الرحالة و المسافرون العرب

الاسواق في اسطنبول | دليلك للتعرف على أهم المراكز التجارية و الاسواق في اسطنبول

الاسواق في اسطنبول | الرحالة | كتب- عمرو شريف:

ده التقرير الثالث في موضوع الاسواق في اسطنبول، وهو عن المولات العادية مش الأوتيليت، في كميه مولات غير طبيعية أنا هقول أهمهم، من حيث الأسعار المعقولة وعدد المحلات وسهولة الوصول حيث أن في مولات بعيدة قوي أو ماركاتها عاليه قوي.

 

الاسواق في اسطنبول

1- Cevahir mall

ده موقع المول ادخل شوف أسماء المحلات الموجوده فيه

و ده هتروحه إزاي عن طريق المترو؟

لو في تقسيم تركب المترو ام 2 لمحطتين بس وتنزل محطه سيشلي.

المول ليه مدخل من محطة المترو نفسها، بس خلي بالك وانت في المحطة اسأل أنهي مدخل للمول علشان في مدخل بيودي لمول تاني اسمه كانيون، وده مول غالي جدا.

 

المهم سيفاهير مول ده بقي فيه محل ماركة سي إن إيه و اللي بيسافر أوروبا يعرف إن الماركة دي هي ماركة محببة قوي للمصريين، وماركه موجوده في كل دول أوروبا و لسه ما جتش مصر.

وهي أصلا ماركة ألماني أسعارها معقولة جدا جدا، وتتميز إن فيها مقاسات كبيره كمان وكمان فيها لبس للأمهات يعني بكم طويل ولبس طويل وكده.

بجد الشوبينج فيه هايل والمول اللي يعتبر من أهم الاسواق في اسطنبول فيه الماركات التانيه زي كوتون وإل سي واكيكي ونايك وجاب ومانجو وبينتون ومازر كير وغيرهم كثير.

و لو انت في لالالاي تاخد المترو من محطه يانكابي اللي هو برضه رقم ام 2 و تنزل سيشلي تقريبا 6 محطات.

 

اقرأ أيضًا: الاسواق الشعبية في اسطنبول : بينها سالي بازاري وسوق فاتح وباكريكوي

2- Istanbul forums mall

ده الرابط بتاع موقع المول اللي فيه اسماء المحلات وهو من أفضل الاسواق في اسطنبول

المول ده بجد حكاية وكبير قوي ومبهر وسهل جدا تروحه عن طريق المترو لو في لالالاي تنزل محطه ياكنبي وتاخد خط ام 1 ايه اللي هو خط المطار وتنزل بعد 6 محطات اسمها كوكاتيبي.

 

والمول له مدخل من المحطه نفسها وفيه برضه محل سي ان ايه دوريين واتش ان ام دوريين وزاره ومارك ان سبنسر و يو اس بولو وكوتون وما نجو و ال سي واكيكي و نايك ومافي وغيرهم كثير.

ولو هتركب من تكسيم يبقي تركب الخط ام 2 اتجاه يانكابي 3 محطات وتنزل تغير في يانكابي ترلاكب خط المطار ام 1 ايه و تنزل في نفس المحطه و هي كوكاتيبي.

 

اقرأ أيضًا: افضل الاسواق في اسطنبول : الدليل الشامل للتسوق في مولات اسطنبول

3- Vialand Mall

ده بقي مول جديد وحكاية ومن أهم الاسواق في اسطنبول و ميزته انه موجود علي بارك زي ديرم بارك كده بس علي اظف كثير و هو بعيد شويه.

و ده الموقع علشان تدخل تشوف اسماء المحلات يعني تعرف الماركات اللي موجوده فيه

Vialand Mall
Vialand Mall

 

 

و بالتالي حنروح ازاي فيه شاتيل باص يعني باص خاص بالمول بيطلع من تقسيم او كاتباش او السلطان احمد كل ساعه و طبعا ببلاش والسكه تاخد نص ساعه و ممكن تدخل البارك او تدخل المول طبعا البارك بفلوس و المول ببلاش.

المول ده جزء كبير فيه اوبن اييير و فيه طبعا كل الماركات اللي مكن تتخليها و طبعا حبيبي سي ان ايه موجود جواه و بجد يستحق تروحه و اسعاره معقوله جدا وادي اللينك بتاع الصفحه بتاعه مواعيد الشاتيل باص و منين بتطلع.

4- Marmara Forums Mall

ده الرابط بتاع المول اللي فيه اسماء المحلات ويعتبر من أهم الاسواق في اسطنبول

المول ده برضه مول كبير و فيه محل سي ان ايه 3 ادوار و اتش ان ام 3 ادوار و باقي الماركات المهمة.

 

لو انت في تقسيم تركب المترو محطه اللي هو اسمه فانكشيال و تطلع تلاقي الترام في كاتسباش تاخده لغاية محطه زيتنبرنو و تنزل من المحطه خد يمينك و امشي 3 دقائق حتلاقي شارع كبير مقاطعك ادخل فيه شمال و امشي كمان 4 دقائق المول.

اصلا باين جدا من عند محطه الترام و لو انت في لالايه اركب الترام من محطه لالايه و انزل برده زيتنبرنو

 

5- Historia Mall

ده في منطقه اكسراي و هو يعتبر مول صغير بس من أفضل الاسواق في اسطنبول وفيه برضه سي اند ايه محل كبير و علي فكره كل فرع في سي ان ايه حتلاقي حاجات مختلفه و لو مثلا مقاسك مش موجود في فرع حتلاقي مقاسك في فرع تاني.

 

دايما سي اند ايه عنده سكشن اسعار مخفضه يعني ممكن تلاقي قميص او تي شيرت رجالي من اول 10 ليره و اسعار القميص العاديه بين 20 الي 30 ليره و شورتات نفس الحكايه و بلوفرات نفس الحكاية.

المهم المول ده لو في لالايه ممكن تمشيله لمحطه اكسراي او تركب المترو من يانكابي و تنزل اكسراي محطه واحده و تمشي بتاع 2 دقيقه حتلاقيه علي يمينك

 

6- Metro City Mall

ده الرابط بتاع المول اللي فيه اسماء المحلات واللي يعتبر من أفضل الاسواق في اسطنبول

ده مول كبير و مافيهوش سي اند ايه فيه مارك اند سبنسر و زاره و بينتون و كوتونو مانجو و ال سي واكيكي.

 

وده يتراح له من تقسيم تركب المترو ام 2 و تنزل بعد 4 محطات محطه اسمها ليفنت و حتلاقي مدخل المول في المحطه و لو في لالالاي حتركب برضه المترو ام 2 و تنزل نفس الشيء.

 

 

اترك رد

لن يتم نشر عنوان بريدك الإلكتروني.