ماليزيا افضل دولة للسفر | الرحالة | رحلة- محمود عبد الله: زي اي حد بيحلم بـ السفر فكرت كتير وأخدت خطوات وكانت فكرتي باختصار إني مش حابب أسافر دولة عربية، و اوروبا بالنسبة لي صعبة لأكتر من سبب لكن مفيش مستحيل.
بحثت وعرفت إن في حوالي 45 دولة بدون فيزا للمصريين درستهم كلهم ع النت ولقيت أحسن بلد لي هي ماليزيا افضل دولة للسفر امام المصريين من حيث إقامة 3 شهور، سهولة تعامل في حاجات كتير، اقتصاد ممتاز.. حاجات كتير عجبتني فيها.
ماليزيا افضل دولة للسفر
قبل السفر درستها ع النت لمده شهر تقريبا، يوتيوب جوجل فيس بوك، كل حاجة فيها معلومة عن ماليزيا ، قريتها لدرجة اني كنت حافظ أسعار اي حاجه مهما كانت بسيطة واسعار الموصلات وخريطة المترو والشوارع والمطار وكل معلومة ولو بسيطه ممكن احتاجها.
لأن دي أول سفرية لي خارج مصر، وفعلا أخدت القرار وبدأت اتابع اسعار تذاكر الطيران واتابع الوظايف هناك من خلال النت.
وفعلا حجزت علي مصر للطيران كانت التذكره ذهاب وعوده ب5100ج قبل التعويم مع 500$ بوكيت ماني وكان وقتها التصريح الامني مطلوب وكان أول حاجه مطلوبة فيه دعوه من شخص ماليزي مع اني رايح سياحة.
مطار كوالالمبور في ماليزيا
بعد بحث وسؤال بعض الاصدقاء لقيت اني هسافر من غيره واهم حاجه اثبات لظابط المطار اني رايح سياحة فعلا وعقبه اخري وهي 1000$ وانا خارج وكل اللي كان معايا وقتها 500$ بس والحمد لله بطريقه ما عديت على خير.
كان السفر حوالي17ساعه ترانزيت 3ساعات في بانكوك تايلاند وصلت ماليزيا ودخلت مطار كوالالمبور اللي كنت حافظ شكله من الفيديو اللي على اليوتيوب نتيجة البحث المكثف.
الفنادق في ماليزيا
طلعت برا كنت متفق مع حد هيوصلني بعربيه لمنطقه قريبا إلى حد ما من المطار اسمها سيردانج وفعلا نزلت فيها وكان الجو مختلف تماما عن مصر ومطر شديد مع حر.
المهم لفيت فنادق كتير لحد ما لقيت سعر مناسب إلى حد ما، مع انه كان غالي شويه لكن في الاول اهم كام يوم الراحه وفعلا نزلت في الفندق وارتحت كام يوم وانا بتجول وبدرس المنطقه حواليا.
بوكيت بينتانج
عدي اربع ايام كنت اتعرفت على اكثر من شخص في المنطقة ومن خلالهم نزلت المنطقة اللي كتير حذرني منها قبل السفر وهي منطقه بوكيت بينتانج ، لكثرة العرب والدعارة والبارات والزحمه واحيانا عدم الامان لشخص جديد.
وفعلا نزلت المنطقة في خامس يوم لي ولقيت شغل مناسب براتب كويس إلى حد ما ونقلت لفندق قريب من الشغل لأن سكن الشغل بالنسبة لي كان مش لطيف.
اشتغلت شوية ودرست المنطقة حوالي ومن شغل للتاني وهكذا، وطبعا كله في خلال أول 3 شهور لي وكان لازم أعمل أي حاجة في الإقامة.
الاقامة في ماليزيا
طبعا الدخول بفيزا سياحة لمده تلات شهور مجانا كنت عارف واتاكدت اكتر من هناك من الاقامات لقيت ان في اكتر من حل بالنسبة لي او عموما، وهو اني اجدد الفيزا.
يعني أسافر لأي دوله قريبة زي اندونيسيا مثلا لمدة بسيطة وارجع تاني آخد تلات شهور تاني، الموضوع ممكن يعدي مره والتانية لكن التالتة صعب شويه.
وممكن اعمل نفس الموضوع بدون الخروج، عن طريق ناس بتشتغل في كده وتقريبا التكلفه واحده بتكون في حدود ال1500 رنجت للمرة الواحدة. وفعلا عملت كده وسافرت وجددت اكتر من مره
تاشيرة ماليزيا أنواع متعددة
فيزا طالب بتكلف حوالي 7000 رنجت لدراسه الانجلش مثلا في معهد بتكون الدراسه لمده ست شهور واقامه سنه
الزواج ودي بتكون فيزا لمده ست شهور وبعد كده تتجدد لمده خمس سنين
بزنس بفتح مشروع والتكلفه للاقامه بتكون حوالي 3000$ واقامه سنتين ويحق لك تدي اقامه ل6افراد بعد كده
فيزا عمل لمده سنتين بيعملها صاحب العمل مجانا للعامل او بتعملها عند حد بيعمل اقامات بتكلف حوالي 12000 رنجت الخ.
العمل في ماليزيا
طبعا البلد ممتازه وانا كنت مبسوط جدا فيها وقعدت فيها سنه ونص اتعلمت كتير من التجربه في خبرتي وفي عملي خبره في السفر تعلم لغات مختلفه زي الاندونيسي الماليزي البنجالي وتقويه الانجلش طبعا وكان شغلي شيف مع شغل اخر مثل السمسره وفتح مشاريع لاشخاص بعموله وهكذا.