الرئيسية / آسيا / السيد مصطفى يكتب رحلته إلى كوريا الجنوبية: كيف تتجنب الترحيل

السيد مصطفى يكتب رحلته إلى كوريا الجنوبية: كيف تتجنب الترحيل

رحلة- السيد مصطفى:
أول حاجة كوريا الجنوبية مش محتاجة فيزا، في المطار بتاخد 30 يوم إقامة من يوم الدخول بس ليها شوية شروط، قبل ما تسافر من مصر لازم تروح مجمع التحرير تسأل إذا كان ليك تصريح أمني ولا لا، لو عندك وظيفة مثبتة في الجواز ومكان عملك فهيقولوا لك ملكش، لو طنشت ورحت المطار ظابط الجوازات هيسألك ويعرضك هناك على ضابط الاتصال في المطار، الأيام دي كمان في حاجة بيكشفوا على كل الشباب اللي مسافر في المطار وده إجراء جنائي.
قبل ما تر ح كوريا لازم تكون عارف انت رايح فين كل يوم وهتعمل إيه، كوريا مش البلد اللي هتغامر فيها لأنها بلد غالية وكل قرش محسوب بيتصرف فين، قبل ما تسافر تعمل جدول بالأيام والأماكن اللي انت رايحها وإزاي تروحها علشان تحسب تكاليفك.
كوريا عاملة موقع بالعربي وبكل اللغات اسمه visit korea وكمان معمول منه تطبيقات أبل وأندرويد نزلهم على تليفونك علشان تعرف كوريا اللي انت رايح تزورها، في التطبيقات دي في كمان جداول معمولة جاهزة ليوم أو لعدد أيام محدد.
في المطار لو أول مرة تروح كوريا طابط الجوازات هيسالك على تذكرة الرجوع وجدول أيامك في كوريا، دي طريقة حياتهم أصلا ممكن تسأل واحد هيعمل إيه كمان سنة هيقول، الهجرة غير الشرعية إلى كوريا متفكرش فيها أصلا، هما عارفين يجيبوك إزاي وهيجيبوك عن طريق تليفونك بالتكنولوجيا بتاعتهم.
بعد ما تعدي الجوازات هتتفاجئ بالنظام، سيول العاصمة فيها مطارين، مطار جيمبو ومطار آنشيون. مطار آنشيون أحسن مطار على مستوى العالم بجد بشهادة الدنيا كلها من حيث النظام والراحة والأمن، وده المطار الرئيسي لكوريا، ومربوط بشبكة مواصلات حديثة من آتوبيسات بتروح كل حتة في سيول العاصمة أو نظام مترو أنفاق وكمان مربوط بشبكة القطارات السريعة لكوريا لو انت مسافر لمدينة تانية، كل ده جوه المطار.
في تلات نصايح علشان تعرف تتنقل جوه كوريا، أول حاجة لازم تستخدم الجوجل نافيجيتور علشان تعرف انت هتركب إيه، هو بيقلب كوري علشان انت في كوريا وده مصمم للمواطن الكوري وتنقلاته بس دايما بيحتفظ بمحطتين على الاتجاه اللي انت رايحه بالإنجليزي علشان الأجانب يعرفوا يستخدموه.
بعد ما تحدد انت عايز تروح فين وهتركب إيه تنزل السوبر ماركت في الدور التاني تشتري كارت مواصلات، دا كارت حضرتك بتشحنه بفلوس وبتستعمله في الموصلات وأرخص حاجة تستخدمها طبعا علشان محدش بيركب تاكسي أصلا هناك وبتاخد تخفيض لو استخدمته.
نفس الكارت بتستخدمه في المترو أو الأتوبيس أو التاكسي لو عايز تاكسي، في كل المدن الكورية مش في سيول بس لو هتستخدم القطر، كوريا عاملة على موقع korail حاجة للأجانب اسمها اشتراك، المدة انت اللي بتخترها يوم أو يومين لحد سبع أيام متقطعة او مكتملة، دا بيديك إمكانية استخدام غير محدود لشبكة قطارات كوريا كلها بعدد مفتوح من الرحلات وبيوفر جدا لو هتسافر من بلد لبلد في كوريا.
بعد ما تعمل الاشتراك ده أونلاين على الموقع وتدفع بالفيزا وتسجل بالباسبور بتاعك قبل وصولك لازم، تطبع الورقة اللي هتطلع لك وتروح بيها أي محطة سكة حديد في كوريا وتحولها لتذكرة، مش هتدفع تاني حاجة بس لازم تروح مينفعش تروح تركب على طول لازم تاخد تذكرة برضه من المحطة.
تابعونا لمزيد من التقارير حول رحلتي في جنوب شرق آسيا

شاهد أيضاً

السفر التطوعي إلى تايلند

السفر التطوعي إلى تايلند : تجربة فرات سامي في التطوع بمزرعة تايلاندية

السفر التطوعي إلى تايلند | الرحالة | رحلة- فرات سامي:   ابتديت يومي الرابع في …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *