاب عمل أو خطاب تعريف دراسي, يعني معندكش مهنة ثابتة وراتب محترم هترجع علشانه تاني، أو لم يتم تقديم خطاب من ولي الأمر للسفر (يعني تكون طالب ومقدمتش موافقة ولي الأمر إنك تسافر لوحدك وإنه متكفل بمصاريفك), أو تم استعمال فيزا سابقة لغير ما أصدرت له (كأن تستخرجها من ألمانيا وتذهب للنمسا), أو تغيير البيانات كالحجوزات بعد إصدار الفيزا سابقاً, أو لم تقدم حجوزات طيران مؤكدة.
طيب إيه العواقب المترتبة على رفض طلب فيزا شنجن
• رفض إعطائك فيزا وختم جوازك يعني أنه قد تم تسجيل بياناتك في النظام الموحد لدى جميع قنصليات الشنجن.
• في حال رفضك لاقدر الله سيكون أمامك 30 يوماً فقط للاستئناف.
يعني إيه استئناف: الاستئناف ده كأنك بتقول إنك مش موافق على الرفض وإن ورقك كله سليم وفي الحالة دي ورقك مش بيروح لنفس الموظف اللي رفضك, ولكن بيروح لرئيسه في العمل ولكن خلي بالك هيتم التدقيق عليه أكتر من الأول، ولو فعلا كل شيء سليم 100% ممكن جدا يديلك موافقو. (ولكن الصراحة الموضوع ده بيتم نادراً ولكن بيتم).
تبدأ تعمل خطاب استئناف فوراً علشان تكسب الوقت وتكتبه بصيغة رسمية، وتحاول الإجابة على أسباب الرفض وتبريرها كتابياً، مع إرفاق ما يدعم ذلك بمستندات, ومتقدمش نفس الورق اللي قدمته قبل كده لأن كله موجود عندهم, الاستئناف بينفع فقط في حالة إنك تقدم معلومات جديدة, أنت أصلا مقدمتهاش في المرة الأولى وجالك رفض بسببها.
أتمنى من الجميع الحرص على تقديم معلومات صحيحة دائماً، لأن رفض الفيزا مش حاجه سهلة، ولاحظت أن الكثير يتساهل في استخراج فيزا الشنجن من أي سفارة رغم أن النظام ينص على استخراجها من الدولة الأكثر اقامة أو الدولة اللي هتزورها أول حاجة, فدائما السؤال الشائع ماهي أسهل سفارة استخرج منها الشنجن؟ وإجابته إن مفيش سفارة سهلة وسفارة صعبة.
الموضوع متوقف على أوراقك وتظبيطها، والموظف اللي هيقع تحت إيده الورق، يا إما تقنعه من خلال الورق يا إما ميقتنعش ويديلك رفض. وأتمنى من الجميع التدقيق على كل المستندات اللي بيقدموها والتأكد أنها مكتملة، وخلي بالك إن أهم المستندات هي ما يختص بالقدرة المالية وكشف حسابك لأن ده غالبا دائما بيكون سبب رفض أساسي, غير كده الباقي كله بسيط ان شاء الله.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

تعليق واحد

  1. رجعت من مطار امستردام بسبب ان عودتى كانت من ميلانو ولا يوجد معى حجز الى ميلانو
    هل يمكننى الدخول بالتاشيره مره اخرى؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *