الرئيسية / أوروبا / المصري معروف بجبروته حتى في إيطاليا: وير آر يو فروم؟
المصري معروف بجبروته

المصري معروف بجبروته حتى في إيطاليا: وير آر يو فروم؟

المصري معروف بجبروته | الرحالة | رحلة- مصطفى السيد حسين:
في إيطاليا، تايه و مش لاقي الأتوبيس، ومحدش بيتكلم إنجليزي خالص، نادرا ً لما تلاقى حد بيتكلم إنجليزي هنا أصلا ً.

المهم أخيرا ً حد شكله عربى ولابس تي شيرت مكتوب عليه فلسطين، وبيتكلم مع مراته بالعربى، تنفست الصعداء و قلت بس بقى كده الموضوع اتحل، رحتله مبتسم جدا ً و كلمته بالعربى: لو سمحت ممكن تساعدنى؟!. الراجل بصلى بقرف كده وتأمل وجهى وبعدين قالي وهو بيبص الناحية التانية الرد القاتل: “ربنا يسهلّك”!.

الموقف ده تانى مرة يحصل معايا بحذافيره كده، هو أنا شكلي يدى على شحات للدرجة دي؟!.
للأسف عشان رحلة إيطاليا دى جت فجأة، مكنتش حجزت، فلما جيت أحجز فى روما حجزت فى هوستل بعيد شوية عن وسط المدينة، فى الضواحى كده.
المهم وصلت الهوستل طلعوا مبيعملوش أكل، فنزلت أدور على مطعم، لقيت مطعم بيتزا فاتح قمت داخل، لاقيتهم بيقفلوا و شايلين الكراسى كده

سألتهم بالإنجليزي كده إذا كانوا لسة فاتحين، قعدوا يضربوا أخماس في أسداس، محدش فيهم فاهم حاجة، وبيقولولى أسعار البيتزا وبيشاورولى على يافطة مكتوبة بالإيطالى برضه وأنا مش فاهم، وأنا بحاول اشرح.
فى الآخر قاموا مناديين واحد من المطبخ ده اللي بيفهم إنجليزي بقى، فهما شرحوله إنى بتكلم إنجليزي بس يعنى وإنه يتعامل معايا، فالراجل قام قايلى ويلكم وابتسم سألته إذا كانو فاتحين مفهمش برضه و بعدين قام قايلى: “جود بيتزا … كام”، و قام مشاورلى على ترابيزة فقعدت.
قام الراجل جايبلى منيو وقايلى: “منيو”، فالمنيو مكتوب بالإيطالى و الإنجليزي، فشاورتله على اللى عايزه، قالى: “جود جود”، و بيعمل كل ده و هو مبتسم.
الراجل فعليا ً مبيعرفش يتكلم إنجليزي بس فهلوى، و بيعرف يتعامل جدا ً و ظبطنى و جابلى الأكل، وعرف يتعامل يعنى بأربع كلمات إنجليزي و ظبط كل حاجة، و بعدين ربنا فتح عليه بجملة إنجليزي تانية: “وير آر يو فروم”؟. فقلت له: “إيجيبت”.
قالى أهلا ً يا عم ما تقول م الصبح أنا من إسكندرية :>
الفكرة إنى أدركت فعلا ً إن كم الفهلوة ده ميطلعش غير من مصرى أصيل.

المصري معروف بجبروته
المصري معروف بجبروته

شاهد أيضاً

افضل فنادق ميونخ

افضل فنادق ميونخ

افضل فنادق ميونخ | الرحالة | ميونخ، المدينة العريقة، العاصمة الخفية لالمانيا، مدينة الأديرة والكنائس …