fbpx
الرئيسية / آسيا / السيد مصطفى يكتب من بوسان: كوريا الجنوبية رايحة على فين؟

السيد مصطفى يكتب من بوسان: كوريا الجنوبية رايحة على فين؟

رحلة- السيد مصطفى:

بوسان عاصمة الجنوب وميناء التصدير رقم واحد في كوريا الجنوبية، تقع في أقصى جنوب البلاد، ولها تاريخ نضالي كبير في كوريا. في الحرب الكورية مدينة بوسان كانت المدينة الوحيدة التي لم تسقط في يد الشماليين أثناء الحرب وعلشان كده هما ليهم شكل وشخصية مختلفة وعزة نفس كبيرة.

أحسن طريقة تروح بيها بوسان من سيول هي القطر السريع ktx القطر ده بياخد ساعتين وأربعين دقيقة بالتمام والكمال من سيول، عمره ما ياخد ساعتين وتسعة وتلاتين دقيقة ولا ساعتين وواحد وأربعين دقيقة، قطر تظبط عليه ساعتك، أغلي تذكرة طبعا لو اشترتها اتجاه واحد بس بما انك رايح وجاي فبيعملوا ليك تخفيض ولو عامل اشتراك السياح بتركبه مجانا.

بوسان هي المصيف رقم واحد في كوريا الجنوبية بسبب الشاطئ بتاعها واسمه شاطئ هيونداي، معتنين بيه جدا وجنبه في جنينه للفنون والشاطئ نفسه صيف وشتاء دايما في ناس بتلعب رياضة، بس في الشتاء بسبب برودة الجو محدش بينزل يعوم.

بوسان فيها معبدين لبوذا ومتحف أحياء ماءية مجاني الدخول، المعبد رقم واحد دا جنب البحر وده المعبد الوحيد لبوذا جنب البحر في العالم، والمعبد التاني فيه أكبر تمثال لبوذا في الجبل ودول علامات من علامات بوسان.

متحف الأحياء المائية غير متحف بوسان البحري دول متحفين مختلفين، متحف بوسان البحري بيخلد ذكي انتصار الكوريين علي اليابانيين في معركة غير عادلة تماما، الكوريين هزموا اليابانين في القرن السادس عشر في معركة بحرية جنب بوسان وكان عدد سفنهم 13 وهزموا 75 سفينة يابانية، كمان داخل المتحف هتلاقي تطور صناعة السفن في كوريا وتطور صناعة الغواصات والرحلات اللي عملوها للقطب الشمالي والجنوبي وكمان إزاي بيصنعوا السفن والمستهدف في المستقبل من صناعة السفن والغواصات علشان الناس والشباب تعرف هما كانوا فين وأصبحوا فين ورايحين علي فين في المستقبل.

بوسان كمان عندها الاعتزاز الكوري بالنفس علشان كدة في قضية في بوسان وأنا هناك سببت أزمة دبلوماسية مع اليابان، في تمثال للكوريات اللي تم إجبارهم علي العمل في الدعارة أثناء الاحتلال الياباني لكوريا، في بوسان عملوا تمثال وحطوه جنب القنصلية واليابان طلبت إزالة التمثال والمواطنين رافضين الإزالة، واليابان بتقول إن الموضوع ده اتقفل وانها دفعت تعويضات للستات دول والمفروض التمثال يتشال، بس الناس معترضة والحكومة الكورية محتارة تعمل إيه لأنها قبضت التعويضات فعلا.

الصبح الناس في بوسان تلاقيها صاحية بدري علشان تشوف شروق الشمس وبيقفوا علي البحر بيستنوا شروق الشمس قبل ما يروحوا الشغل، منظر خرافة بجد، بوسان مشهورة كمان بإنها العاصمة التانية لكوريا، وكمان بالأكلات البحرية وكمان إن أهلها مفتحين علي العالم كله بما إنها مدينة ساحلية وميناء رئيسي للتجارة والتصدير.

شاهد أيضاً

رحلتي الى جزيرة بوكيت

رحلتي الى جزيرة بوكيت : تجربة فتاة مصرية عمرها 19 عامًا

رحلتي الى جزيرة بوكيت | الرحالة | رحلة- بسمة محمود:   أنا بسمة 19 سنة، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *