الرئيسية / أخبار سياحية / ازاي تستعدي لـ رحلة شهر عسل خالية من أي “ذكرى ناشفة”: للبنات فقط
ازاي تستعدي لـ رحلة شهر عسل
ازاي تستعدي لـ رحلة شهر عسل

ازاي تستعدي لـ رحلة شهر عسل خالية من أي “ذكرى ناشفة”: للبنات فقط

ازاي تستعدي لـ رحلة شهر عسل | الرحالة | كتبت- داليا كمال:

استكمالا للموضوعات الموجهة للبنات وبس, النهارده بقى عندنا حاجة جديدة للبناتيت اللى داخلين دنيا جديدة ومستنيين شهر العسل بفارغ الصبر ? , وهو إزاي تستعدي لشهر عسل خالي من ذكرى ناشفه ومأشفة ?

بس استنى تعالي أقولك حاجة فى سرك كده، بينى وبينك يعنى ده احتمال يبقى الكام يوم دول بس العسل فى حياتك أصلا 😀 , وعشان كده لازم تبقي على سنجه عشرة زي مابيقولوا كده ولازم تعملى حسابك على كام حاجة كده ومتخافيش أنا هقولك عليهم دلوقتي.

ازاي تستعدي لـ رحلة شهر عسل

بصى يا ستى أولا: مهما كان المكان اللى انتو رايحينه، أكيد هيبقى فى تغيير مناخ عن اللى انتى عايشه فيه ومتعودة عليه, وأكيد برضه مش هتروحوا مكان فيه تلج في عز الصيف, وعشان بشرتك متتشحورش من الشمس ☀ ويلاقيكى حد تانى عن اللى كان متفق عليه لازم يبقى معاكى كريم واقى من الشمس أو صن بلوك من اللى بيحموا 90%

ولازم تحرصي تحطيه كل ساعة تقريبا وانتي معرضة للشمس. معلش هتلاقيه غالى شويه بس زى ما قولنا هما كام يوم وبخ على كده, ولازم بكون نوع كويس SPF 50 على الأقل.

رحلة شهر العسل

ثانيا: الشفايف مينفعش تبقى ناشفة ومشققة أكيد مش محتاجة أقولك يعنى ? , تغير الجو والشمس والمياه وكل عوامل النشفان هتسيب تأثير وحش قوى على شفايفك ومش وقته بصراحة, عشان كده أقل حاجة ممكن تعمليها تجيب مرطب شفاه وأرجوكي استنضفى الماركة أو النوع عشان يعمل مفعول.

ثالثا: نصيحة لوجه الله حاولى يبقى معاكى الـ BB cream . عشان تركيبته فيها فوائد البرايمر، كريم الأساس، المرطّب وواقي الشمس.

شهر العسل

رابعا: أكيد الرومانسية هتبقى مقطعة بعضها وتتمشوا على البحر ? , طب إيه بقى المشكلة في كده؟! أنا أقولك, الرمله والمياه بينشفوا الرجلين جدا, وزى ما اتفقنا ده والله ما وقته ابقى انشفى بعدين لكن دلوقتى لازم يبقى معاكى كريم ترطيب للقدمين, والتكنولوجيا مش هتسيبك لوحدك فى كذا جهاز للعناية السريعة أو اليومية بالقدمين لازم يبقوا معاكى.

خامسا: من ضمن الحاجات اللى هتنشف منك بسبب المياه المالحة والشمس والجو وبرضه مش وقتها, هى شعرك. بخبرتك مع شعرك طول السنين دى كلها أكيد عارفه إيه اللى بينشفه وممكن يتصلح ازاى, طبعا الكرياتين والهرى اللى انتشر ده ممكن, بس شخصيا مفضلوش عشان مش معروف إيه أضراره قدام لكن خلينا فى الطبيعى من غير كرياتين.

حاولى مثلا تستخدمى شامبو يخلصك من الملح لكن ميقصفهوش, غطيه وانتى تحت الشمس أو فى المياه خدى معاكى بلسم للترطيب وهكذا بقى على حسب انتى متعوده مع شعرك على إيه المهم أنا بفكرك بإنك متنسيش إن شعرك هينشف واتصرفى فيه حسب طبيعته معاكي.

ازاي تستعدي لـ رحلة شهر عسل

سادسا: نصيحه بنسمعها كتير بس مش بنعمل بيها عشان احنا شعب أكيل بطبعنا, خلى بالك من أكلك وكلى خضار وفاكهه عشان أكيد انتى عارفه ان ده بيطلع على بشرتك وبيخليها نضرة ومنورة.

سابعا: اشربي مياه كتير علشان تعوضي المياه اللي بتفقديها طول اليوم بسبب الحر, وده برضه هيرجع بفوائده على بشرتك وصحتك عموما.

وهقولك للمرة المليون متستخسريش فى نفسك حاجه عشان الكام يوم دول هيبقوا ذكرى (بعيدا إنهم يمكن ميتكرروش كتير ? ) فخليها تبقى ذكرى حلوه مش ناشفة ومأشفة ?

هذا التقرير منشور بالاتفاق مع صفحة Travel Secrets.

شاهد أيضاً

السياحة في بانكوك

السياحة في بانكوك : تعرف على الأماكن السياحية الأكثر مُتعة وتشويقًا في تايلاند

السياحة في بانكوك | الرحالة |  تُعد مدينة بانكوك واحدة من أكبر المدن الكبيرة في …